Dhilebiwe ni Lukaji
10 Nuwindo, Nabwiya wasakula athu amodha 70 ni waruma abiili abiili osogolo waye wihina edhowe sidadi dhaatedhene ni murudda afuniye odhowawo. 2 Voharela Yesu wawaddela anamahara aye egihina: “Mwebaribarene mabasa ala oohadda ehinjhiva. Mbwenye anamalabaya kahiyo anene. Bumwahaya, mmulobe mwinnya a munddaya wihina aarume anamalaba amodha edhe ehaddege. 3 Kadhowani! Miyo ginowurumani ninga mambila vaari va mwiijhi. 4 Kamuthukule thumba na korowa newene thumba na dhoojha newene sandaliya, mwanfwanya muthu mudila newene kammulojhele. 5 Nyumba si nyumba munafiyinyu muwoge mwegihina: ‘Murenddele okale ni nyu.’ 6 Mwanfwanya muthu a murenddele, murenddele weenyu okale nuliye. Mbwenye ahikalavo, murenddele weenyu, wuhogoloweleni. 7 Mwindo, mukale vaade venvo mung’waga, ni mujhaga dhithu enuvahegiwani, mwaha namalaba anofwanelela wakela analabeliye. Kamutamege nyumba ni nyumba bure-bure.
8 “Ohiya eyo, sidadi si sidadi munafiyinyu, athuya yuwakelani mujhege dhithu enuvahigiwani 9 yakalavo aredda mwavulumuse ni muwoge mwegihina: ‘Omwene wa Mulugu oli vowaddamela ni nyu.’ 10 Mbwenye, sidadi si sidadi munafiyinyu athuya yahuwakelani nvenyemo musidadimwa, muddemulele murampani ni muwoge mwegihina: 11 ‘Iyo nnere watata manyalo ehu ebandile nthubi na sidadi yenyu wihina okale onamoona weenyu. Teto munone wihina Omwene wa Mulugu ohaddamela.’ 12 Miyo ginowuwaddelani wihina labo nenno makathamiho enafuna okumelela enere wakwaranya makathamiho yanfwannye sidadi yoSodoma.
13 “Ginowuweddela thagaraga Korazi! Ginowuweddela thagaraga Betizayida! Mwaha matikiniho manlubale yereye elabo yenyu, yahereye kale oTiru ni oSidoni, aliwa yeere othwaruwa yaware masakwi ni yidholihe nddora. 14 Bumwahaya, labo nootoriha, makathamiho enafuna wufwanyani enere wakwaranya makathamiho enafuna okanna Tiru ni Sidoni. 15 Ni nyuwa akudda Kafarnawu, munubuwela wihina nthithimiho nenyu thithabwile okala ninlubale ofiyedha odhulu? Bumwahaya munere ovuheeliwa mmahame!*
16 “Ole anuvuruwanani anagivuruwana ni miyoya. Teto ole anulamusani anagilamusa ni miyoya. Ohiya eyo, ole anagilamusa, anamulamusa Nuleya agirumile.”
17 Athu ale 70 ohogolowa oohagalalene ni owoga yegihina: “Nabwiya, naademoniyuya enoniwelela mwaha olabihedha ndina nenyu.” 18 Nuwindo, oliye owoga naliwa egihina: “Ginomoona Saddana agamothile odhulu ninga dari. 19 Nvuruwane: Miyo gihuvahani owedha wonyingalana nowa ni awalize, ni kopolo dhaatedhene dhowagonjhihana amwiddani, teto mwebaribarene kaawo ethu yabure enuwereyeleni. 20 Mowindo, kamuhagalale mwaha ademoniyu wuwiwelelagani, mbwenye muhagalale mwaha mandina enyu ehilebiwa odhulu.” 21 Mudhidhi yoole oliye ohagalala vanlubale mwaha wa muzimu wotxena ni owoga egihina: “Babani miyo ginowuthithimihani vaari vaathu aatene, Nabwiya oodhulu ni eelabo yavati, mwaha muhakuwa dhithu ndha athu eenonelo ni athotho, mbwenye muhawaddela ahima. Hee Babani, mwaha nfunne wihina dhithudha dhereye ndala. 22 Ababa ehigivaha dhithu dhaatedhene. Kaawo muthu amunonne pamadhene Mwaana, ehili Ababa; teto kawo aanonne pamadhene Ababa ahili Mwaana naale Mwaana anafuniye wawaddela.”
23 Nuwindo, oliye orugunuwa wasugwa anamahara aye ni egaalivo yekiwa wawaddela egihina: “Oohagalala bi mento enyu enoona dhithu ndha munooninyu. 24 Bumwahaya ginowuwaddelani gegihina: “Anamavuhulela owinjhiva ni mamwene yofuna woona dhithu ndha munooninyu, mbwenye kayonile ni yofuna wiiwa dhithu ndha muniwinyu mbwenye kayiwale.”
25 Vano, mulobwana dhaala aaxagenle Malamulo ovenya wihina amwehe ni omukoha egihina: “Namahudhiha, gere ddi wihina gaakele egumi yohimala?” 26 Oliye omukoha egihina: “Malamulo enawoga ddi? Ki we onawileri aavi?” 27 Mulobwana ole waakula egihina: “‘Omudhivelege Yehova* Mulugu awo ni murima wawo waatene, emuthu yawo yaatene,* kopolo dhawo dhaatedhene, mubuwelo wawo waatene’ ni ‘omudhivelege mwanddamanaawo ninga onidhiveliwe.’” 28 Yesu omwaddela egihina: “Ohakula pamadhene; odidele werana yeyo onere okanna egumi.”
29 Mbwenye, avedaga okala muthu owogowa,* mulobwana ole omukoha Yesu egihina: “Mwanddamani aaga baani?” 30 Yesu omwakula egihina: “Mulobwana dhaala akuma oJeruzale adhowaga oJeriko, vano ohiddiwa ni ambava, omwaaka dhithu dhaye dhaatedhene, omuukutha. Omuhiya neena nuukwa, aliwa odhowaga. 31 Mbwenye moliganyedha, namakutha dhaala avira dila yeele, numoona oliye ovira nikukuru odhowaga. 32 Wereya emodhave ni muLevita, nufiya mburo yoole, vano numoona, ovira nikukuru oliye odhowaga. 33 Mbwenye, musamaritano dhaala aali mulenddoni, onfwanya, numoona oliye omweddela thagaraga. 34 Oliye omwaddamela ni ompotha makwaddayeya, adholihaga makura ni vinyu. Nuwindo, oliye omugweliha va mwanenyamani vaye, omuthukulela nyumba dhaala enakeliwa aleddo, oliye omusamalela. 35 Labo noharela, oliye okumiha korowa biili dha denariyu,* onvahedha mwinnya nyumba ele yaaleddo ni omwaddela egihina: ‘Omusamalelege, dhithu dhaatedhene onanongiwe, ginere wuliva gahogolowa.’ 36 Mwa athu yaala araru baani atonyihedhile okala mwanddamani amulobwana ole aafwanyiwe ni ambava?” 37 Mulobwana ole omwakula egihina: “Duule amweeddele thagaraga.” Nuwindo, Yesu owoga egihina: “Kadhowa weregena emodhave.”
38 Edhowagave ofiya murudda dhaala. Wewule onfwanya muhiyana ithaniwa Marta, oliye omwaakela ninga muleddo vaade vaye. 39 Marta ahikanna ddibile ithaniwa Mariya, aakiratile omweddoni wa Nabwiya ni onvuruwanaga awogiye.* 40 Marta aali oothuwathuwene egeredhaga dhithu dhowinjhiva. Mowindo oliye omwaddamela Yesu ni owoga egihina: “Nabwiya, kamunapwatha ddibilaga ogihiya meeka gegeredhaga dhithu ndha? Kamwaddeleni adhe agikavihere.” 41 Nabwiya omwakula egihina: “Marta, Marta, ohuthabwa othuwathuwela dhithu dhowinjhiva. 42 Dhithu dhing’onove dhihakwana obe ethu modha baahi. Mbwenye Mariya disakunle epaddi yapama, ela kaavo muthu anamwaakihe.”