Aalebeliye Akudda Gaalata
6 Addibila, akala muthu anna othukula mweeddelo wabure wula ahinonaga, nyu muli owithwelavo epaddi yomuzimuni, mmususedhe wihina mmukavihere muthu yoyo mwamakalelo apama. Mbwenye kadda muthu isugwerege wihina nuliyeya anaadhe eehiwe. 2 Mudidele okaviherana mmodha ni mukwaye mmakathamihoni mweenyu, mweragana ndo, munere wiwelela nlamulo na Kiristu. 3 Akala muthu aniwoona ninga ohukanna thima wula ahili ethu, onowileketha. 4 Mbwenye kadda muthu asugwerege dhowera dhaye, ndo aneere okanna ohagalala mwaha wa mabasa aye, ohiya wiliganiha ni athu amodha. 5 Mwaha kadda muthu anaathukule mutholo waye.
6 Ohiya eyo, muthu yoole anahudhihiwa madhu a Mulugu, agawane dhithu dhaye dhapama nuule anamuhudhiha.
7 Kamwilekethe: Mulugu kanaredhiwana. Mwaha dhithu muthu anadhaliye* sidhendho anaahaddiye; 8 mwaha ole anadhala dhithu dhomwiilini aneere ohadda dhithu dhomwiilini, wili ogujhuliwa, mbwenye ole anadhala dhithu dhomuzimuni aneere ohadda dhithu dhomuzimuni eli egumi yohimala. 9 Mowindala, kanselele werana opama, mwaha nahiselela, nnere ohadda mudhidhiya wafiya. 10 Mowindo, nakanna ofuru, nawerelege opama athu aatene, thabwa-thabwa addibilihu ni arogolihu oomuzimuni.
11 Mwawoone maletira manlubale gulebelimini ni mada aaga.
12 Ale enafuna wiwoneyiha ninga athu apama vamentoni vaathu biyayo enuuwaddihedhani wihina mwineliwe, teto aliwa enerana ndo yovaga oharahariwa mwaha omuhara Kiristu. 13 Teto athu yaale eniineliwa kiniwelela Nlamulo, mbwenye aliwa enafuna wi nyu mwineliwe wihina aliwa yithukulege wodhela mwiili weenyu. 14 Mowindo, miyo kaginadha giithukulana ethu ehili ntxikwa* na Nabwiya ehu Yesu Kiristu; wodhela okwa waye, miyo ginona wi elabo eli yokweene teto elabo enagoona miyo ninga muthu ookwa. 15 Mwaha yathimaya kahi wineliwa obe ohiineliwa mbwenye enafuneya fuukala muthu muxa. 16 Athu yaale enakalawo mowiwanana ni nlamulo nna, hee, wodhela Ezarayeli a Mulugu, ekanne murenddele ni yeeddeliwe thagaraga.
17 Okuma peeno odhowa osogolo, ahikalewo muthu anaagonihe goyi, mwaha gihikanna mabamba mmwiilini enoniha wi gili mudhaari a Yesu.
18 Addibila, mwaha dhikalelo dhapama munonihinyu, mwaakele opama wohinifwanelela wa Nabwiya ehu Yesu Kiristu. Amem.