Karta Nanabili na Peduru
2 Mowindo, kale yahikalawo anamavuhulela owoota vaari va nlogo na Mulugu, nimakalelo mamodhave, vaari veenyu vinere okala anamahudhiha owoota. Vang’ono vang’ono aliwa enere wapandda makuuru enanongege nroromelo nenyu ni eneere ofiyedha omukoodda ole aagunle, mwaha wa yeyo eneere ogujhuliwa mowaguva. 2 Ohiya eyo, owinjhiva enaharege mweeddelo wewa wamanyazo,* mwaha wa yeyo eneere wathukulela athu owoga obure dila yeebaribari. 3 Teto mwaha wa nrima neewa aliwa enerege wujhelani ni malango. Mbwenye otorihiwa wewa ethongeliwiwa okuma kale kunaalegele, mwebaribarene otolosiwa wewa wineere ofiya.
4 Nimakalelo mamodhave, Mulugu kaalevelele angero yatheegile mbwenye ohaavokedha mburo oniithaniwa Tartaru* oomagiwene ni makurenti wavokedha oyiihini wengo enajhehiwa otorihiwa. 5 Teto Mulugu kaalevelele athu akale, mwaha wa yeyo odhana mutokora* elabo yeele yadhaanle athu abure, mbwenye onvulusa Nowe alaleya dila dhowogowa dha Mulugu vamodha ni athu owakwana atanu nabiili. 6 Oliye kaalevelele luwani* yoSodoma ni yoGomora, ahigujhula ofiyedha ohala nddoora baahi, oonihaga dhithu dhinaapadduwele athu abure. 7 Mbwenye oliye onvulusa Lo mulobwana owogowa, akalesa oothuwathuwene mwaha wa mweeddelo wamanyazo* yanna athu a mudhidhi yoole. 8 (Mwaha mudhidhi oliye akalaga ni athu yaale abure, kadda labo owukuuwa mwaha woona ni wiiwa dhithu ndhe dhabure aliwa yeeriwana.) 9 Bumwahaya, Yehova* ohunona wawobola ale enamwebedha nuuroromeleya yafwanyiwaga dhoweha, mbwenye onowahiya athu oohogowa wihina egujhuliwe labo nootorihiwa, 10 thabwa-thabwa ale enasayela wagoniha athu amodha ni efunelo yotakaliha mwiili wewa teto enaanyemula anamathonga.
Athu ayo kinoova ethu ni bowithukula, aliwa kinoova wawoga obure athu enathithimihiwa ni Mulugu, 11 mbwenye angero naarive eganna kopolo dhinlubale aliwa kinawinkedha newene kinaaruwana mwaha womuriiha Yehova.* 12 Mbwenye athu ayo eli ninga anenyama ehinonne ethu ni ehinuubuwela teto enabaliwela wihina ehiddiwe ni epiwe, enowoga obure dhithu ehinonniwa. Aliwa enere otolosiwa mwaha mweeddelo wewa, 13 teto eneere woonihiwa goyi ehogoloseliwaga obure yeriliwana.
Enoona wi sohagalasa ojhavo dhithu dhomwiilini ni mutana. Aliwa eli ninga malemba ni mahonya enadugudaniha vaari veenyu, yajhaga mathanga vamodha ni nyu aliwa enohagalala ni dhohudhiha dhewa dhowoota. 14 Aliwa enofuna vanlubale okuma* mba teto kinanda ohiya werana dhoothega, ni enowaleketha ale eli oolodhowa. Murima wewa onowunlela okanna dhaatedhene. Aliwa ahima owulumeliwa. 15 Ehihiya ohara dila yapama ni ehiholowa. Ehanre dila ya Balawu mwaana Beyor, oliye aherana ethu yabure mwaha efunelo yaye yinlubale yaali wihina aliviwe, 16 mbwenye ahisumululiwa mwaha obure ole eriliyena. Vano buuru mwanenyama ahinawoga, ahiwoga nnamavuhulela ole akalaga ninga muthu ni omuhiha ohara mubuwelo waye wootaduwa.
17 Athu yayo, enaligana ninga ntxela nowumma ni murabo dhinathunyiwa nnipevo ninlubale, teto ehegeredhiwa yiihi yinlubale wihina evokedhiwewo. 18 Aliwa enowoga dhithu dhinakala ninga dhathima, wula dhihinna mabasa. Enowerana dhithu dhinooniha mweeddelo wabure ni wamanyazo* teto enowaleketha ale emanle woobowa vaari vaathu enerana dhithu dhabure. 19 Naarive epaganyaga wawobola athu yayo, aliwene adhaari a dhikalelo dhabure; mwaha muthu yoole anagonjhihiwa ni muthu mmodhaya anakala mudhaari a muthu yoyo. 20 Mwebaribarene akala nnikavihero na enonelo yeebaribari ya Nabwiya ni Nvulusi Yesu Kiristu ehoobowa vaari va dhithu dhotakala dhamwilaboni vano enohogolowela dhithu dhimodhave ofiyedha wagonjhiha, eyo yeere okala ethu yabure okwaranya mudhidhi yahinanone ebaribari. 21 Yeere okala yapama wa aliwa ohunona dila yowogowa ni nlamulo noweela, ohiya onona teto vano osukuma. 22 Wa athu yayo ohakwanela musibe dhaala weebaribari onawoga wegihina: “Mwanabwa ohahogolowela waajha mathapiko aye, teto guluwe nuumala ohabihiwa ehihogolowela witakaliha vamaddeguni.”