Karta Nanabiili Naakudda Tesalonisense
2 Mowindo addibila, wodhela woneyihiwa wa Nabwiya ehu Yesu Kiristu ni otugumanyiwa weehu vamodha nuliye, nnowulobani 2 wihina muhaguvele ogurumela ni ohiya ekalelo yenyu yapama, mwamwiiwa muthu awogaga egi nlabo na Yehova* nihifiya, newene kamuthuwathuwe naarive muthu awogaga wi muthengaya bwa Mulugu obe wodhela wileri karta athu enawogiwa wihina dihiyo alebile.
3 Ahikalewo muthu anuholoseni.* Mwaha nlabo nno nihinathi ofiya, amodha enere ohiya omwiwelela Mulugu ni aneere woneyihiwa muthu anaalupa malamulo teto di yoyo anaatolosiwe. 4 Oliye mwiiddani ni onowiithukulana dhithu dhaatedhene dhinithaniwa mulugu obe dhithu dhineebedhiwa, ofiyedha okarati mutempulu ya Mulugu iithukulaga ninga mulugu. 5 Kamunubuwela wihina mudhidhi ngaali vamodha ni nyu gowuwadelesani dhithu ndha?
6 Vano nyu muhumala onona ethu enamukooddiha mwiddani oyo woneyihiwa, mbwenye mudhidhayeya wafiya oliye aneere woneyihiwa. 7 Mwebaribarene obure wa mwiiddani oyo booviteya ni onna wapara mabasa, mbwenye obure oyo onere okala woviteyene ofiyedha ole anavita ovenyihiwavo. 8 Amala aneere woneyihiwa ole anaalupa malamulo, yoyo Nabwiya Yesu anaamutolosiye ni muzimu wa muwano mwaaye ni aneere omugujhula adha munthithimihoni naye. 9 Mbwenye woneya wa ole anaalupa malamulo, mabasa anaapara Saddana ni kopolo dhaaye dhaatedhene ni dhintelelo vamodha ni matikiniho owoota 10 ni ohogowa waye woogwalagwambi wa ale enahara dila yomatolosiwelo, ehogoloseliwaga kunyawunya mwaha wohiwelela odhivela webaribari wihina evulusiwe. 11 Bumwahaya Mulugu uhiya mubuwelo wooleketha waavolowela wihina erumedhege dhowoota, 12 eerihaga wihina aatene yaale ehirumedhile ebaribari mbwenye yahagalala ni dhithu dhohogowa etorihiwe.
13 Mowindo, nnofwanelela malabo aamatene omutamalela Mulugu mwaha wa nyu addibila oofuneya vamentoni va Yehova,* mwaha obajha omambelelowene Mulugu ohuusakulani wihina nvulusiwe wodhela wutxenihani ni muzimu waye ni wodhela nroromelo neebaribari. 14 Mwaha wa yeyo, oliye ohuwiithanani wodhela muthenga dhapama nuulaleyihuni, wihina mwaakele nthithimiho na Nabwiya ehu Yesu Kiristu. 15 Mowindala addibila, mukale txithi ni mudidele ohara mweeddelo muhudhihiwinyu, naarive akala muhudhihiwe ni madhu obe wodhela karta nuulebelihuni. 16 Ohiya eyo, mwinnyene Yesu Kiristu Nabwiya ehu vamodha ni Mulugu Baabihu yoole anoonihile odhivela waye teto anitodonle malabo aamatene ni ejhehedhelo yapama wodhela opama wohinifwanelela, 17 atodole murima dheenyu ni uulibiheni wihina malabo aamatene mweregena dhithu dhapama ni mwawogege madhu apama.