Karta Nanabiili Naakudda Korintiyu
4 Vano, woona wihina ninna wapara mabasa ala wodhela thagaraga dha Mulugu, kaniseelele. 2 Ohiya eyo, niihiya werana dhithu dha manyazo dhineriwana wipiini, teto kanili anamaleketha ni nnaahudhiha athu ele enawoga madhu a Mulugu, neragana eyo vamentoni va Mulugu nnowoniha wihina nnerana ele eli yapama wi athu aatene enone. 3 Akala mwebaribarene muthenga dhapama nnalaleyihu dhihikuneeliwa,* dhikuneeliwe wa ale enadhowa omatolosiwelo, 4 ni waathu yaale ehinaroromela, mulugu eelabo ela* aafugiliye mubuwelo wewa, wihina ehoone waara wa nthithimiho na muthenga dhapama wodhela Kiristu, yoyo ali nladdaniho na Mulugu. 5 Mwaha kannalaleya wodhela iyo mbwenye nnalaleya wodhela Yesu Kiristu, Nabwiya ehu ni wihina nili adhaari enyu mwaha wa Yesu. 6 Woona wi Mulugu diwogile egi: “Vayiihini vikale waara,” teto wodhela kove ya Kiristu Oliye ohaara mmurimani mweehu wihina amoneele ni nthithimiho na enonelo ya Mulugu.
7 Ebaribari, nihikanna dhoreela ndha dhikoyiwe mmunoni, wihina kopolo dhohikala dha masika dhikale dha Mulugu ohiya dhehu. 8 Nnopinyaminyiwa mwa makalelo aatene, mbwenye nnowanda wirugunusedha; nnoosimwela, mbwenye nnokanna vovumela;* 9 nnoharahariwa, mbwenye kaninyanyaliwe, nnomothihiwa, mbwenye kannagujhuliwa. 10 Mburo-bu-mburo nnadhowihu, egumihu enakala vangovini ndala ninga Yesu, wihina egumi ya Yesu yoneyege mwigumini mwehu. 11 Mbwenye iyo niliwo nnoharahariwa malabo aamatene nuukwa mwaha wa Yesu, wihina egumi ya Yesu yooneyege mmwiilini mwehu onakwa. 12 Mowindo, egumihu eli vang’ovini, mbwenye eyo enowukaviherani nyu okanna egumi.
13 Dholebela dhinihina: “Gihikanna nroromelo, bumwahaya gihiwoga,” ni iyowa nihikanna nroromelo nimodhave bumwahaya nigawoga, 14 nnonaga wihina Ole anvenyihile Yesu, aneere onivenyiha wihina nakale vamodha ni Yesu, teto aneere onipeleka vamentoni va Yesu vamodha ni nyu. 15 Dhaatedhene ndha dhinereya mwaha wa nyu, wihina opama wohinifwanelela wa Mulugu wenjhedhedheyegeve ni wihina Mulugu athithimihiwe mwaha athu owinjhiva enomutamalela.
16 Bumwahaya iyo kannaselela, naarive akala mwiili wehu ononyowa, yohanganyedhaya siila, epaddi yehu yomuzimuni enovenyihedhiwa kadda labo. 17 Mowindo, naarive goyi nnonihu egaali yoovira ni yojajala, enonivaha nthithimiho ninlubale* ni namukalakala; 18 kanubuwelege dhithu nnoonihu mbwenye nubuwelege dhithu nihinoonihu. Mwaha dhithu dhinoneya kadhinaliba ovira, mbwenye dhithu dhohoneya samukalakala.