Aalebeliye Akudda Eberewu
1 Kale, Mulugu ahiwoga dila dhowinjhivadhene ni makolo ehu wodhela anamavuhulela ni makalelo oohiyana-iyana. 2 Mbwenye malabo yaala oliye ohuwoga ni iyo wodhela Mwanaye, yoyo amusakunliye wihina ahalena dhithu dhaatedhene wodhela oliye apaddusiliye dhithu dha odhulu ni dha elabo* yavati.* 3 Oliye waara winatonyihedha nthithimiho na Mulugu ni dili nladdaniho neebaribari na ekalelo yaye, ni wodhela madhu aye akopolo anowanda osamalela dhithu dhaatedhene. Nuumala otxeniha dhoothega dhehu, oliye okarati moono woojha wa Mulugu ehu Munlubale ali odhulu. 4 Mowindala oliye dili munlubaleya wakwaranya angero aatene, mwaha ohuvahiwa* ndina nathima opitha newa.
5 Motajhiha, mungero baani Mulugu anarajhihegiye omwaddela egihina: “We oli mwanaga, peeno miyo gili Ababo”? Teto anoohogolowela egihina: “Miyo ginere okala Baabe teto oliye onere okala mwanaga”? 6 Mbwenye amudhaagana mwanaye Oobajha elabo ela yavati dila yanabiili, oliye ahiwoga egihina: “Angero aatene a Mulugu emukokorele.”*
7 Ohiya eyo, oliye onowoga wodhela angero egihina: “Onowaweriha angero aye okala muzimu dha kopolo ni onowaweriha adhaari aye okala nlumi na mootho.” 8 Mbwenye wodhela Mwanaye awogile egihina: “Mulugu bu mpaddo waye wamukalakala, teto mukogodho wonamathonga waye, mukogodho wowogowa. 9 Nabwiya onodhivela opama ni onowidda waalupa malamulo. Bumwahaya Mulugu, Mulugu aye, adhe amukuthulelege makura oohagalasa wakwaranya mamwene amodha.” 10 Teto owogave egihina: “Nyu Nabwiya, omambelelowene muhumutibela alisersi a elabo yavati teto elabo yodhulu mabasa mwaaparinyu ni madiinyu. 11 Dhaatedhene ndha kadhinadha dhikalawo,* mbwenye we onerege okalawove; teto dhinere odduwa ninga guwo, 12 ni oneere okuna elabo yavati ni yodhulu ninga guwo, ohiya eyo dhinere osadduliwa ninga dhowara. Mbwenye we kunadha osadduwa teto yaka dhawo kadhinadha dhimala.”
13 Mbwenye wodhela angero, oliye onorajhihaga owoga egihina: “Okarati moono waaga woojha ofiyedha miyo wapweha amwiddani awo vati va manyalo awo”? 14 Angero aatene ayo kahiyo muzimu dhinaapara mabasa ootaleleya, enarumiwa wihina yakavihere ale enaavulusiwe?