Dhilebiwe ni Matewuji

7 “Muselele watoriha athu amodha wihina munatorihiwe; 2 mwaha makalelo munaatorihinyu athu amodha, ni nyunwa munere otorihiwa ndo, ni makalelo munaapiminyu athu amodha ni nyunwa munere opimiwa ndo. 3 Mwahaya bwaddi ogasugwa kase-kase eli mwintoni mwa ddibilo, mbwenye kunanda woona kugulu eli mwintoni mwawo? 4 Obe onanda addi omwaddela ddibilo wegihina, ‘kagihiye givenyihemo kase-kase mmwintoni mwawo,’ wula mmwintoni mwawo mugaali kugulu yantero? 5 Namaleketha we! Orajhihe okumihamo kugulu eli mmwintoni mwawo,’ windo onere wanda okumihamo kase-kase eli mwintoni mwa ddibilo.

6 “Kamwavahe anabwa dhithu dhoweela, newene kanvokedhe guluwe peerola* dhenyu, wihina enaanyingalele yamala ehogolowe edhe yulumeni.

7 “Mudidele oloba munere ovahiwa, mudidele oveda munere ofwanya; mudidele ogogodda munere ofuguleliwa; 8 mwaha muthu yoole analoba, onoovahiwa, ole anaveda onofwanya; ole anagogodda onofuguleliwa. 9 Mwebaribarene baani wa nyu mwanaye amuloba pawu, ananvaha nibwe? 10 Obe amuloba oba, ananvaha nowa? 11 Mowindala, naarive nyu mugaali athu abure, muhunona wavaha aninyu dhithu dhapama, ki wera Baabinyu ali odhulu, aneere wavaha dhithu dhapama ale enamuloba!

12 “Nimakalelo mamodhave, dhithu munafuninyu wihina athu yuwerelegeni ni nyuwa mwawerelege dhithu dhimodhave. Mwebaribarene, siyeyo enawoga Malamulo a Moyizeji ni dhilebile Anamavuhulela.

13 “Nvolowe mulago wopurana, mwaha mulago worambalala ni dila yorambalala, enathukulela omatolosiwelo, teto owinjhiva enavolowa mulago yoyo; 14 mbwenye wopurana bu mulago ni yopurana sidila enathukulela wigumini, ni athu vang’ono binafwanya.

15 “Mukale pasope ni anamavuhulela owoota, enuwaddamelani ninga mambila, wula dhowera dhewa dhiliganaga ni mwiijhi dhoowali. 16 Mwaha wa dhowera dhewa munere wanona. Nerege enowenyeya omuhapa uva munrogani obe omuhapa figu mmuthankoni wa mwinga? 17 Nimakalelo mamodhave, muthanko wapama onavaha dhowima dhapama, mbwenye muthanko wabure onavaha dhowima dhabure.* 18 Kinenyeya muthanko wapama ovaha dhowima dhabure, newene muthanko wabure ovaha dhowima dhapama. 19 Muthanko wamutene ohunavaha dhowima dhapama onogwaddiwa ovokedhiwa vamoothoni. 20 Mwebaribarene munere waanona athu yaala mwaha dhowima dhewa.

21 “Enavolowe Mumweneni wodhulu kahiyo athu aatene enagithana: ‘Nabwiya, Nabwiya,’ mbwenye athu yaale enerana efunelo yaaBaba, eli odhulu. 22 Labo nenno athu owinjhiva enerege owoga yegihina: ‘Nabwiya, Nabwiya, iyo kaniwogile ninga anamavuhulela ni ndina nenyu, kanawigara ademoniyu ni ndina nenyu, teto kanawerana matikiniho manlubale ni ndina nenyu?’ 23 Mbwenye miyo ginere wawakula gegihina: ‘Kagunonneni! Kavenyavoni vamentoni vaaga, nyu aliba walupa malamulo!’

24 “Mowindo, muthu yoole anaavuruwana madhu ala ginawogimi ni aaparihedhaga mabasa analigana ni mulobwana athotho amagile nyumbaye vanibweni. 25 Vano orubwa muzongwe, manjhe odhala, nipevo nakopolo othika pamadhene nyumba ele, mbwenye newene kibwanyuwe, mwaha yaatibeliwe vamabweni. 26 Ohiya eyo, muthu yoole anaavuruwana madhu ala ginawogimi ni ahinaparihedha mabasa analigana ni muthu ahinna thotho, amagile nyumbaye vamutxesani. 27 Vano orubwa muzongwe mwihinjhe odhala, nipevo nakopolo othika pamadhene nyumba ele oddurumula ni ofiyedha obwanyula yaatene.

28 Yesu nuumala wawoga madhu ala, muthithi waathu walivo otikina vanlubale mwaha makalelo aye ohudhiha,* 29 mwaha oliye ahudhiha* oonihaga wi arumiwe ni Mulugu, mohiyana ni anamaleba ewa.