Karta Nanabiili Naakudda Tesalonisense
3 Gikuthulaga, addibila mudidele onilobelela wihina madhu a Yehova* edhowegeve evuwihiwaga mowaguva ni ethithimihiwaga ninga munerinyuna vaari veenyu, 2 wihina nobowe mmadani mwa amwiddani ni mwa athu abure, mwaha kahiyo athu aatene enna nroromelo. 3 Mbwenye Nabwiya dororomeleya, oliye aneere wulibihani ni aneere wubarelani mmadani mwa Mbure. 4 Ohiya eyo, wodhela nyu, nnororomela mwa Nabwiya wi munohara ni muneere odidelave ohara dhoholela dhehu. 5 Nabwiya adhowegeve aholelaga murima dhenyu ni makalelo apama wihina mmudhivelege Mulugu nvilelaga mwaha wa Kiristu.
6 Addibila, nnowuvahani dhoholela mwa ndina na Nabwiya ehu Yesu Kiristu negihina: kamwandane ni ddibila ahinafuna wiwelela ni ahinahara mweeddelo muhudherinyu ni iyo. 7 Nyu muhunona makalelo oonitajhiha mwaha iyo nahikanna mweeddelo wapama vaari veenyu, 8 newene kanijhile yoojha ya muthu ebeweene. Ohiya eyo, iyo nowapara mabasa nuviheya vamodha ni kopolo dhehu dhaatedhene mutana ni mahiyu, wihina nihikale mutholo wonyemela vaari veenyu. 9 Kahi wihina kaninna ofuru* wowakela ethu mmadani mweenyu mbwenye nafuna wihina nuuhiyedheni mweeddelo wapama wi muharege. 10 Mwebaribarene mudhidhi nigaali vamodha ni nyu, nowuwaddelesani neegi: “Akala muthu kanafuna waapara mabasa, ahijhe.” 11 Mwaha nihiwa wihina vaari veenyu ehikalavo athu amodha yahiniwelela; ehinaapara mabasa ni eniivolosiha muselu dhohikala dhewa. 12 Athu yayo nnowawaddela ni nnowakongomedha mwa Nabwiya Yesu Kiristu wihina yaaparege mabasa ehanganyedhaga ethu wihina ejhege dhoojha dha mabasa enaapariwa ni madiwa.
13 Addibila, nyu kamuselele werana opama. 14 Mbwenye ole ahinaawiwelele madhu naalebilihu vakartani vala mukale pasope ni muthu yoyo,* ni muhiye weedda nuliye wihina akannege manyazo. 15 Naarive dhigali ndo, kammoonege ninga mwiiddani, mbwenye mudidele omulaga ninga ddibilinyu.
16 Nabwiya a murenddele uvahegenive murenddele malabo aamatene mwa makalelo aamatene. Nabwiya akale vamodha ni nyu aatene.
17 Miyo Pawulo ginowuvahedhelani malojhelo galebilimi ni mada aaga, ala makalelo enooniha makarta aaga gaalebilimi; miyo gaalebaga, ginaleba ndala.
18 Opama wohinifwanelela wa Nabwiya ehu Yesu Kiristu, okale ni nyu aatene.