Aamulebeliye Timotiyu
6 Athu yaale eli adhaari, yarihege anabwiyiwa* ni murima wewa waatene, wihina ndina na Mulugu ni makalelo aaye oohudhiha ehiwogiwege obure. 2 Ohiya eyo, ale enna anabwiya ewa eli makiristawu kahiyo ohaarihaga mwaha okala addibila. Mbwenye enohoweleya walabela pama mabasiwa mwaha mabasa ayo enowakavihera addibilo naale eli oofuneya.
Odidele ohudhiha ni okongomedha dhithu dhendha. 3 Akala muthu onohudhiha dhohudhiha dhimodha ni kanarumedha dhohudhiha dheebaribari dhinadhela wa Nabwiya Yesu Kiristu newene dhohudhiha dhiniwanana ni makalelo apama oomulabela Mulugu, 4 muthu yoyo onothabwa withukula ni kanonelamo ethu. Ohufugeya mubuwelo mwaha wakanganela madhu ni ohiwanana. Dhithu ndho dhinotatamula nrima, okangana, woota, wanganyedha wabure, 5 dila dhowinjhivadhene enokanganela muselu dhohukanna mabasa ni athu emanle onongeya mubuwelo, ehinonne ebaribari ni enamulabela Mulugu esayelagamo nvenyedho.* 6 Ebaribari wihina omulabela Mulugu winodhana mpurelo munlubale nanona ohagalala ni dhithu ninnihuna. 7 Mwaha kanidhilena ethu mwilaboni muna newene nadhowaga kannathukulemo ethu. 8 Mowindo, nakanna ethu yoojha ni yowara,* nnere ohagalala.
9 Mbwenye athu yaale yikomile wihina ginafuna gireele, enomorela muwehiwani ni mmurakoni, teto eneere okanna munigwa dhabure ni dhootaduwa, dhendo dhinaathukulele omatolosiwelo. 10 Mwaha odhivela korowa, nipara na dhego dhaatedhene dhabure, amodhaya, mwaha odhivela wewula, ehiyelela nroromelo newa ni ehiitotela makathamiho owinjhiva.
11 Mbwenye we ninga muthu a Mulugu othawe dhithu ndha. Wilibihedhe okala owogowa, omulabela Mulugu, okala oororomeleya, oodhivela, oovilela ni oopwaseya. 12 Owanihe koddo yapama ya nroromelo; opareele ni kopolo dhaatedhene egumi yohimala yeyo withaneliwiwe ni wakuleliwe vaari va anamoona owinjhiva.
13 Miyo ginowuwaddela vamentoni va Mulugu anenya dhithu dhaatedhene okalawo ni vamentoni va Kiristu Yesu avahile onamoona vamentoni va Ponsiyu Pilatu wihina 14 wawiwelelege malamulo mwa makalelo oweela ni ohunna muladdu, ofiyedha woneyihiwa Nabwiya ehu Yesu Kiristu, 15 oliye doohagalala, Nabwiya mmodha Akopolo anafuna werana dhithu ndho mudhidhiya wakwana. Oliye di Mwene a mamwene ni Nabwiya aale enna owedha, 16 oliye baahi dihinakwa, anakala mburo wowaara wahinafiyiwa, yoyo ahinooniwege ni muthu newene ahinadha ooniwa. Oliye avahiwe nthithimiho teto kopolo dhaye dhikalegeve dhamukalakala. Amem.
17 Waalage athu enna dhoreela elabo yeela* wihina: ehithukulege ni ehiroromelege dhoreela dhohunoneya, mbwenye emuroromelege Mulugu, ananivaha dhoreela dhaatedhene dhinahagalasa murima wehu. 18 Wawaddele wihina yeregena dhithu dhapama, ereele ni mabasa apama, ekale athu oovaha ni ehikale athu owiimana 19 elogolelaga dhoreela dhapama dhinaakavihere osogolo, yeragana ndo aliwa eneere opareela ni murima waatene egumi yeebaribari.
20 Timotiyu, okoye ele ovahiwiwe ni Mulugu, orabele muselu dhohikanna mabasa dhihiniwanana ni ele eli yoweela ni mubuwelo waathu enihina nihikanna “enonelo.” 21 Amodha mwaha othabwa withukulana enonelo yewa, ehiyelela nroromelo neewa.
Opama wohinifwanelela okale ni nyu.