Dhilebiwe ni Matewuji
21 Yaddamelaga murudda woJeruzale yahifiya oBetifaji vamwangoni Woolivera, vano Yesu waruma anamahara aye abiili, 2 wawaddela egihina: “Mudhowe murudda dhili osogolo, mwafiya mweedde vang’ono munere onfwanya buuru agamageleliwe vamodha ni mwanaye. Mwatapule mwadhena wuno. 3 Muthu ukohani, mmwakule mwegihina: ‘Nabwiya dinaahowela.’ Ndo aneere wuhiyani wadhana.”
4 Eyo epadduwe wihina yakwanele madhu anamavuhulela enawoga yegihina: 5 “Mmwaddele mwana muhiyana oSiyawu: ‘Kasugwa! Mwenaawo onoodha, oliye dowiyeviha ni dokurumuwa murima, ni anodha agamugwenle buuru, hee, mwanabuuru, mwanaana amwanenyama oothukulana dhoobo.’”
6 Vano anamaharaye odhowa werana dhendhe Yesu awaddeliye. 7 Omudhana buuru vamodha ni mwanabuuruya, nuwindo aliwa wathukula malayiwa watadela vadhulu vaabuuru ale, oliye okarativo. 8 Athu owinjhiva amuthithi yoole yotadela malayiwa murampani mbwenye athu amodha yogwadda matadu amuthanko watadela murampani. 9 Ohiya yeyove, muthithi waathu waali osogolo waye, naleya yamuhara yokuwa yegihina: “Mwaana Davidi kamwerena! Nivuluseni, oothithimihiwa duule anadha ni ndina na Yehova!* Kamwerena nivuluseni nyu munakala odhulu!”
10 Oliye nufiya oJeruzale athu aatene a sidadi yeele okala oothuwathuwene, ni yokoha yegihina: “Olaya baani?” 11 Muthithi ole waathu wowakula wegihina: “Ola di Yesu namavuhulela, ooNazare elabo yoGalileya!”
12 Yesu ovolowa mutempulu, wawigaramo athu aatene yaale yaguliha ni yagula mutempulu, waabidhula meza aanamakakaniha korowa ni mpaddo dhaathu yaguliha kangayiwa. 13 Ni wawaddela egihina: “Ehilebiwa: ‘Nyumbaga enithaniwege nyumba ya malobelo,’ mbwenye nyu muhusaddula okala nyumba yaambava.” 14 Teto aliba oohoona ni aliba ooragala omwaddamela mutempulu, oliye wavulumusa.
15 Vano anddimuwa aanamakutha ni anamaleba nuwoona dhithu dhotikiniha eerana Yesu ni anamwani yakuwa mutempulu yegihina: “Kamwerena Mwaana Davidi, nivuluseni” aliwa otakaleliwa vanlubale 16 ni omukoha yegihina: “Onowiwa dhithu enawogiwa?” Yesu wawakula egihina: “Hee. Nyu kamunawilerigi madhu ala enawoga yegihina: ‘Nyu muheriha wi mulomo dhaanamwani ni anamwani owamwa yuvuwiheni’?” 17 Nuwahiya athu ale vevale, okuma musidadi mune odhowa oBetaniya ni ovireliwa emahiyu yaatene agaali wewule.
18 Mambesi ahogolowelaga musidadi mune ovoliwa dala. 19 Nuwindo oliye woona muthanko wa figu waddamela murampani, vano odhowa wewule waaliwa, mbwenye kafwannyemo ethu yahili matakuru baahi, oliye owoga egihina: “Kudha ovahaga dila biili.” Mohulegela muthanko ole wa figu wumma. 20 Anamaharaye nuwoona yapadduwe aliwa otikina vanlubale ni owoga yegihina: “Muthanko ola wa nfigera wandile addi wumma mohulegela?” 21 Yesu wawakula egihina: “Miyo ginowuwaddelani ebaribari: Mwakanna nroromelo ni muhanganyedhaga, nyu kamunerena yelave baahi gerilimina ni muthanko ola wa nfigera, mbwenye mwawoga ni mwango ola mwegi: ‘Kavenya, wivokedhe muniya,’ eyo enere opadduwa. 22 Dhaatedhene munalobinyu ni nroromelo munere wakela.”
23 Yesu nuuvolowa mutempulu anddimuwa aanamakutha, anamaholela a nlogo omwaddamela wula ahudhihaga, ni omukoha yegihina: “Onerana dhithu ndha ni kopolo dhawani? Ki uvahile owedha baani?” 24 Yesu wawakula egihina: “Ni miyowa ginere wukohani ethu emodha. Mwagakula ginere wuwaddelani wego ginadhimina kopolo ndha: 25 Obaddiza wa Juwawu waadhele waani? Odhulu obe waathu?” Mbwenye aliwa wambela onong’ona vikaleliwa yegihina: “Nera: ‘Wodhulu’ oliye aneere onikoha: ‘Kito mwihinamurumedhela ddi oliye?’ 26 Nera: ‘Onakuma waathu,’ nnowova muthithi ola waathu oli avala mwaha enamoona Juwawu ninga namavuhulela.” 27 Nuwindo aliwa omwakula Yesu yegihina: “Iyo kannonne.” Vano Yesu wawakula egihina: “Ni miyoya kaginuwaddelani muthu anagivaha owedha wowerana dhithu ndha.
28 “Nyu munoonamo aavi? Mulobwana dhaala anna anamwani abiili, numwithana mwaana oobajha oliye omuloba egihina: ‘Mwanaga, kadhowa walabe peeno omunddani wa uva.’ 29 Wakula egihina: ‘Miyo kaginayawo,’ mbwenye nuuvira mudhidhi oliye othwaruwa ni odhowawo. 30 Vano omwithana mwaana anabiili omuloba ethu emodhave, vano oliye omwakula egihina: ‘Gihiwa papa,’ mbwenye kagelewo. 31 Aabilene yaala erilena efunelo yaBabe baani?” Aliwa omwakula yegihina: “Owambela.” Yesu wawaddela egihina: “Ginowuwaddelani ebaribari nyu ni anamakukusa musoko, anamararuwa enakale owambela ovolowa Mumweneni wa Mulugu baaliwa. 32 Mwaha Juwawu adhile wutonyihedhani dila yowogowa, mbwenye nyu kammurumedhe. Mbwenye anamakukusa musoko ni anamararuwa yahimurumedha; naarive mugonile dhithu dhendho nyu kamuthwaruwe ofiyedha omurumedha oliye.
33 “Mvuruwane musibe mmodha: ahikalawo mulobwana dhaala aanna munddaye wa uva, omagela txinga, otiba muliddi womukamulamo vinyu ni omaga nyumba yotaama; nuwindo munddole wa uva ohiya mmadani mwa anamalima, omaga olenddo odhowa elabo emodha. 34 Nufiya mudhidhi wohadda waruma adhaaraye wihina yagumane ni anamalima ale wi aakele dhowima dhaye. 35 Nuwindo, anamalima ale wahidda adhaaraye, mmodhaya omuukutha, mmodhaya ompa, mmodhaya ompwesa ni mabwe. 36 Warumave adhaari amodha owinjhiva wakwaranya ale owambela, mbwenye aliwa wawerela ethu emodhave. 37 Vogomihedhava omuruma mwanaye egihina: ‘Podi wera mwanaga ola enere omuriha.’ 38 Numoona mwana ole, anamalima ale owoga vaakaleliwa yegihina: ‘Anahalena munddaya diyola. Kabeni nimpe, nihalena dhithu dhaye!’ 39 Nuwindale aliwa omuhidda, onvokedha ode wa mundda ole wa uva, ompela wengo. 40 Vano mwinnya a mundda ole wa uva ahogolowa, anawerena ddi anamalima ale?” 41 Aliwa omwakula yegihina: “Mwaha wokala anamalaba abure, aneere watolosa nimakalelo abure ni aahiyedhe mundda ole wa uva anamalima amodha, enanvahege dhowima mudhidhi wofwanelela.”
42 Yesu wawaddela egihina: “Nyu kamunilerigi dholebela dhinihina: ‘Nibwe ameesili ekoddiliwa thi nibwe nathimana.* Ndho dhinadhela wa Yehova* teto sotikiniha vamentoni vehu’? 43 Bumwahaya nguwaddelani gegihina: Munere waakiwa Omwene wa Mulugu ovahiwe nlogo nnavahege dhowima. 44 Muthu yoole anamothele vanibweni vevala aneere onyenyiwa. Teto yoyo anamotheliwe nibwe nna aneere otatakanyeya.”
45 Vano anddimuwa aanamakutha ni Afarizewu nuwiwa musibe ndhe, onona wihina awagana aliwene. 46 Naarive efunaga ommaga,* yoova muthithi waathu mwaha aliwa yamoona ninga namavuhulela.