Dhilebiwe ni Lukaji
7 Numala owoga ni muthithi ole waathu, oliye odhowa murudda woKafarnawu. 2 Wengo ahikalawo mudhaari dhaala anamasogolela aanyakoddo aali muredda vanlubale, ahanle neena nuukwa; nabwiye oomudhivela vanlubale mudhaari yoole. 3 Namasogolela aanyakoddo nuwiwa owoga wodhela Yesu, waruma anamaholela angasi-angasi a muJudewu wihina yamulobe adhe anvulumuse mudhaari aye. 4 Aliwa nunfwanya Yesu wambela ompigireyela yegihina: “Oliye anunlela nikavihero nenyu Nabwiyani, 5 mwaha oliye onodhivela nlogo nehu teto ohunimagela sinagoga yehu.” 6 Nuwindo, Yesu odhowa naliwa. Mbwenye, yaddamelaga vaade vaye, namasogolela ole aanyakoddo waruma akwaye wihina yamwaddele yegihina: “Nabwiyani, kamuthuwathuwe, mwaha kagifwanelele wuwakelani vaade vaaga. 7 Bumwahaya gidhe giwonege wihina kagifwanelele odha ogumana ni nyu. Mbwenye mwawoge madhuve baahi, mudharaaga aneere ovulumuwa. 8 Mwaha ni miyoya ginothongiwa ni gihikanna anyakoddo aaga ginaathongimi, gamuruma mmodha gegihina: ‘Kadhowa!’ oliye anodhowa, gamwerela mmodhaya gegihina: ‘Kadha wuno!’ oliye onodha ni gawoga ni mudhaari aaga gegihina: ‘Keerana ela!’ oliye onowerana.” 9 Yesu nuwawiwa madhu ala, otikina ni owoga ni muthithi ole waathu wamuhara egihina: “Miyo ginowuwaddelani gegihina: Kaginfwannye muthu Wizarayeli anna nroromelo ninlubale nowindala.” 10 Athu ale yarumiwe nuuhogolowela vaade, enfwanyile mudhaari ole agaali mugumi.
11 Numala, Yesu omaga olenddo odhowa sidadi yoNayi, vano anamahara aye ni muthithi waathu okala vamodha nuliye mulenddoni. 12 Mudhidhi yoole aaddamelaga musiwo wa sidadi* yeele, wafwanya athu egaamuthukule muthu ookwa* emuyagana ode, amaye yanna mwaana mmodha baahi.* Ohiya eyo, yaali maamukwele. Teto muthithi munlubale waathu wa sidadi yeele wavelelaga. 13 Yesu nuumona, omweddela thagaraga ni owoga nuliye egihina: “Kuwunle kamaala.” 14 Voharela waddamela ni wadahinya maakaya, vano ale yamutheba wimela. Nuwindo oliye owoga egihina: “Muzombwe, anawoga di miyo: Kavenya!” 15 Mwanookwa ole ovenya okarati ni wambela owoga, vano Yesu wavahedha amaye. 16 Athu aatene wambela woova ni omuthithimihaga Mulugu yegihina: “Ohukumelela namavuhulela munlubale vaari vehu,” vano: “Mulugu ohubuwela nlogo naye.” 17 Muthenga ola wodhela oliye ovuwa murudda dhaatedhene dhooJudeya ni dhowaddamela.
18 Nuwindo, anamahara a Juwawu omwaddela dhithu dhaatedhene. 19 Juwawu wawithana anamahara aye abiili ni waruma wihina yamukohe Nabwiya yegihina: “Nabwiya di Nyu ajhehiwa obe nimujhehege muthu mmodhaya?” 20 Alobwana ale nunfwanya, owoga yegihina: “Juwawu Namabaddiza anirumile wihina nukoheni akala nyu: ‘Nabwiyani di Nyu ajhehiwa obe nimujhehegeve muthu mmodhaya?’” 21 Mudhidhi yoole, oliye wavulumusa athu owinjhiva yanna dhiredda dhohiyana-iyana, dhiredda dhowopiha, yanna muzimu dhabure ni wafugula mento aaliba ohoona. 22 Oliye wawakula egihina: “Mudhowe mwamwaddele Juwawu dhithu moonilinyu ni mwiwalinyu: Athu oohoona enna woona, athu ooragala enna weedda, aliba maranya enna ovulumusiwa, athu oohiwa enna wiwa, anookwa enna ovenyihiwa muukwani teto athu oohawa enna olaleyiwa muthenga dhapama. 23 Oohagalala di muthu yoole ahigifwannyena ethu yokwakwathusa.”
24 Aliba muthenga yarumiwe ni Juwawu nudhowa, Yesu wambela owoga ni muthithi waathu wodhela Juwawu egihina: “Mwaagele woona ddi mwiddeddereni? Woona bango enaddeguma nnipevo? 25 Kito mwaagele woona ddi? Mwaagele omoona mulobwana aawanre malaya athima? Ale enaawara malaya athima ni enna egumi yoreela enakala nyumba dhamamwene. 26 Kito mwebaribarene mwaagele woona ddi? Omoona namavuhulela? Hee, miyo ginowuwaddelani oliye ohumukwaranya namavuhulela. 27 Ola diyole dholebela dhamuwogiwa dhegihina: ‘Kasugwa! Ginere omuruma muthu osogolo* weenyu, wihina uwegeredheleni dila!’ 28 Ginowuwaddelani ebaribari: Mwa athu aatene yaale ebaliwe ni muhiyana kanabaliwege muthu munlubale omukwaranya Juwawu; mbwenye ole ali mung’ono Mumweneni wodhulu, dimunlubaleya omukwaranya oliye.” 29 (Nlogo naatene ni anamakukusa musoko, numala wawiwa madhu yaala wonelamo wihina Mulugu dowogowa, mwaha yabaddiziwe ni Juwawu. 30 Mbwenye Afarizewu ni aliba yakovelele Malamulo opwaza efunelo* ya Mulugu, mwaha kiyabaddiziwe nuliye.)
31 “Nlogo nna, ginaaliganihe nnaani ki giladdanihe nnaani? 32 Nnaligana ni ahima ekaratile vamerkadu yawithana akwiwa yegihina: ‘Iyo nihoba palaza, mbwenye nyu kamwiinile; iyo nihuwibelani jhibo dhowukula, mbwenye nyu kamuukuwile.’ 33 Nimakalelo mamodhave, Juwawu Namabaddiza adhile ahijhile pawu newene ahimung’wile vinyu, mbwenye nyu munawoga mwegi: ‘Oliye ohukanna demoniyu.’ 34 Mwaana Muthu adhile ajhaga ni ang’waga, mbwenye athu enawoga yegihina: ‘Kamusugweni! Mujhani, namang’wa vinyu, akwaye banamakukusa musoko ni anamathega!’ 35 Thotho enooneya mowiwanana ni dhowera dhewa.”
36 Nfarizewu dhaala oomuwadda malabwene wihina ajhe vamodha nuliye. Oliye odhowa vaade va nfarizewu ole ni ojha vamodha ni oliye. 37 Muhiyana dhaala aanoniwe sidadi yaatene ninga namathega, onona wihina Yesu ajha* vaade va nfarizewu, nuwindo oliye othukula garafwa na alabasturu nanna makura oonukwela. 38 Okokora omanyaloni waye, oliye wambela wunla aanyethihaga manyalo ni mitori dhaye, ni afufuthaga ni mathithi aye. Ohiya eyo, owabejari manyalo a Yesu ni owakuthulela makura oonukwela. 39 Nfarizewu ole nuwoona ele eeriyena wambela owoga mmurimani mwaaye egihina: “Mulobwana ola mwebaribarene ahakale namavuhulela, eere omunona muhiyana baani anaahidda manyalo aye, wihina oliye namathega.” 40 Mwaha wa yeyo, Yesu omwaddela egihina: “Simawu, ehikala ethu ginafunimi wuwaddela.” Oliye omwakula egihina: “Kawogani namahudhiha!”
41 “Alobwana abiili yahinfiyari mulobwana dhaala anabolihiha korowa; mmodha ambolihe 500 denariyu,* mmodhaya 50. 42 Woona wihina kiyanna korowa yomuliva, oliye walevelela aabilene. Aabilene yaala, anathabwa omudhivela duuvi?” 43 Simawu omwakula egihina: “Ginona wihina duule athambwiye omulevelela.” Oliye omwaddela egihina: “Ohakula pamadhene.”* 44 Nuwindo, oliye orugunuwa omusugwa muhiyana ole ni omukoha Simawu egihina: “Onomoona muhiyana ola? Miyo gihivolowa mba mwawo mbwenye we kugivahile manjhe owasuwana manyalo aaga. Mbwenye muhiyana ola ohanyethiha manyalo aaga ni mitori dhaye ni ohafufutha ni mathithi aye. 45 We newene kugivahile beju modha, mbwenye muhiyana ola, okuma vevale givolowilimi ofiyedha wora yeela, oliye kanamaala wabejari manyalo aaga. 46 We kuwakuthulele makura vamuru vaaga, mbwenye muhiyana ola ohakuthulela makura oonukwela manyalo aaga. 47 Bumwahaya, ginowuwaddela gegihina: Naarive dhoothega dhaye dhigathambwe winjhiva, dhihimala oleveleliwa, mwaha oliye ohugooniha odhivela winlubale. Mbwenye ole analeveleliwa dhoothega dhaye vang’ono, anadhivela vang’ono.” 48 Vano Yesu owoga ni muhiyana ole egihina: “Dhoothega dhawo dhihimala oleveleliwa.” 49 Ale yakiratile vameza vamodha nuliye wambela onong’ona vikaleliwa yegihina: “Mulobwana yoola baani anofiyedha olevelela dhoothega?” 50 Mbwenye Yesu owoga ni muhiyana ole egihina: “Nroromelo nawo nihuvulusa. Odhowe ni murenddele.”