Ovuhulela wa Juwawu
17 Mungero mmodha wa angero ale 7 yanna mapusulano 7 odha ogaddela egihina: “Kadhawuno, ginafuna guwoonihe otorihiwa wa namararuwa* munlubale akiratile vadhulu va manjhe; 2 mamwene a elabo yavati ehiraruwa* nuliye, teto athu enakala elabo yavati ehilezela ni vinyu aye amararuwo.”*
3 Ni kopolo dha muzimu wotxena mungero ole ogithukulela mwiddeddereni.* Miyo omoona muhiyana agakaratile vadhulu va mwanenyama owoopiha anna kore yoofila ni anna mandina enamuruwana Mulugu ni anna musolo 7 ni manyaga 10. 4 Muhiyana ola ahaawara malaya oojerimela ni oofila ni ahiwara dhithu dha woru, mabwe athima ni peerola teto mmadani mwaaye agaparele kopo ya woru mugadhanle dhithu dhonyakavala ni dhithu dhootakala dha mararuwo* aye. 5 Vakoveni vaye vahilebiwa ndina nootikiniha: “Babiloniya Munddimuwa, mayi aanamararuwa ni a dhithu dhaatedhene dhonyakavala dheelabo yavati. 6 Miyo woona wi muhiyana ole ahimala olezela nnikame naale eli oweela vamodha nnikame naanamoona a Yesu.
Nuumona, gahitikina vanlubale. 7 Nuwindo mungero ole ogikoha egihina: “Mwahaya bwaddi odhe otikinege vanlubale? Miyo ginere wuwaddela yootikiniha ya muhiyana ola ni ya mwanenyama owoopiha anna musolo 7 ni manyaga 10. 8 Mwanenyama owoopiha omooniliwe aali, mbwenye vano kahiyo; oliye ahanle vang’ono okuma mmuliddini mooddiha wihina atolosiwe. Athu enakala elabo yavati (ale mandina ewa ehinalebiwege mulivuruni na egumi okuma vipaddusiwe elabo) enere otikina yoonaga wihina mwanenyama ole owoopiha aali, mbwenye vano kahiyo, ohuhogolowela okalawo.
9 “Enohoweleya thotho wihina muthu oonelemo dhithu ndha: musolo 7 dhinatapulela mwango 7 dhendho dhikaratele muhiyana ole. 10 Ni ehikalawo mamwene 7: 5 ehimala omora, mmodha alive txithi, mmodhaya kanafiye, mbwenye afiya aneere olegela mudhidhi vang’ono. 11 Vano mwanenyama ole owoopiha aali, mbwenye vano kahiyo, nuuliyeya mwene anetanu natharu, mbwenye anakuma wa mamwene yaale 7, ni anadhowa atolosiwe.
12 “Manyaga kumi wawoniliwe, enatapulela mamwene 10, yayo ehinathi wakela omwene wothonga, mbwenye aliwa ehivahiwa oneti wothonga wora modha vamodha ni mwanenyama owoopiha. 13 Aliwa enna mubuwelo mmodhave mowindala enonvaha kopolo ni owedha wewa mwanenyama owoopiha. 14 Aliwa eneere owana Nnimbila, mbwenye woona wihina oliye Nabwiya aanabwiya ni Mwene a mamwene, Nimbila nnere waagonjhiha. Ale eli vamodha nuliye, ale yithaniwe, ale esakuliwe ni eli oororomeleya naaliwaya eneere ogonjhiha.”
15 Mungero ole ogaddela egihina: “Manjhe ale wawoniliwe vikiratile namararuwa, enatapulela muthithi waathu, malogo ni dhiwogelo. 16 Manyaga 10 ni mwanenyama owoopiha omooniliwe, aneere omwiidda muhiyana ole amararuwo ni enere omutalela dhowara dhaye emwihiye madave, etakune nyamaaye yindo epahe yaatene vamoothoni. 17 Mwaha Mulugu ohupweha mmurimani mwewa efunelo yowerana ele anuubuweliye, hee yowerana ethu emodhave aatene enubuweliwa yonvaha mwanenyama owoopiha omwene enniwana, ofiyedha wakwanela madhu a Mulugu. 18 Vano muhiyana ole omooniliwe anatapulela luwani yinlubale enna owedha wowalamulela anamathonga a veelaboni yavati.”