Dhilebiwe ni Juwawu
13 Yesu ahinona wihina Mathanga a Paskwa ehinafiye, were ofiya mudhidhi wihina ahiye elabo ela ya vati ahogolowele wa Ababe. Mwaha odhivela anniyena ni anamaharaye yaali mwilaboni, oliye ahaadhivela ofiyedha omakuthulo. 2 Vano aliwa emujhaga jantari,* Ddiyabo ovolowa mmurimani mwa Judasi Iskariyoti mwaana Simawu wihina amugulihe Yesu. 3 Yesu ahinona wi Ababe yahinvaha dhithu dhaatedhene mmadani mwaaye. Teto ahinona wi adhile wa Mulugu ni eere ohogolowela wa Mulugu; 4 nuwindo, oliye ovenya vameza waarula malayaaye oode. Vano othukula tuwalya omagelela muyinuni. 5 Nuumala, waweka manjhe mbasiyani ni wambela wasuwana manyalo aanamaharaye ni wafufuthaga ni tuwalya naali mmwinuni mwaaye. 6 Nuwindo, ofiya mudhidhi wa Simawu Peduru. Oliye omukoha egihina: “Nabwiya, munere ogisuwa manyalo aaga?” 7 Yesu omwakula egihina: “Ethu ginerimina we kunoonelemo ovanene, mbwenye onere wonelamo osogolo.” 8 Peduru owoga ni Yesu egihina: “Nabwiya miyo kaginenye wihina mwaasuwe manyalo aaga.” Yesu omwakula egihina: “Miyo gaahasuwa manyalo awo, we kuli epaddi yaaga.” 9 Simawu Peduru omwakula egihina: “Nabwiya, ohiya ogisuwa manyalove baahi, mugisuwe madaaga ni muruya.”* 10 Yesu omwaddela egihina: “Muthu ahabile onoowomela ni kanahowela osuwa ethu emodha, ehili manyalo baahi. Nyu muhuwomela mbwenye kahiyo aatene.” 11 Mwaha oliye ahimunona muthu afuna omuguliha. Bumwahaya adhe awogege egihina: “Kahiyo wihina aatene nyu muhuwomela.”
12 Vano, Yesu nuumala wasuwa manyalo ewa ni wawara malayaaye oode, okarati vameza, nuwindo wakoha egihina: “Muhonelamo ethu guwerelimini? 13 Nyu munagithana ‘Namahudhiha’ ni ‘Nabwiya’ eyo ebaribari, dimiyene. 14 Akala miyo Nabwiya ni Namahudhiha gihasuwa manyalo enyu, ni nyunwa* musuwanege manyalo mmodha ni mukwaye. 15 Gihuhiyedhani mweeddelo, ninga guwerelimini, ni nyunwa mweregena emodhave. 16 Ginowuwaddelani ebaribari gegihina: Mudhaari kanamukwaranya nabwiye teto ole arumiwe kanamukwaranya ole amurumile. 17 Akala muhunona dhithu ndha, munere ohagalala mwaparihedhaga mabasa. 18 Kaginawoga wodhela nyu aatene; mwaha gihanona gaasakunlimi. Mbwenye wihina yakwanele yolebela ela enawoga yegihina: ‘Ole ajha ni miyo ohugisadduwela.’* 19 Ginowuwaddelani dhithu ndha ovanene dhihinathi opadduwa wihina dhereya mubuwele wi dholebela ndha dhawoga wodhela miyo. 20 Ginowuwaddelani ebaribari gegihina: Anamwakela mmodha wa athu yaala ginaarumimi anagakela ni miyoya teto ole anagakela miyo anamwakela Nuleya agirumile.”
21 Numala wawoga madhu ala, Yesu wukuuwa vanlubale ni owoga egihina: “Ginowuwaddelani ebaribari: Mmodha wa nyu aneere ogiguliha.” 22 Anamaharaye wambela osugwana mmodha ni mukwaye, yahimunonaga baani waaliwa amwagiyena. 23 Mmodha wa anamaharaye, yoole Yesu athabwiye omudhivela, aakaratile waddamela ni Yesu. 24 Nuwindo, Simawu Peduru omutonya ni musolo namahara ole ni owoga egihina: “Akala ohumunona muthuya anamwagiyena kanaddele.” 25 Vano, namahara ole omwaddamela Yesu ni omukoha egihina: “Nabwiya, muthu yoyo baani?” 26 Yesu omwakula egihina: “Duule ginaanvahimi pawu ginafunimi obwiniha mutijelani muna.” Nuubwinihamo, akumihagamo onvaha Judasi, mwaana Simawu Iskariyoti. 27 Judasi numala wakela pawu ele, Saddana onvolowela. Nuwindo, Yesu omwaddela egihina: “Werena mowaguva ethu onafuniwe werana.” 28 Mbwenye, kaavo muthu aakaratile vameza vale oonelemo mwahaya bwaddi adhe awogege ndale. 29 Woona wihina Judasi dasamalela kaxa mwavokedhiwa korowa, amodha yubuwela wihina Yesu eera omwaddela wi “agule dhithu dhahoweleya vamathangani vale” obe aavahe ethu-sithu aliba ohaawa. 30 Vano, Judasi nuwakela pawu ele, vohilegela oliye ovenyavo. Waali mudhidhi wa mahiyu.
31 Nuwindo, oliye nuvenyavo, Yesu owoga egihina: “Vano, Mwaana Muthu aneere othithimihiwa teto Mulugu aneere othithimihiwa mwaha woliye. 32 Mwinnyene Mulugu aneere omuthithimiha ni aneere werana ndo mowaguva. 33 Anaaga, mudhidhi ogihalele wokala ni nyu kahiyo munene. Nyu munere ogisayela, mowindala ninga gawaddelimi maJudewu, ni nyuwa ginowuwaddelani ethu emodhave gegihina: ‘Mburo ginayimiwo, nyu kamunande ogihara.’ 34 Ginowuvahani nlamulo nixa: Mudhivelanege mmodha ni mukwaye; ninga guudhivelimini, mudhivelanege ndala. 35 Mowindo, athu aatene enere onona wi muli anamahara aaga: mwadhivelanaga mmodha ni mukwaye.”
36 Vano, Simawu Peduru omukoha egihina: “Nabwiyani, munaya waani?” Yesu omwakula egihina: “Mburo ginayimiwo kunagihare ovanene, mbwenye osogolo onere ogihara.” 37 Peduru omukohave egihina: “Nabwiya, gahinuhareleni ddi ovanene? Miyo ginere opeleka egumaaga* mwaha wa nyu.” 38 Yesu omwakula egihina: “Onere opeleka egumawo* mwaha wa miyo? Ginowuwaddela ebaribari: mutubi kanunle wahigikoddile dila tharu.”