Aalebeliye Akudda 1 Korintiyu

5 Gihaddeliwa wihina vaari veenyu, ohukalavo mulobwana mmodha anawerana mararuwo,* eli ethu yahinereyege vaari va makiristawu* mwaha oliye anamurarusa* muhiyana aababe. 2 Nyu munowithukula mwaha wa yeyo? Kiyafwanelele okala owukuwene, wihina muthu erilena ethu yeela igariwe vaari veenyu? 3 Naarive gihili vamodha ni nyu epaddi yomwilini, gili vamodha ni nyu epaddi yomuzimuni teto gihimala omutoriha muthu oyo enrena ethu yeyo, ekalaga ninga gili wengo ni nyu. 4 Mwatugumana mwa ndina na Nabwiya ehu Yesu munonaga wi miyo gili vamodha ni nyu epaddi yomuzimuni ni kopolo dha Nabwiya ehu Yesu, 5 mumpeleke mulobwana oyo wa Saddana wihina mweeddelo waye wabure adhiliyena mmulogoni omale, wi epaddi yomuzimuni ya mulogo enanongeye labo na Nabwiya.

6 Withukula weenyu kahi wapama. Kamunonne wi emela vang’ono enonyakuwiha othu watene wakanddiwa? 7 Nvenyihevo emela* yakale, wihina mukale othu muxa wakanddiwa wahinna emela, mowindala ninga mulinyu. Mwaha Kiristu ali nimbila nehu na paskwa ohukuthiwa mukutho. 8 Mowindala, kanilabihedhe emela yakale mathanga a paskwa yamala ojhiwa, ohiya eyo kanilabihedhe emela enatonyihedha yoothega ni obure. Mbwenye nijhe pawu ehinna emela enatonyihedha opama ni ebaribari.

9 Karta gulebelimini, miyo gihuwaddelani wi muhiye weedda* naathu enawerana mararuwo,* 10 kaginawagana athu aatene amwilaboni enawerana mararuwo* obe anrima, ambava ni athu enebedha dhikwamuthu. Yahakale ndo, mwebaribarene nyu mweere okumamo mwilabonimwa. 11 Mowindala ginowulebelani gegihina, muhiye weedda* ni muthu anithaniwa ddibila mbwenye anawerana mararuwo,* ali muliba nrima, anebedha dhikwamuthu dhosema, anna nlumi noobedda, ali namang’wa obe ali mbava, newene kamujhege ni muthu yoyo. 12 Ofuru wowatoriha athu ehili ammulogoni, bwaaga? Kahi nyu anaatoriha athu ammulogoni 13 wula Mulugu aatorihaga athu oode? “Mmukumihemo mmulogoni muthu yoole anerana dhithu dhabure.”