Ovuhulela wa Juwawu
5 Miyo omoona Ole akiratile vampaddoni va omwene agaaparele rolu yalebiwe dhipaddi dhabilidhene ni egaafugiwe pamadhene ni selu dhowakwana 7. 2 Ohiya eyo, gahimoona mungero a kopolo awogaga ni ndhu nootama egihina: “Baani anafwanelela ofugula rolu ni otapula seludha?” 3 Mbwenye kaaliwo newene muthu mmodha odhulu, elabo yavati newene vati va thaya aanda ofugula obe woona ethu yaalebiwe muroluni mune. 4 Miyo wambela wunla vanlubale, mwaha kooniwe muthu oofwanelela ofugula obe woona ethu yaalebiwe muroluni mune. 5 Mbwenye, namaholela mmodha ogaddela egihina: “Kuwunle, kamaala. Kasugwa! Poddogoma a nihimo na Juda, a emudhi ya Davidi, ohugonjhiha ni aneere wanda ofugula rolu vamodha ni seludha 7.”
6 Teto miyo gahoona mwana nimbila nakala ninga nere opiwa nigimenle vaari va mpaddo woomwene, vaari va angero ale annayi ni vaari va anamaholela, mwana nimbila nno nahikanna manyaga owakwana 7 ni mento owakwana 7. Mento ale, enatapulela muzimu 7 dha Mulugu dhirumiwe waapela elabo yaatene yavati. 7 Vohilegela, nimbila nne odhowa othukula rolu yaali moono woojha wa Mulugu yoyo aakiratile vampaddoni voomwene. 8 Oliye nuthukula rolu, angero ale annayi vamodha ni anamaholela ale 24 okokora vamentoni va mwana nimbila; kadda namaholela ahikanna bangwe ni pusulano* na woru mwadhaanle insensu. (Insensu, enatapulela malobelo aathu yaale eli oweela.) 9 Ni enowiiba jhibo exa, yegihina: “Nyu dinafwanelela othukula rolu ni otapula seludha, mwaha mwahipiwa teto nnikame nenyu, muhumugulela Mulugu athu amahimo maatene, dhiwogelo, malogo ni athu a elabo yaatene, 10 teto muhathoma wihina ekale mamwene ni anamakutha a Mulugu ehu, enathongege elabo yavati.”
11 Miyo osugwa, ni wiiwa ndhu na angero owinjhiva egaapeele mpaddo woomwene vamodha ni angero ale annayi ni anamaholela. Winjhiva wa angero ayo waali matxikwi ni matxikwi mbwabwadda ni mbwabwadda, 12 aliwa yowoga ni ndhu nootama yegihina: “Mwana Nimbila naapiwe thinafwanelela waakela owedha, dhoreela, thotho, kopolo, nriho nthithimiho ni mareeliho.”
13 Nuwindo, miyo woona dhopaddusiwa dhaatedhene dhoodhulu, dha veelaboni yavati, dha vati veelabo, dha muniya ni dhithu dhaatedhene dhinakalamo dhegihina: “Mulugu akiratile vampaddoni voomwene ni Mwana Nimbila, yawakele mareeliho, nriho, nthithimiho ni kopolo dha mukalakala.” 14 Angero ale annayi yowakulela yegihina: “Amem!” Nuwindo anamaholela okokora ni omwebedha Mulugu.