Dhilebiwe ni Matewuji
23 Vano Yesu owoga ni muthithi waathu vamodha ni anamahara aye egihina: 2 “Anamaleba vamodha ni Afarizewu ehikarati mburo wa Moyizeji. 3 Mowindala, dhithu dhaatedhene enuwaddeliwani, mweregena ni mparihedhege mabasa, mbwenye kamwatajhihe aliwa mwaha aliwa enonne owogave baahi, kinerana dhithudha enawogiwa. 4 Enoomaga mutholo dhonyemela wakapathiha athu amodha, mbwenye aliwaya kinanda newene osusiha ni embuno. 5 Mabasa aamatene enaapariwa enaapara wihina yooniwe ni athu, bumwahaya enowunnuwiha kaxa dhewa dha dholebela enawariwa ninga yowibarela ni enowalapiha malayiwa. 6 Yakala mmathangani ni mmasinagoga enadhiveliwesesa okarati mburo dhoobajha ni dhathima,* 7 enodhiveliwa olojheliwa yakala vamerkado, ni yithaniwaga ni athu amodha Rabi.* 8 Mbwenye nyu kamwithaniwege Rabi,* mwaha aliwo Namahudhiha mmodha baahi, teto aatene nyu muli oddibila. 9 Ohiya eyo, kammwithane muthu di muthu mwilaboni yavati Baabi, mwaha Baabinyu ali mmodha baahi, oodhulu. 10 Munaadhe mwithaniwa namasogolela, mwaha namasogolela enyu di Kiristu baahi. 11 Mbwenye munlubaleya vaari veenyu akale mudhaariya. 12 Muthu yoole anithukulele aneere ototiwa manyazo mbwenye ole aniyevihe aneere wunnuwihiwa.
13 “Ginowukubanyedhani anamaleba ni afarizewu, anamaleketha nyu! Mwaha munowabarela athu wihina enavolowe Mumweneni wodhulu teto munowabarela athu enasayela wihina evolowe. 14* ——
15 “Ginowukubanyedhani anamaleba ni afarizewu, anamaleketha nyu! Nyu munowedda niya ni elabo yaatene wihina mmusayele muthu avolowe munikuruni mwenyu, obe akale muJudewu vano mwanfwanya munomusaddula okala muthu anafwanelela otolosiwa oJhehena,* dila biili othabwa wupithani nyu.
16 “Ginowukubanyedhani nyu anamaholela oohoona, munawoga mwegihina: ‘Muthu alibelela tempulu, kahi ethu; mbwenye muthu alibelela woru ya mutempulu oliye anofwanelela wakwaneliha ele alibeliye.’ 17 Ataduwanyu ni aliba oohoona! Mwebaribarene, eli yinlubale ddi: si woru obe tempulu enatxeniha woruya? 18 Ohiya eyo, nyu munowoga mwegihina: ‘Muthu amulibelela altare kahithu; mbwenye alibelela nvaho yoole oliye anofwanelela wakwaneliha yeele alibeliye.’ 19 Aliba ohoona nyu! Eli enlubale ddi: bu nvaho obe di altareya anatxeniha nvahoya? 20 Mowindala, anamulibelela altare, kanamulibelela altareve mbwenye dhithu dhaatedhene dhili vaaltareni; 21 teto ole analibelela tempulu kanalibelela tempuluve baahi mbwenye anamulibelela Nuleya anakala mwemune; 22 ole analibelela odhulu analibelela mpaddo wa Mulugu Nuleya akaratele mpaddoya.
23 “Ginowukubanyedhani anamaleba ni Afarizewu, anamaleketha nyu! Mwaha munonvaha neekumi a ortela, a endro ni a kominyu, mbwenye munolamusa dhithu dhathima dhinawoga Malamulo, oli wogowa, thagaraga ni ororomeleya. Ndha sidhithudha dhahoweleya nyu werana mbwenye munolamusa dhithu dhimodha. 24 Anamaholela oohoona, nyu munovenyihamo embu yamorela nvinyuni mbwenye kamelu munammidha anterwene.
25 “Ginowukubanyedhani anamaleba ni Afarizewu, anamaleketha nyu! Mwaha munasuwa kopo ni parato odeve, wula mmurimani mwenyu mugadhanle dhithu dhonyakavala mwaha muhuthabwa okanna nrima. 26 Nfarizewu oohoona, obajhe ofufutha muwari mwa kopoya ni mparatonimwa wihina odewa wiwomele.
27 “Ginowukubanyedhani anamaleba ni Afarizewu, anamaleketha nyu! Mwaha munakala ninga mahame oopintariwa, enawoma odeve wule baahi mbwenye muwarimwa mugadhanle makuva aanookwa ni dhithu dhaatedhene dhonyakavala. 28 Nimakalelo mamodhave mwakala vaari vaathu munakala ninga athu owogowa mbwenye muwarimwa mugadhanle oleketha ni dhithu dhaatedhene dhabure.*
29 “Ginowukubanyedhani anamaleba ni Afarizewu, anamaleketha nyu! Mwaha munowamaga mahame* aanamavuhulela ni munowawomihedha mahame aathu owoogowa, 30 ni munowoga mwegihina: ‘Malabo amakolo ehu nahere nikalawo kanakavihere okuthula nikame naanamavuhulela.’ 31 Mowindala nyu munowivaha onamoona wowihina muli ahima aathu yaale ekuthunle nikame naanamavuhulela. 32 Woona wi dhereye ndo kaamariheni mabasa yahamarinhe makolo enyu.
33 “Nowa nyu, odhuulu weevili, munande addi othawa otoriheliwa oJhehena?* 34 Siyela enagithukulela waruma anamavuhulela, athu athotho ni anamahudhiha. Amodhaya nyu munere waapa ni mwakomele vantxikwani, mbwenye amodha munere wawukutha mmasinagoga mwenyu ni mwaharahare sidadi ni sidadi, 35 wihina muthukule nibili na nikame naathu owoogowa nikuthuliwe vati wambela muthu owoogowa Abeli ofiyedha nikame na Zakariya mwaana a Barakiya ole mumpilinyu vaari va santuwariyu ni altare. 36 Miyo ginowuwaddelani ebaribari: Dhithu dhaatedhene ndha dhinere opadduwa ni nlogo nna.
37 “Jeruzale, Jeruzale, onaapa anamavuhulela ni onaapwesa ni mabwe ale enarumiwa — dila ngasi gisayelimi makalelo owatugumanya aninyu ninga mwanaku anaakubaarela anaaye mukapwani mwaaye! Mbwenye nyu kamufunne. 38 Vano Mulugu aneere onyanyala nyumba yenyu. 39 Bumwahaya ginowuwaddelani gegihina: Obajha peeno odhowa osogolo kamunadha mugoonaga, ofiyedha labo munadhinyu muwoga mwegihina: ‘Oothithimihiwa duule anadha ni ndina na Yehova!’”*