Dhilebiwe ni Lukaji

19 Voharela Yesu ofiya sidadi yoJeriko, mbwenye era ovira. 2 Wewule ahikalawo mulobwana dhaala ithaniwa Zakeyu aali namasogolela aanamakukusa musoko ni aali muliba ooreela. 3 Oliye owasayela makalelo wihina amoone Yesu, mbwenye kaanda omoona mwaha wa muthithi waathu teto ahithabwa okwiiva. 4 Nuwindo othamagela osogolo odhowa ogwela mmuthankoni mwa sikomoro wihina amoone, mwaha Yesu afuna avire mburo yoole. 5 Yesu nufiya mburo yoole osugwa odhulu ni owoga egihina: “Zakeyu kakita mowaguva mwaha peeno gili muleddo a vaade vawo.” 6 Oliye okita mowaguva ni omwaakela vaade vaye nuuhagalala. 7 Aliwa nuwoona ndo, aatene obajha onong’ona vikaleliwa yegihina: “Oliye adhowile vaade va mulobwana ootheega.” 8 Mbwenye Zakeyu ovenya owoga ni Yesu egihina: “Nabwiya nvuruwane, ginere wavaha aliba ohaawa epaddi modha ya dhoreela dhaaga teto ginere omuhogolosela muthu yoole gimwiyelimi* okwaranya dila nayi.” 9 Vano Yesu omwaddela egihina: “Vaade vala peeno vihifiya ovulusa, mwaha nuliyeya mwaana Abaraawu. 10 Mwaha Mwaana Muthu odhele wasayela ni wavulusa ale yarimenle.”

11 Yaavuruwanagave madhu awogiye, oliye owoga yoladdaniha emodha mwaha era waddamela murudda woJeruzale teto aliwa yubuwela wihina omwene wa Mulugu kuwalegele ofiya. 12 Nuwindo oliye owoga egihina: “Mulobwana dhaala ooreela omaga olenddo odhowa elabo yolapela wihina ahabihiwe omwene indo ahogolowe. 13 Ahinamaruwe wawithana adharaaye kumi, wahiyedha mina* kumi ni wawaddela egihina: ‘Mweddihena malondda mina ndha ofiyedha miyo ohogolowa.’ 14 Mbwenye athu oowaniwa yoomwidda ni oruma nikuru neembaxadori,* wihina yamwaddele yegihina: ‘Kannafuna wihina mulobwana ola akale mwenihu.’

15 Vano oliye nuhogolowa agaali mwene, wawithana adharaaye ale aahiyedhiye korowa* wihina anone ethu yapunriwamo ni malondda yaweddihiwa. 16 Nuwindo oobajha ofiya ni owoga egihina: ‘Nabwiya mina ele mwagihiyedhinyu gihipurana mina kumi.’ 17 Oliye omwakula egihina: ‘Ehikala, mudhaari apama! Woona wihina ohuroromeleya ni dhithu dhing’ono, ginere wuvaha sidadi kumi wihina othongege.’ 18 Vano ofiya anabiili ni owoga egihina: ‘Nabwiya mina ele mwagihiyedhinyu gihipurana mina tanu.’ 19 Nuulaya oliye omwaddela egihina: ‘Ginere wuvaha sidadi tanu wihina othongege.’ 20 Mbwenye mmodha ofiya ni owoga egihina: ‘Nabwiya, mina mwagihiyedhinyu ela gaamagile veesalani miyo okoya. 21 Miyo gera wuwoovani nabwiya mwaha muli muthu oorusa, munothukula ethu muhonelinyu goyi ni munahadda vego muhalilinyu.’ 22 Oliye omwakula egihina: ‘Mwaha wa madhu awo onoowoneya wihina oli mudhaari abure. Eyo enatapulela wihina wahinona wi gili muthu oorusa, ginothukula ethu gihonelimi goyi ni ginahadda vego gihimindhimivo? 23 Ki odhe ohupwehege korowa* dhaaga mbanku? Gahogolowegimi gere okanna mpurelo.’

24 Nuwindo oliye wawaddela athu yaali vavale egihina: ‘Mowindala mmwaake mina eyo mmwinke ole anna mina kumi.’ 25 Mbwenye aliwa omwakula yegihina: ‘Nabwiya oliye ohukanna mina kumi!’ 26 Oliye wawaddela egihina: ‘Mwaha ole anna aneere ovahiwa okunamo, mbwenye ole ahinna, naarive nileya anniyena aneere waakiwa. 27 Ohiya eyo, kadhenani wuno amwiddanaga yahifunne wihina miyo gikale mwene ewa mwaape vamentoni vaga gawoonaga.’”

28 Numala owoga dhithu dhendha, oliye omaruwa odhowaga oJeruzale. 29 Vano nufiya waddamela oBetifaji ni oBetaniya mburo dhaala onithaniwa mwango Woolivera, Yesu waruma anamaharaye abiili, 30 Ni wawaddela egihina: “Mudhowe murudda dhili osogolo, mwafiya munere onfwanya mwanabuuru agamageleliwe ni ahinagweliwege ni muthu. Mmutapule mmudhena wuno. 31 Muthu ukohani egihina: ‘Munamutapulela ddi mwanabuuru oyo?’ mmwakule mwegihina: ‘Nabwiya dinamuhowela.’” 32 Vano ale yarumiwe, odhowa ni onfwanya mwanabuuru ninga aawogiliye. 33 Mbwenye emutapulaga mwanabuuru ole annyaya waakoha yegihina: “Munamutapulela ddi mwanabuuru oyo?” 34 Aliwa wakula yegihina: “Nabwiya dinamuhowela.” 35 Aliwa omudhowana mwanabuuru ole waali Yesu, wathukula malayiwa watadela vadhuluva nuwindo oliye okarativo.

36 Vano oliye eeddaga, athu yowatadela malayiwa murampani. 37 Vano oliye nuwaddamela dila yadhowa omwangoni woolivera, muthithi waatene waanamahara wambela ohagalala wula emuthithimihaga Mulugu ni ndhu nootama mwaha wa mabasa ootikiniha yawoniliwa, 38 yegihina: “Oothithimihiwa duule anadha ninga Mwene ni ndina na Yehova!* Murenddele okale odhulu ni avuwihiwe Mulugu oodhulu!” 39 Vano Afarizewu amodha yaali vaari va muthithi yoole owoga nuliye yegihina: “Namahudhiha mwasumulule anamahara enyu.” 40 Mbwenye oliye wawakula egihina: “Gahere gawaddela wihina emaalewo mabwe yaala yerege okuwa.”

41 Vano, nuwaddamela oJeruzale, nusugwa sidadi ele, oliye wambela wunlela, 42 egihina: “Akala we, hee weene, wahere wubuwela labo nna ethu enahoweleya wihina wikale murenddele . . . Mbwenye peeno dhithu ndha dhiiviteya vamentoni vaawo. 43 Mwaha enere ofiya malabo amwiddanaawo enamagiwa txinga seresere yawo ni muthanko dhoxongowa ni enurijhiwa* dhipaddi dhaatedhene. 44 Aliwa enere wutolosa vamodha ni anaawoya teto kawindha okala nibwe nnakale vadhulu vanibwe nikwaye mwaha kuwubuwele mudhidhi wafuniwa weddeleliwa.”

45 Nuwindo Yesu ovolowa mutempulu, wambela wawigaramo aatene yaale yagulihamo dhithudhiwa, 46 egihina: “Ehilebiwa: ‘Nyumbaga enithaniwege nyumba ya malobelo,’ mbwenye nyu muhusaddula okala nyumba yaambava.”

47 Malabo aamatene Yesu oohudhiha mutempulu. Mbwenye anddimuwa aanamakutha, anamaleba, anamaholela a nlogo yosayela makalelo wihina empe; 48 mbwenye kiyawona makalelo ompa, mwaha muthithi waatene wonvuruwana pamadhene.