Ovuhulela wa Juwawu
12 Nuwindo, odhulu woneya yintelelo enlubale: muhiyana agawanre nduwa; mweri ogaali vati va manyalo aye, teto vamuru vaye vahikala kara yanna thendderi 12. 2 Muhiyana oyo ahikanna wari teto ookuwa vanlubale ni owoona widdela mwaha ahanle vang’ono wihina abaale.
3 Vano woneya yintelelo emodhaya odhulu: nowa yinlubale yoofila ninga mootho, yanna musolo 7 ni manyaga 10, teto kadda musolo wahikanna kara yoomwene; 4 mwiilaya oburulana thendderi dha epaddi yanatharu ni ovokedha elabo yavati. Nowa ele wiimela osogolo wa muhiyana ole aahanle vang’ono wihina abaale, ejheehaga wi abaala amutakune mwanayeya.
5 Oliye ombala mwaana a mwanamulobwana, yoyo anaakukulege athu a malogo maatene ni muddooddo wamujhila. Mowaguva mwanayeya othukuliwa ni odhowiwana wa Mulugu ni vampaddoni vaye. 6 Nuwindo, muhiyana ole othawela mwiddeddereni mwemmo Mulugu amwegeredheliye mburo ni anajhihiwegiye muwari mwa malabo 1260.
7 Vano odhulu otatamuliwa koddo: Migeli* nangero aye owana nnowa, nowa ele nangero aye yowaniha koddo, 8 mbwenye aliwa kigonjhihile, teto newene odhulu kifwanyile mburo vokala. 9 Nuwindo, nowa ele enlubale ovokedhiwa elabo yavati, nowa yoobajha, enithaniwa Saddana Ddiyabo, onaaholosa athu aatene eelabo yavati. Oliye ohuvokedhiwa elabo yavati vamodha ni angero aye. 10 Miyo wiwa ndhu nootaama nakuma odhulu niwogaga negihina:
“Vano, ovulusiwa, kopolo ni Omwene wa Mulugu ehu ni onamathonga wa Kiristu ohufiya, mwaha ohuvokedhiwa elabo yavati ole anawinkedhesa addibilihu, yoyo anawinkedha mutana ni mahiyu, vamentoni va Mulugu ehu! 11 Aliwa ehimugonjhiha mwaha wa nikame na Mwana Nimbila ni mwaha wa madhu oonamoona wewa teto kidhivenle egumi yewa newene kiyoovile okwa. 12 Bumwahaya, odhulu ngo muhagalale ni nyu munakalawo! Yokubanyedhiwa si elabo yavati nniya, mwaha wi Ddiyabo ohuukitelani ni owali winlubale mwaha ohunona wi mudhidhi ahanliyena kahiyo munene.”
13 Nowa ele nuunona wihina gihivokedhiwa elabo yavati, obajha omuthamagiha muhiyana ole ambaale mwaana a mwanamulobwana. 14 Mbwenye muhiyana ole ovahiwa mampelo menli yakala ninga mampelo a pangwe munlubale, wihina emukavihere ovavelana mwiddeddereni wili mburo waye, wengo aajhihiwegiye muwari mwa mudhidhi mmodha, mudhidhi minli ni meya, wolapela nnowa ele.
15 Vano nowa ele wawummula manjhe yakala ninga mwihinjhe mundduli mwa muhiyana ole, wihina oliye addadde mwiiko. 16 Mbwenye, thaya odha omukavihera muhiyana, theya emodhave watama wamidha manjhe nowa ele yawumunliwa. 17 Nuwindo, nowa omunyanyuwela muhiyana ole ni odhowa owana koddo ni odhuulu waye wahanle, ale enawiwelela malamulo a Mulugu ni enaapara mabasa oovaha onamoona wa Yesu.