Dhilebiwe ni Matewuji

9 Nuwindo oliye ogwela mmwanddeyani, wabuwela kobela emodha ni odhowa sidadi aabaliwiye. 2 Vohilegela, aliwa omudhana mulobwana dhaala ooragala agaali vamaakani.* Nuwoona nroromelo yanniwana, Yesu owoga ni muliba oragala ole egihina: “Olibe murima, mwanaga! Dhoothega dhawo dhihimala oleveleliwa.” 3 Mwaha wa yeyo anamaleba amodha wambela onog’ona yegihina: “Mulobwana ola onomunyemula Mulugu.” 4 Yesu nunona dhithu yubuweliwa oliye owoga egihina: “Mwahaya bwaddi mugubuwela dhithu dhabure mmurimani mweenyu? 5 Motajhiha, enakweya owoga ddi: ‘Owoga wihina dhoothega dhawo dhihileveleliwa’ obe: ‘Kavenya weeddege’? 6 Vano wihina munone wi Mwaana Muthu ohuvahiwa kopolo yolevelela dhoothega elabo yavati . . .” oliye owoga ni muliba oragala ole egihina: “Kavenya, kaathukule maakaawo odhowege vaade vawo.” 7 Nuwindo, oliye ovenya odhowaga vaade vaye. 8 Muthithi ole waathu nuwoona yapadduwe wambela woova ni omuthithimiha Mulugu, ole avahile kopolo ndho athu.

9 Voharelava ahinasuse, Yesu omoona mulobwana dhaala ithaniwa Matewuji agakaratile akukusaga musoko, Yesu owoga nuliye egihina: “Okale namahara aaga.” Nuwindo oliye ovenya omuharaga. 10 Voharela Yesu ajhaga* vaade va Matewuji ofiya anamakukusa musoko ni anamathega owinjhiva wambela ojha* ni Yesu vamodha ni anamahara aye. 11 Mbwenye afarizewu nuwoona ele yapadduwa wakoha anamahara aye yegihina: “Namahudhiha* enyu anajhela ddi ni anamakukusa musoko ni anamathega?” 12 Yesu wawiwa ni owoga egihina: “Athu agumi kinamuhoowela mediku, mbwenye aredda binamuhoowela. 13 Mowindala, kadhowani mwaahudhere* madhu ala enatapuleliwa: ‘Ginafuna thagaraga, ohiya mukutho.’ Mwaha miyo kagidhele wawithana athu owogowa mbwenye athu oothega.”

14 Vano, anamahara a Juwawu omwaddamela ni omukoha yegihina: “Iyo ni afarizewu nnothuga, ki anamahara awo ehinathugela ddi?” 15 Yesu wakoha egihina: “Akwaye anamatela enokala owukuwene wula egaali vamodha nnamatelaya? Mbwenye enere ofiya malabo namatela ole ahinakaliye vamodha naakwaye, malabo yaayo aliwa enere othuga. 16 Kaavo anatxapela guwo yoodduwa ni esala exa, mwaha esala exa enere oweta guwo yoodduwa, vano otaleyawa winere othabwa. 17 Emodhave, kinenyeya omuthukula vinyu muxa omweeka thumba noodduwa. Yereya ndo thumbana nnotala, vinyuya orahiya vano thumbana kannakanna mabasa. Mbwenye anathukuliwa vinyu muxa weekiwa thumba nixa, yereya ndo dhabilidhene dhinere okoyeya pama.”

18 Yesu awogagave, namaholela dhaala aamwaddamele okokora vamentoni vaye* egihina: “Podi wera vano mwanaga mwanamuhiyana ohumariheya, mbwenye ndoweni mwamutapulele nlada nenyu wihina oliye ahogolowele okalawo.”

19 Nuwindo Yesu ovenya ni anamahara aye omuharaga. 20 Vohilegela, ofiya muhiyana dhaala amanle yaka 12, oonaga goyi mwaha wogonamo ahikumagamo, vano oliye waddamela odduli wa Yesu ohidda nipiyo* na yowara yaye, 21 mwaha oliye owubuwela mmurimani egihina: “Ginohidda yowarave ele baahi ginere ovulumuwa.” 22 Yesu orugunuwa, numoona owoga egihina: “Olibe murima mwanaga! Nroromelo nawo nihuvulumusa.” Wambela mudhidhi yoole muhiyana ole ovulumuwa.

23 Nufiya vaade va namaholela ole amusinagoga, wawoona aliba wooba palaza ni muthithi waathu wunlaga, 24 Yesu owoga egihina: “Kakumani, mwaha mwananamwali ola kakwile mbwenye onoogona.” Mwaha wa yeyo aliwa wambela omuteya monyemula. 25 Muthithi ole waathu nukumela ode, Yesu ovolowa ohidda nlada na mwananamwali ole vano oliye ovenya. 26 Yopadduwa ele, ovuwa murudda watene.

27 Yesu amaruwagawene, alobwana abiili ohoona omuharaga ni emwithanaga yegihina: “Mwaana Davidi, kaneddeleni thagaraga.” 28 Yesu nuuvolowa mba, alobwana ale abiili ohoona naaliwaya ovolowa, vano Yesu wakoha egihina: “Nyu muhukanna nroromelo wihina miyo ginere werana munalobinyu? Aliwa omwakula: “Hee, Nabwiya.” 29 Nuwindo wahidda mentwiwa ni owoga egihina: “Yereye mowiwanana ni nroromelo nenyu.” 30 Vano mentwiwa ofuguwa wambela woona. Ohiya eyo, Yesu wakongomedha egihina: “Pole-pole munamwaddele muthu.” 31 Mbwenye nuvenya vevale aliwa wambela ovuwiha murudda waatene ndhe Yesu awereliye.

32 Teto amaruwaga wihina adhowege, ofiya athu amodha yamudhana mulobwana oohuwoga, mwaha onihiwa goyi ni demoniyu; 33 vano nuumwigara demoniyuule, mulobwanoole oohuwoga, wambela owoga. Mwaha wa yeyo, muthithi waathu waali vevale otikina ni owoga yegihina: “Wizarayeli kinereyege ethu yooligana ni yeela.” 34 Mbwenye afarizewu yawoga yegihina: “Namathonga aademoniyu* dinamukavihera wawigara ademoniyu.”

35 Yesu wambela weedda sidadi dhaatedhene aahudhihaga* musinagoga mwewa, alaleyaga muthenga wapama wa Omwene aavulumusaga athu aatene yanna dhiredda ni makathamiho ohiyana-iyana. 36 Nuwoona muthithi waathu, oliye wambela waweddela thagaraga, mwaha yaali oosimwelene ni yeedda bure-bure ninga mambila ehinna namakukula. 37 Nuwindo, Yesu wawaddela anamahara aye egihina: “Mwebaribarene mabasa ala oohadda ehinjhiva, mbwenye anamalabaya kahiyo anene. 38 Bumwahaya mmulobe mwinnya a munddaya wihina aarume anamalaba amodha edhe ehaddege.”