Dhilibiwe ni Marku

7 Vano Afarizewu ni anamaleba amodha yakuma oJeruzale otugumana vaali Yesu. 2 Aliwa wawoona anamahara amodha a Yesu ejhaga ni mada ootakalene, obe, ehinawile.* 3 (Mwaha afarizewu naajudewu aatene kinajha ehinawile mada ofiyedha ogugunoni, eharaga mweeddelo wa makolo ewa, 4 teto yahogolowa omerkado kinajha yahanawile mada. Ehikanna dhilemelelo dhimodha yakenliwa ni enahariwa ninga obaddiziwa ni kopo, jaro ni biya dha muthove.) 5 Nuwindo, afarizewu ni anamaleba omukoha yegihina: “Mwahaya bwaddi anamahara awo egaalupa malamulo a makolo, mbwenye enajha yahananwe mada?” 6 Oliye wawakula egihina: “Izayiya ohuvuhulela pamadhene wodhela nyu anamaleketha, ninga vilebiwiwa: ‘Nlogo nna nnagithithimiha ni mulomo baahi wula dhoweradha dhigaali wolapelawene ni miyo. 7 Nnagebedhela ebewene, mwaha nnahudhiha malamulo aathu ninga dhohudhiha dha Mulugu.’ 8 Nyu munowahiya malamulo a Mulugu, oharaga mweeddelo* waathu.”

9 Oliye wawaddelave egihina: “Nyu muhunona pamadhene wahiya malamulo a Mulugu wihina muharegeve mweeddelo weenyu. 10 Motajhiha, Moyizeji ohuwoga egihina: ‘Waarihe ababo ni amawo’ ni ‘Ole anaawulumele* ababe obe amaye, apiwe.’ 11 Mbwenye nyu munowoga mwegihina: ‘Muthu yoole anaawoge naababe obe naamaye egihina: “Dhaatedhene ginnimina dhafuna wukaviherani korba (obe nvaho wa Mulugu),’” 12 nyu kamunamwenya werana ethu-siithu wihina aakaviherena ababe ni amaye. 13 Mowindala madhu a Mulugu kinarihiwa mwaha wohara mweeddelo weenyu. Ni munowerana dhithu dhowinjhiva dhinaligana ni dhendha.” 14 Nuwindo withana muthithi ole waathu ni wawaddela egihina: “Nvuruwane nyu aatene ni monelemo yotapulela ya madhu yaala ginawogimi. 15 Ethu enamutakaliha muthu kahiyo ele enakuma ode mbwenye ele enakuma muwari sinamutakaliha.” 16*⁠ ——

17 Vano Yesu nuvenyavo vaari va muthithi yoole waathu, nuuvolowa mba anamahara aye omukoha wodhela yoladdaniha ele. 18 Nuwindo, oliye wakoha egihina: “Ni nyunwa kamunonelemo ethu ninga aliwa? Kamunonne wihina ethu enamutakaliha muthu kahiyo ele enakuma ode evolowa mmwiilini mwaaye, 19 mwaha kinavolowa mmurimani mwaaye mbwenye enavolowa mbani yamala okumelela ode?” Mowindo oliye woniha wihina dhoojha dhaatedhene soweela. 20 Ohiya eyo, oliye owoga egihina: “Dhithu dhinakuma muwari mwa muthu sinamutakaliha. 21 Mwaha mmurimani mwa muthu munokuma mubuwelo dhabure ninga oraruwa,* wiiya, opanga, 22 okuma mba, nrima, obure, woota, mweeddelo wabure,* mento a nrima, oruwana dhithu dhotaleleya, withukula ni ozimola. 23 Dhithu dhaatedhene ndha dhabure dhinakuma muwari sinamutakaliha muthu.”

24 Numala, Yesu odhowa murudda woTiru ni woSidoni. Wewule oliye ovolowa mba ni kafuna wihina athu emoone, mbwenye athu yahimoona. 25 Mudhidhi yoole muhiyana dhaala anna mwanaye mwanamuhiyana oonihiwa goyi ni muzimu wotakala wiiwa wodhela oliye odhowa wengo, omukokorela vamentoni vaye. 26 Muhiyana ola aali muGerego ni aabaliwe elabo yoFinisiya, omuloba ni ntidi wihina amwigare demoniyu ole amooniha goyi mwanaye. 27 Mbwenye Yesu omwakula egihina: “Wahiye anamwani yabihe orubala, kahiyo yapama wawaka anamwani pawiwa ni wavokedha anaanabwa.” 28 Oliye wakula egihina: “Hee nabwiyani, mbwenye mwebaribarene anaanabwa enajha ndhe dhinamorihiwa ni anamwani vameza.” 29 Mwaha wa yeyo oliye omwaddela egihina: “Mwaha yowakula yawo kadhowa demoniyu amooniha goyi mwanawo ohumuhiya.” 30 Nuwindo, nuuhogolowela vaade oliye onfwanya mwanaye agakinantile vakamani, vano demoniyuya agaamuhile.

31 Yesu nuuhogolowela murudda wooTiru ovira murudda woSidoni odhowa niya yoGalileya, wabuwela kobela yoDekapoli.* 32 Wengo aliwa omudhelana mulobwana dhaala oohiiwa ni oohiwoga pama, omuloba wihina amutapulele nlada naye. 33 Vano oliye omuthukulela okwibi, wolapelawene ni muthithi ole waathu. Nuwindo othukula dhimbuno dhaye opweha obaruni wa mulobwana yoole, vano nuwatura maara odahinya nlumi naye. 34 Nusugwa odhulu, ovumela vadhulu ni owoga nuliye egihina: “Efata,” enatapulela wihina: “Kafuguwa.” 35 Nuwindo, mabaru aye wambela wiwa ni wambela owoga pamadhene. 36 Numala, oliye wakongomedha wihina ehimwaddele muthu mmodha, mbwenye aakongomedha aliwa yera othabwa ovuwiha ele eriliyena. 37 Mwebaribarene aliwa yootikina vanlubale ni yowoga yegihina: “Dhithu dhaatedhene oliye aneriyena sapamave. Oliye annaweriha aliba oohiwa wiiwa ni aliba ohuwoga owoga.”