Dhilebiwe ni Matewuji
10 Nuwindo, wawithana anamahara aye 12 wavaha kopolo dhowigarana muzimu dhabure, dhovulumusana dhiredda ni makathamiho oohiyana-iyana.
2 Arumiwi aye 12 baala: Simiyawu, anoniwe ni ndina na Peduru, ni ddibile Andere, Tiyago mwaana Zebedewu ni ddibile Juwawu; 3 Filipi, Bartolomewu, Tome, Matewuji namakukusa musoko, Tiyago mwaana Alfewu, Tadewu; 4 Simiyawu Mukananita,* Judasi Iskariyoti vasogolova aamugulihe Yesu.
5 Yesu waruma arumiwi ale 12, ni wawaddela egihina: “Munahare dila dha malogo mamodha newene munavolowe sidadi dhaSamaritanu; 6 mbwenye mudhowe mwasayele mambila oorimela, anlogo naamwaana Ezarayeli. 7 Mwadhowaga mwalaleyege mwegihina: ‘Omwene wodhulu ohaddamela.’ 8 Mwavulumusege aredda, mwavenyihege anookwa, mwavulumusege aliba maranya ni mwawigarege ademoniyu. Nyu mwakenle mwamahala, bumwahaya mweregena mwamahala. 9 Kamurumedhe wakela oru, parata, newene kobere wihina mpwehe musintuni* mweenyu, 10 teto mulenddoni mweenyu kamuthukule thumba na dhoojha, newene dhowara dhimodha,* sandaliya, newene mukogodho mmodha, mwaha namalaba anofwanelela ovahiwa yoojha.
11 Sidadi-si-sidadi munaafiyinyu mmusayele ole anna efunelo, vano mukarati venvo ofiyedha omaruwa. 12 Mwafiya vaadeva mwalojhelege anamuralaya. 13 Anamuralaya yuwakelani pama, murenddele weenyu okale naaliwa; mbwenye yahuwakelani pama, murenddele weenyu wuhogoloweleni. 14 Mburo-bu-mburo muhunakeliwinyu obe ehinavuruwaniwa muthenga weenyu, mwavenyaga nyumba yeyo obe sidadi yeyo, mutate nthubi namanyalo eenyu. 15 Ginowuwaddelani ebaribari: Labo Nootoriha makathamiho enafuna wafwanya sidadi yeyo, enere okwaranya sidadi ya Sodoma ni Gomora.
16 “Miyo ginurumani ninga mambila vaari va mwiijhi. Mowindala, mukale ooxaga ninga nowa, mbwenye oowoma murima ninga kangayiwa. 17 Pole-pole naathu mwaha aliwa enere wuthukulelani mmatiribunaleni mwewa ni aliwa enere wutxapulani mmasinagoga mwewa. 18 Teto munere othukuleliwa vamentoni vaanamathonga ni vamamwene mwaha wa ndina naaga, wihina mwavahe onamoona ni malogo aatene. 19 Mowindo, yuthukulani kamuthuwathuwe ni madhu munafuninyu wawoga obe ni makalelo munafuninyu owoga, mwaha mudhidhi yoyo munere ovahiwa madhu owawoga. 20 Mwaha anawoga kahi nyu mbwenye muzimu wa Baabinyu bunawoga vamburoni veenyu. 21 Ohiya eyo, muthu nddibile enerege opanana oddibilave, baabi aneere ompa mwanaye, ahima enere wasadduwela makolwiwa ofiyedha wapa. 22 Teto nyu munere widdiwa naathu aatene mwaha wa ndina naaga. Mbwenye anaavilele* ofiyedha omakuthulo dinavulusiwe. 23 Mwaharahariwa sidadi ela muthawele sidadi emodha, ginowuwaddelani ebaribari: Kamunaafiyedhe olaleya sidadi dhaatedhene dhoWizarayeli Mwaana Muthu ahinafiye.
24 “Munaskola kanamukwaranya purusoraye, newene mudhaari kanamukwaranya nabwiye. 25 Enahoweleya sowi munaskola aliganege ni purusoraye, teto mudhaari aliganege nnabwiye. Akala muliba vaadeva ohithaniwa Saddana* ki wera athuya enakala vaade vevale kinere othabwihedhiwa? 26 Bumwahaya kamwawove aliwa mwaha kayiwo ethu yowipiteya ehinooneye, newene kayiwo ethu yoviteya ehinadha enoniwa. 27 Ndhe ginuwaddelimini vayiihini, muwogege vowara, teto ndhe ginuwaddelimini obaruni, mudhowe mwalaleye vadhulu va nyumba. 28 Kamwawove athu enapa mwiili baahi, wula ehandaga opa muneba,* mbwenye mmoove ole anna kopolo dhowutolosani oJhehena.* 29 Kadhinagulihiwa pera biili ni korowa modha?* Naarive dhigali ndo kidha emothela vati newene emodha, Baabinyu ahinonne. 30 Teto mathithi ammuruni mweenyu ehimala okontariwa. 31 Bumwahaya kamoove, nyu muhukanna thima okwaranya pera dhowinjhiva.
32 “Vano muthu yoole anaarumedhe vaari vaathu wihina ali mwimodhani ni miyo, nimiyoya ginere omurumedha vamentoni va Ababa eli odhulu, wihina gili mwimodhani nuliye. 33 Mbwenye muthu yoole anagikodde vamentoni vaathu, nimiyoya ginere omukodda vamentoni va Ababa eli odhulu. 34 Kamubuwele wihina gadhana murenddele elabo yavati, kagidhilena murenddele, mbwenye supadda. 35 Mwaha gidhile wamwalaniha athu: mwanamulobwana naababe, mwanamuhiyana naamaye, teto nzaliye ni nzaliyaye. 36 Mwebaribarene amwiddani a muthu enakale yaale anakaliyena vaade vaye. 37 Ole anathabwa wadhivela ababe obe amaye ogikwaranya miyo, kanafwanelela okala namahara aaga teto ole anathabwa omudhivela mwanaye mwanamulobwana obe a mwanamuhiyana ogikwaranya miyo kanafwanelela okala namahara aaga. 38 Ole ahinarumedha ntxikwa naye na goyi* ni ahinagihara, kanafwanelela okala namahara aaga. 39 Ole anafuna ovulusa egumaye aneere oyelela, mbwenye ole anaayelele egumaye mwaha wa miyo, aneere ofwanya.
40 “Ole anuwakelani, anagakela miyo, teto ole anagakela miyo anamwakela Nuleya agirumile. 41 Ole anamwakela namavuhulela mwaha wokala namavuhulela aneere wawakela mareeliho ooligana ni anamavuhulela, teto ole anamwakela muthu owogowa mwaha wokala muthu owogowa, aneere wawakela mareeliho ooligana ni a muthu owogowa. 42 Yoole ananvahe kopo emodha ya manjhe waathu yaala ang’ono naarive egaali kopo emodha ya manjhe ooridha mwaha wokala namahara, ginowuroromelihani wihina aneere wawakela mareeliho mowiwanana ni ethu yeele eriliyena.”