Alebeliye Akudda Romanu
2 Bumwahaya mulobwana we, naarive okale ddi, akala onowatoriha athu amodha oniitoriha wamwinnyo, mwaha ni weya onaatoriha akwawo onowerana dhithu dhimodhave aliwa eneriwana. 2 Mwaha nihinona wihina otoriha wa Mulugu onowiwanana ni ebaribari teto onowawidda athu enerana dhithu dhendha.
3 Mulobwana, we onaatoriha athu enerana dhithu ndha wula ni weya weragana dhithu dhimodhave, onubuwela wihina otoriha wa Mulugu onere wulupa? 4 Onone wi onovudhuwana opama winlubale wa Mulugu, thagaraga ni ovilela waye, mbwenye kunoonelamo wihina mwaha opama waye anafuna wihina othwaruwe? 5 Teto mwaha wovuruvuru wa murima wawo ohunafuna othwaruwa, we onna witatamulela owali, Mulugu anafuniye wuwoniha labo naye nootoriha wowogowa. 6 Oliye aneere omuhogolosela kadda muthu mowiwana ni mabasa aapanriye: 7 aavahe egumi yohimala ale enavilela yeragana dhithu dhapama, esayelaga nthithimiho, nriho ni mwiili wahinavudda; 8 mbwenye ale enatatamula okangana ni ehiniwelela ebaribari enadhela wa Mulugu, yeragana dhithu dhohogowa enere onyanyuweliwa ni owali wowopiha. 9 Athu aatene* enerana obure, obajha maJudewu vamodha ni aGerego enere okanna makathamiho ni enere osimwela; 10 mbwenye aatene yaale enerana dhithu dhapama, obajha maJudewu vamodha ni aGerego enere wakela nthithimiho, nriho ni murenddele. 11 Mwaha Mulugu kanna nsakulo.
12 Mwaha aatene yaale etheegile yahinna nlamulo enere okwa yahinna nlamulo, mbwenye aatene yaale etheegile eganonne nlamulo eneere otorihiwa ni nlamulo. 13 Eli owogowa vamentoni va Mulugu kahiyo ale eniwa Nlamulo, mbwenye ale eniwelela Nlamulo bili owogowa vamentoni vaye. 14 Mwaha athu a malogo ehinna nlamulo yeragana dhithu dhiniwanana ni nlamulo, athu yayo naarive ehinna nlamulo mwigumini mwewa, nlamulo newa thinenno. 15 Mweeddelo wewa onowoniha wi dhinawoga malamulo dhihilebiwa mmurimani mwewa, teto mubuwelo wewa onokalela onamoona dhinubuweliwa, mudhidhi mmodhave onowasumela teto onowawakihedha. 16 Eyo enaapadduwe labo Mulugu anadhiye atorihe dhithu dhoviteya enerana athu, wodhela Kiristu Yesu, mowiwanana ni muthenga wapama ginalaleyimi.
17 Mbwenye akala we ohuthukula ndina na muJudewu ororomelaga Nlamulo teto withukulagana Mulugu awo; 18 we ohunona efunelo Yaye ni onowanda opimelela dhithu dhapama mwaha ohudhihiwe ni Nlamulo; 19 akala ohukanna ebaribari wihina onowaweddiha aliba ohoona ni oli waara wa ale eli muyihini, 20 onowahudhiha athu ohunona, anamwani ni oohukanna enonelo yeebaribari enafwanyeya muwari mwa Malamulo; 21 mowindala we onaahudhiha athu amodha, ki weya kunihudhiha? We onalaleya wegihina: “Kuwiye,” kito we oniyela ddi? 22 We onawoga wegihina: “Kuraruwe,” kito onararuwela ddi? We onatakaleliwa dhikwamuthu dhosema, kito oniyela ddi mutempulu? 23 We onithukulana nlamulo, kunamunyemula Mulugu mwaha walupa malamulo? 24 Bumwahaya “ndina na Mulugu ninna onyemuliwa ni malogo mwaha weenyu” ninga dholebela dhinawogiwa.
25 Ebaribariya sowi, wineliwa* winakanna mabasa akala we onowakoya Malamulo, mbwenye akala onowalupa Malamulo wineliwa wawo kawinna mabasa. 26 Akala muthu oohineliwa onowawiwelela Malamulo aamatene owogowa enawogiwa, ohineliwa waye kunooniwege ninga muthu owineliwa? 27 Teto muthu yoole ahineliwe epaddi yomwiilini mbwenye awiwelelaga Malamulo, aneere wutoriha we omanle wineliwa ni wanonne Malamulo elebiwe wula wahavirihagamo. 28 Mwaha muJudewu kahiyo ole anoneya odeve wule baahi, teto wineliwa webaribari kahiyo womwiilinive baahi. 29 Mbwenye muJudewu eebaribari, anoneya murima waye teto wineliwa waye fwammurimani wodhela muzimu wotxena ohiya ni nlamulo noolebiwa. Othithimihiwa wa muthu yoyo onadhela wa Mulugu ohiya waathu.