Karta Nanabiili Naakudda Korintiyu
6 Nnalaba vamodha ni Mulugu teto nnowukongomedhani wihina muhaakele opama wohinifwanelela wa Mulugu wula muhifunaga oparihedha mabasa. 2 Mulugu anihina: “Mudhidhi woofwanelela wihina miyo guurelihe, miyo gihuvuruwana teto mudhidhi wovulusa miyo gihukavihera.” Kasugwani, ola bumudhidhi wofwanelela. Kasugwani ola bumudhidhi wihina Mulugu anivuluse!
3 Kannerana ethu enakwakwathusa, wihina mabasa ehu oolaleya enadha enyemuliwe; 4 mbwenye mwa dhaatedhene nnowoniha wi nili amwimeleli a Mulugu, wodhela ovilelana dhoweha dhowinjhiva, dhohosa, orabula, wonihiwa goyi. 5 Nihuukuthiwa, nihivokedhiwa mukambura, nihirugunuweliwa naathu owinjhiva, nihilaba nuviheya, nihivireliwa emahiyu yantero nihigonile, nigavoliwe dala. 6 Nihoniha okala athu oweela, eenonelo, oovilela, oopama, nihirumedha weddihiwa ni muzimu wotxena, odhivela wehu kunna ogwalagwambi. 7 Nnowoga ebaribari, nnororomela kopolo dha Mulugu, nnopareela futhi dha woogowa moono woojha* ni weemaara.* 8 Nnothithimihiwa ni nnonyemuliwa, nnolamusiwa ni nnothetheliwa. Nnooniwa ninga anamaleketha wula niwogaga ebaribari, 9 ninga kannoniwe, mbwenye Mulugu ohuninona, ninga athu ehanle nena nuukwa,* mbwenye nihikanna egumi, ninga athu enasinyusiwa, mbwenye kannakwa. 10 Athu enubuwela wi iyo nili owukuwene, wula nihagalalaga mudhidhi waatene; enubuwela wi nili oohawa, mbwenye nnowavaha athu owinjhiva dhithu dhapama; enubuwela wi kaninna ethu, wula niganna dhithu dhaatedhene.
11 Iyo nihifugula murima ni mulomo wehu wihina niwoge ni nyu akudda Korintiyu. 12 Iyo nivano nnowudhivelani ni murima waatene, mbwenye nyu kamunandhivela ni murima waatene. 13 Ginawoga ni nyu ninga anaaga. Kamwerena, muneddihege ni makalelo mamodhave nnuweddihihuni. Ni nyuwa munidhivelege ni murima waatene.
14 Muhitaganyihedhe ni athu oohukanna nroromelo. Mwaha, wogowa ni walupa malamulo winiwanana aavi? Obe, waara ni yiihi winiwanana aavi? 15 Ohiya eyo, wiwanana baani olivo Kiristu ni Beliyali?* Obe, wiwanana baani olivo ole anna nroromelo nuule ahinna nroromelo? 16 Ki wiwanana baani olivo tempulu ya Mulugu ni dhikwamuthu? Mwaha iyo nili tempulu ya Mulugu ookalawo, ninga Mulugu awogiliye egihina: “Ginere okala naaliwa ni gineeddege naaliwa, teto miyo ginaakale Mulugu ewa, aliwa enakale nlogo naaga.” 17 “‘Vano, nvenyevo vaari vewa ni muhiye witaganyihedha naaliwa;’ anawoga di Yehova,* ‘ni muselele ohidda dhithu dhonyakavala,’” “‘vano miyo ginere wuwakelani.’” 18 “‘Miyo ginaakale baabi enyu, teto nyu munaakale anaaga anaalobwana ni anaahiyana,’ anawoga di Yehova* a Kopolo Dhaatedhene.”