Karta Noobajha Na Peduru
1 Miyo Peduru murumiwi a Yesu Kiristu, ginulebelani nyu musakuliwe ni Mulugu ni mmwadheyile ninga anyawedda elabo yoPontu, yoGalasiya, yoKapadosiya, yoAziya ni yoBitiniya, 2 Mulugu Baabihu ohusakulani mowiwanana ni efunelo yaye anniyena okuma kale. Ohutxenihani ni muzimu waye wihina mukale owiwelela wodhela nikame na Yesu Kiristu.
Opama wohinifwanelela ni murenddele okalegeve ni nyu.
3 Oothithimihiwa akale Mulugu, Baabi a Nabwiya ehu Yesu Kiristu, mowiwanana ni thagaraga dhaye dhinlubale mwaha oliye ohuneeriha iyo obaliwa dila biili wi nikanne ejhehedhelo yooliba wodhela Yesu Kiristu avenyihiwe muukwani, 4 wihina naakele mukono ohunna nihonya ni ohunadha omala. Mukono oyo apaganyiliye okoyiwe odhulu wihina nvahiwe nyu 5 munakoyiwa ni kopolo dha Mulugu wodhela nroromelo neenyu mwaha wa ovulusiwa winafuna woneyihiwa mudhidhi wookuthula. 6 Mwaha wa yeyo nyu munohagalala vanlubale, naarive ehoweleyaga nyu wukuuwa mudhidhi vang’ono, mwaha wa dhoweha dhohiyana-iyana dhinufwanyani, 7 wihina nroromelo neenyu nimanle weehiwa nuthukuleleni ovuwihiwa, othithimihiwa ni orihiwa mudhidhi Yesu Kiristu anoneyihiwiye. Nroromelo nno munninyuna, nihithabwa okanna thima okwaranya woru enarimela naarive egamanle weehiwa ni mootho. 8 Naarive muhunamonege Kiristu, nyu munomudhivela. Naarive ovanene vala muhumonaga nyu munomuroromela ni munohagalala vanlubale ni ohagalala ohunawogeya ni woothithimiheya, 9 mudhidhi munakwanelihinyu efunelo ya nroromelo neenyu, wili: ovulusiwa weenyu.
10 Niwogaga muselu wovulusiwa wula, anamavuhulela yahiwoga wodhela opama wohinifwanelela munafuninyu ovahiwa, aliwa ehiilibihedha vanlubale wihina esanyihe ni yahisayela onona wodhela ovulusiwa wula. 11 Anamavuhulela ayo yosayela pamadhene onona mudhidhiya wofwanelela dhaakwanele dhithudha mwa Kiristu mowiwanana ni muzimu wotxena wawogiliwa, muzimu oyo wotxena wahivuhulela mutaneene goyi afuna woona Kiristu ni makalelo aathithimihiwiye osogolowa. 12 Mulugu ahawonelihamo pamadhene wihina dhithu yawogiliwa ninga anamavuhulela kadhaali dhewa mbwenye dhaali wodhela nyu. Teto dhithu aliwa yawogiliwa sidhendho ewogile ale yulaleyileni muthenga wapama wodhela kopolo dha muzimu wotxena wakuma odhulu. Teto si dhithu dhendha ni angeroya enafuniwa vanlubale onona.
13 Bumwahaya, mwegeredhe mubuwelo weenyu wihina mwapare mabasa ooviheya; mweregena dhithu dhaatedhene ni thotho; muroromelege opama wohinifwanelela onaadhe Yesu Kiristu ooneyihiwa. 14 Ninga ahima* owiwelela, murabele wuubiwa ni mubuwelo mwanninyuna muhunathi omunona Mulugu, 15 mbwenye, woona wi Oweela duwithanneni, mweeddelo weenyu okale woweela mwa dhaatedhene, 16 mwaha dholebela dhinawoga dhegihina: “Mukale oweela, mwaha miyo gili oweela.”
17 Akala nyu munonvuwiha Baabi anatoriha ahinna nsakulo mowiwanana ni mabasa a kadda muthu, mweeddege mmoovaga Mulugu mudhidhi yoola mulinyu ninga anyawedda eelabo ela. 18 Mwaha nyu muhunona wihina kamoboliwe ni dhithu dhinarimeela ninga parata, woru, wodhela mweeddelo wabure muhiyedhiwinyu ni makolo eenyu. 19 Mbwenye mooboliwe nnikame nathima na Kiristu, nikame nno naali ninga na mwananimbila nihiraganle newene nihinna nihonya. 20 Ebaribari wihina oliye ahinoniwa elabo ehinathi opaddusiwa mbwenye ooneyihiwe omakuthulo wa mudhidhi mwaha weenyu. 21 Wodhela oliye, nyu munomuroromela Mulugu, ole anvenyihile muukwani ni onvaha nthithimiho, wihina nroromelo ni ejhehedhelo yeenyu ekale mwa Mulugu.
22 Woona wi muhumala witxeniha wodhela wiwelela weenyu webaribari, vano muhukanna odhivelana wooddibila wahinna ogwalagwambi, winoneya elabo yaatene, mudhivelanege mmodha ni mukwaye ni murima waatene. 23 Mbwenye nyu muhubaliwa ni madhu a Mulugu ookalawo, ohiya ni bewu enakwa mbwenye wodhela bewu ehinakwa yeyo enaakalewo ni mukalakala. 24 Mwaha “athu aatene enakala ninga maani, nthithimiho neewa naatenene nli ninga folori dha mukokolani; maani enowumma foloriya omorawo, 25 mbwenye madhu a Yehova* eneere okalawo ni mukalakala.” “Madhu” ayo bu muthenga wapama mulaleyiwinyu.