Dhilebiwe ni Matewuji
12 Labo dhaala na Sabadu, Yesu ovira mmunddani mwa tirigu. Anamaharaye ovoliwa vano wambela onvulula tirigu emutakunaga. 2 Afarizewu nuwoona ele yapadduwa aliwa owoga ni Yesu yegihina: “Kasugwa! Anamahara awo enna werana yeele ehinarumedhiwa werana labo na Sabadu.” 3 Oliye wawakula egihina: “Nyu kamunilerigi ele Davidi eriliyena alobwanaye nuvoliwa dala? 4 Oliye vamodha naalobwanaye, kayavolowile nyumba ya Mulugu etakuna pawu dhotaleleya,* ethu yakoddihiwiwa otakuna, newene Davidi newene ale yaali vamodha nuliye, mbwenye anamakutha baahi? 5 Obe kamwawileri Malamulo enihina ni maSabadu anamakutha a mutempulu enolupa Nlamulo na Sabadu mbwenye kinathega? 6 Mbwenye ginowuwaddelani wihina vala vihikala muthu munlubale okwaranya tempulu. 7 Mowindala mwahere mwawonelagamo madhu ala enatapuleliwa: ‘Ginafuna thagaraga ohiya mukutho,’ kamwatorihege athu ehinna muladdu. 8 Mwaha Mwaana Muthu di Nabwiya a Sabadu.”
9 Nukuma mburo yoole ovolowa musinagoga mwewa, 10 onfwanya mulobwana dhaala anna nlada noragala. Vano wihina emwinkedhe aliwa omukoha yegihina: “Enowenyeya onvulumusa muthu labo na Sabadu?” 11 Oliye wawakula egihina: “Ahere mmodha wa nyu akanna nimbila, vano nimbila nno omorela mmuliddini labo na Sabadu, gerege mwaahiye mommo kamwavenyihemo? 12 Kito muthu nnimbila, anna thima baani? Bumwahaya enowenyeya werana ethu yapama labo na Sabadu.” 13 Vano oliye owoga ni mulobwana ole egihina: “Katapula nlada nawo.” Vano oliye nutapula nlada nne, woogowa oliganaga ni nlada nimodha. 14 Mbwenye Afarizewu okuma, wambela ompanganela wihina empe. 15 Yesu nunona, oliye ovenyavo mburo yoole. Vano athu owinjhiva omuharaga ni wavulumusa aatene, 16 mbwenye wakongomedha pamadhene wihina ehimulaleye, 17 wihina yakwanele madhu a namavuhulela Izayiya enawoga yegihina:
18 “Kamusugweni mudhaari aaga gimusakunlimi, ginamudhivelimi ni ginamurumedhimi!* Muzimu waga onaakale nuliye, ni aneere wawonelihamo malogo ele eli yapama. 19 Kanaakangane ni muthu newene okuwa, ni kaavo anaavuruwane ndhu naye murampani. 20 Kanadha atatakanya mutati omanle okothowa, newene kanadha athimiha panti enakuma mwiisi, ofiyedha odhana wogowa. 21 Mwebaribarene malogo enere okanna ejhehedhelo mwaha wa ndina naye.”
22 Nuwindo, odhiwana mulobwana dhaala oohoona ni oohuwoga, oonihiwa goyi naademoniyu, oliye onvulumusa, vano mulobwana ole wambela owoga ni woona. 23 Mwaha wa yeyo, muthithi waathu waali vevale otikina ni wambela owoga wegihina: “Ola kahiyo yoole Mwaana a Davidi?” 24 Mbwenye afarizewu nuwiwa owoga yegihina: “Mulobwana ola anawigara ademoniyu ni kopolo dha Belzebu,* namathonga aademoniyu.” 25 Nunona mubuwelo wewa Yesu wawaddela egihina: “Omwene waatene onagawanyeya kunatikitereya teto sidadi obe nyumba enagawanyeya kinanda okala yowimelene. 26 Nimakalelo mamodhave, akala Saddana anomwigara Saddana mukwe, eyo enatapulela wihina ohugawanyeya. Kito omwenaye onandeye addi okala wotikitereyene? 27 Ohiya eyo, akala miyo ginowawigara ademoniyu ni kopolo dha Belzebu, aninyu enawigara ni kopolo dhawani? Bumwahaya aliwa enere wutorihani. 28 Mbwenye akala miyo ginawigara ademoniyu ni kopolo dha Mulugu, mwebaribarene Omwene wa Mulugu ohufwanyani. 29 Obe enandeye addi omwiiyela muthu akopolo dhoreela dhaye ohurajhihe ommaga? Vano werana ndo onere wanda omwiyela. 30 Ole ahili epaddi yaaga ali wolapela nimiyo, ole ahinalaba nimiyo wihina aadhena athu wa miyo diyoyo anaamwadha athuya.
31 Mowindala, ginowuwaddelani wi: Athu podi werana dhoothega dhaatedhene ni oruwana dhithu dhotaleleya enere oleveleliwa, mbwenye ole anathegela muzimu wa Mulugu kanaaleveleliwe. 32 Motajhiha, ole anaamuwoge obure Mwaana Muthu aneere oleveleliwa, mbwenye ole anaawoge obure muzimu wotxena kanaaleveleliwe, newene elabo yeela* newene osogolo.
33 “Nyu mwadhala muthanko wapama, dhowimmadha dhinakala dhapama, mbwenye mwadhala muthanko wabure, dhowimmadha dhinakala dhabure. Muthanko onanoneya wodhela dhowima dhinavahiwa. 34 Nyu odhulu weevili, munande addi owoga dhithu dhapama wula mugaali athu abure? Mwaha mulomo onawoga dhendhe dhinakuma vati va murima. 35 Muthu apama anokumiha dhoreela dhapama mmurimani mwaaye, mbwenye muthu abure anokumiha dhithu dhabure mmurimani mwaaye. 36 Miyo, ginowuwaddelani wi Labo Nootorihiwa athu enere wakulela mwaha wawoga madhu ohukanna mabasa; 37 mwaha wa madhu awo onere wooniwa ninga muthu apama ni onere otorihiwa.”
38 Mwaha wa yeyo, anamaleba amodha ni afarizewu omuloba yegihina: “Namahudhiha* nnafuna munoonihe yintelelo yenyu.” 39 Oliye wawakula egihina: “Nlogo nabure ni nohuroromeleya munaveda wonihiwa yintelelo, kamunonihiwe yintelelo ehili yintelelo ya Jonasi, namavuhulela. 40 Nimakalelo mamodhave, Jonasi aaliye mbani mwa oba yinlubale malabo mararu mutana ni mahiyu, ndo Mwaana Muthu aneere okala mmahame, malabo mararu, mutana ni mahiyu. 41 Labo Nootoriha, athu ooNinive vamodha ni nlogo nna, enere ovenya wi yaatorihe, mwaha Jonasi nuwalaleya aliwa yahithwaruwa. Mbwenye vala ohukalavo muthu munlubale omukwaranya Jonasi. 42 Labo nootoriha, musano oomadhelo nduwa aneere ovenya vamodha ni nlogo nna wihina yaatorihe, mwaha oliye adhile wolapelawene wihina avuruwane thotho dha Salomawu. Mbwenye vala ohukalavo muthu munlubale omukwaranya Salomawu.
43 “Muzimu wabure wakuma mmwiilini mwa muthu, onoovira mburo dhowumma muhili manjhe osayelaga vokalavo, mbwenye kunafwanya mburo. 44 Vano onowoga wegihina: ‘Ginohogolowela vaade vaga vevale gitamilimivo’ vano wafiya anofwanya vaadeva vihikaliwaga, vigaxeliwe ni vigawomihedhiwe. 45 Mowindala onodhowa ni odhana muzimu 7 dhowopiha omukwaranya oliye, yera ndo enovolowa okalaga mwemmo; vano omakuthulo wa muthu yoyo winere othabwa okwaranya omambelelo. Siyeyo enafuna wereya ni nlogo nna nabure.”
46 Awogagave ni muthithi ole waathu, amaye vamodha ni addibile wimela ode omujhehaga wihina ewoge nuliye. 47 Nuwindo muthu dhaala omwaddela egihina: “Nabwiya! Amaminyu vamodha naaddibilinyu eli ode wula enafuna ewoge ni nyu.” 48 Oliye omwakula egihina: “Ammaga baani ki addibilaga baani?” 49 Nuwindo, watapulela nlada anamahara aye ni owoga egihina: “Ammaga naaddibilaga biyala! 50 Bumwahaya ole anerana efunelo ya Ababa eli odhulu, oyo di ddibilaga, di murogolaga ni bammaga.”