Karta Noobajha Na Peduru
2 Mowindala, musukume obure waatewene, oleketha, ogwalagwambi, nrima ni waaba oli waatewene. 2 Ninga ahima ammadani enunlela waamwa mukaka wa amamiiwa, ni nyuwa mwenjhedhedhe efunelo yenyu wodhela madhu eebaribari a Mulugu wihina munnuwelevo ni nvulusiwe, madhu a Mulugu enaligana ni mukaka wa mmabeleni, 3 woona wihina muhukanna ebaribari wi Nabwiya dapama.
4 Wula mmwaddamelaga oliye, ali nibwe na egumi athu ekooddiliwa, mbwenye nsakuliwe teto nili noofuneya vamentoni va Mulugu, 5 nyu muli ninga mabwe ookalawo, munna olibihiwa ninga nyumba yoomuzimuni wihina mukale anamakutha oweela wi mpelekege mukutho dhomuzimuni dhinarumedhiwa ni Mulugu wodhela Yesu Kiristu. 6 Mwaha epaddi dhaala ya Dholebela enihina: “Kasugwani! Ginopweha oSiyawu nibwe noosakuliwa, nibwe nathima na alisersi teto muthu yoole anaaroromele nibwe nno newene kanadha aathukula manyazo.”
7 Mowindala, wa nyu nibwe nno thofuneya, mwaha nyu muhukanna nroromelo; mbwenye wa ale ehinna nroromelo “nibwe ameesili ekooddiliwa thi nibwe nathimana,” 8 teto “nibwe nookwakwathusa ni nnaamothiha athu.” Aliwa enokwakwathuwa mwaha kinawiwelela madhu a Mulugu. Teto eyo yahivuhuleliwa kale wihina yeere wapadduwela. 9 Mbwenye nyu muli “nikuru noosakuliwa, anamakutha enalaba ninga mamwene, nlogo noweela, athu avayekiwa wihina mulaleye dhikalelo dhapama” dha Ole uwithanileni oyiihini wihina muvolowe mburo waye wowaara. 10 Mwaha kale nyu kamwaali nlogo na Mulugu, mbwenye vano muli nlogo naye. Kamweddeliwa thagaraga ni Mulugu, mbwenye vano ohuweddelani thagaraga.
11 Addibila ginuudhivelimini, miyo ginowukongomedhani ninga anyawedda enakala mwilaboni muna mudhidhi vang’ono, wihina mudidele okoodda munigwa dha mwiili, dhendho munawaninyuna. 12 Mweeddelo weenyu okale wapama vaari vaathu amalogo, wihina mwinkedhiwa ni dhithu dhabure, aliwene ekale anamoona a dhowera dhenyu dhapama, ni emuthithimihe Mulugu nlabo anafuniye wapendda athu.
13 Mwaha wa Nabwiya, mwawiwelelege athu aatene, podi akala mwene, munlubale, 14 anamathonga, naaleya enarumiwa naaliwa wihina yaasinyuse athu enerana dhithu dhabure ni wihina yathithimihe ale enerana dhithu dhapama. 15 Mwebaribarene Mulugu anafuna wihina neregena dhithu dhapama wihina nifuge mulomo dha ataduwa yayo enawoga dhithu ehinonniwa. 16 Mukale ninga athu ootapuwa, mbwenye kamulabihedhege ofuru munninyuna wihina mwerena dhithu dhabure, mbwenye wihina mukale adhaari a Mulugu. 17 Mwaarihege athu aatene, mwadhivelege addibilinyu aatene a munroromeloni, mmoovege Mulugu, mwarihege anamathonga.
18 Adhaari* yawiwelelege anabwiya ewa ni nriho naatenene, ohiya wawiwelelave baahi ale eli apama ni ookweya, mbwenye naaleya eli oorusa wahagalasa. 19 Mwaha akala muthu onowavilelana makathamiho ni onoweeddihiwa nuhogowa mwaha wa omwiwelela Mulugu, eyo enomuhagalasa Mulugu. 20 Akala munowuukuthiwa mwaha otheega teto munowanda ovilela, munapuravo ddi? Mbwenye akala nyu monowavilelana makathamiho enufwanyani mwaha werana opama, eyo enomuhagalasa Mulugu.
21 Mwebaribarene, Mulugu duusakunleni wihina muharege dila yeela, mwaha wi Yesu ohoona goyi mwaha wa nyu, ahiyaga mweeddelo wihina muharege thalo dhaye. 22 Oliye kerilena yoothega, newene mulomo waye kuwawogile yowoota. 23 Athu yamuruwanaga, kahogolosa kunyawunya. Oonaga goyi, kaathusa, mbwenye amuroromela Ole anatoriha nuwogowa. 24 Oliye ohuthukula dhoothega dhehu mmwiilini mwaaye agaali vantxikwani na goyi, wihina nikwe mwaha wa dhoothega mowindo nikalegewo neragana dhithu dhowogowa. Teto “wodhela makwadda aye nyu muhuvulumusiwa.” 25 Mwaha nyu mwaali ninga mambila oorimeela, mbwenye vano muhumuhogolowela namakukula enyu ni namasogolela a dhigumi dheenyu.