Karta Nanabiili Naakudda Tesalonisense

1 Miyo Pawulo, gili ni Silvanu* vamodha ni Timotiyu, karta nna ginalebela mulogo woTesalonika oli mwimodhani ni Mulugu Baabi ni Nabwiya Yesu Kiristu:

2 Opama wohinifwanelela ni murenddele wa Mulugu Baabihu ni wa Nabwiya Yesu Kiristu, okale ni nyu.

3 Iyo nnofwanelela omutamalela Mulugu mwaha wa nyu, addibila. Eyo sofuneya, mwaha nroromelo nenyu ninna wunnuwa vanlubale, teto odhivela munninyuna mmodha ni mukwaye onna wenjhedhedheya. 4 Bumwahaya nnowithukula vaari vamulogo dha Mulugu mwaha weenyu, mwaha ovilela weenyu ni nroromelo munonihinyu mudhidhi waatene munaharahariwinyu ni makathamiho enufwanyani. 5 Oyo onamoona onatonyihedha otoriha wowogowa wa Mulugu ni onuwuwerihani nyu wooniwaga ninga athu oofwanelela a Mumweneni mwa Mulugu yoyo munoonelinyu goyi.

6 Woona wihina Mulugu dowogowa, oliye aneere wahogolosela kunyawunya ale enuwonihani goyi. 7 Mbwenye nyu munoona goyi, munere woboliwa vamodha ni iyo mudhidhi Nabwiya Yesu ooneyihiwa odhulu ni angero aye akopolo, 8 yadhaaga ni mootho, edhelaga watolosa ale ehimunonne Mulugu vamodha naale ehiniwelela muthenga dhapama dha Nabwiya Yesu. 9 Athu yayo enere woona goyi mwaha osinyusiwa wodhela otolosiwa ni mukalakala, evenyihiwevo vamentoni va Nabwiya ni nthithimiho naye na kopolo, 10 Nabwiya ehu adha wihina athithimihiwe ni oweela aye, labo nenno aatene yaale enamuroromela enere omutikina. Mwaha muhuroromela onamoona nuvahilihuni.

11 Mwaha wa yeyo, malabo aamatene nnowulobelelani wihina Mulugu ehu uwoonegeni ninga athu enafwanelela withaniwa nuliye, vamodha ni kopolo dhaaye erena dhithu dhaatedhene dhinamuhagalasa ni mabasa aatene a nroromelo, 12 wihina ndina na Nabwiya ehu Yesu nthithimihiwe vaari veenyu, teto ni nyuwa muthithimihiwe mwimodhani nuliye mowiwanana ni opama wohinifwanelela wa Mulugu ehu ni wa Nabwiya Yesu Kiristu.