Alebeliye Akudda Romanu
1 Miyo Pawulo, mudhaari a Kiristu Yesu, giithaniwe wihina gikale murumiwi ni githomiwe wihina gilaleye muthenga dhapama dha Mulugu, 2 apaganyiliye wodhela anamavuhulela aye mu Dholebela Dhootaleleya, 3 muthenga wawoga wodhela Mwanaye, adheele nihimo* na Davidi epaddi yomwiilini. 4 Mbwenye, ni kopolo dha muzimu wotxena avenyihiwiye muukwani, ofiyedha ononiwa ninga Mwaana a Mulugu (hee, Yesu Kiristu Nabwiya ehu, 5 wodhela oliye naakenlihu opama wohinifwanelela ni orumiwi, wihina athu amalogo aamatene yonihe nroromelo newa ni emwiwelele wihina ethithimihe ndina naye.* 6 Malogo yayo ni nyuwa mwithaniwinyu wihina mukale a Yesu Kiristu), 7 ginulebelani nyu aatene muli oRoma, Mulugu anudhiveliyeni ni mwithaniwe wihina mukale oweela:
Mwaakele opama wohinifwanelela ni murenddele wa Mulugu, Baabi ehu ni a Nabwiya Yesu Kiristu.
8 Vobajha, ginomutamalela Mulugu aaga wodhela Yesu Kiristu ni nyu aatene, mwaha nroromelo munninyuna nnowogiwa wapela elabo yaatene. 9 Mulugu ginamparelimi mabasa ootaleleya ni kopolo dhaaga dhaatedhene, gilaleyaga muthenga dhapama wodhela Mwanaye, dili namoona aaga wihina ginowusorihani* mudhidhi waatene gaalobelaga, 10 gimulobaga wihina dhenyeya teto akala sifunelo ya Mulugu, gidhe guwaredheleni. 11 Mwebaribarene ginofuna vanlubale wuwoonani, wi gugawelemoni mareeliho a Mulugu wihina mukale ooliba; 12 obe geere, nlibihane mmodha ni mukwaye wodhela nroromelo neenyu ni naaga.
13 Mbwenye addibila, ginafuna munone wi malabo owinjhivene gihubuwela odha wuwaredhelani wihina goone akala mabasa aaga oolaleya enere okannawo dhowima dhapama ninga gerilimi ni malogo mamodha; mbwenye ofiyedha peeno ehikala ethu ehinagenyiha odha. 14 Gihikanna mangawu ni aGerego, anyawedda,* ale enna enonelo naaleya ehinna enonelo; 15 mwaha wa yeyo gili oothuwathuwene wihina gulaleyeni muthenga dhapama nyu aatene munakala oRoma. 16 Miyo kaginakanna manyazo olaleya muthenga wapama. Mwaha owedha wa Mulugu wihina muthu yoole anna nroromelo avuluwe, obajha ni muJudewu vamodha nuleya ali muGerego. 17 Waathu yaale enna nroromelo, Mulugu onowawoniha wogowa waye wodhela muthenga dhapama, mowindala ninga dholebela dhinawogiwa dheegi: “Mbwenye muthu owogowa aneere okalawo mwaha wa nroromelo naye.”
18 Mulugu oodhulu anowanyanyuwela athu oohiwelela ni oohogowa. Mwaha aliwa enowerana dhithu dhabure wihina yabarele athu amodha enafuna onona ebaribari, 19 bumwahaya aliwa enohowela omunona Mulugu, woona wi oliye ohawooniha dhithu dhowinjhiva. 20 Dhikalelo dha Mulugu nihinandihu woona, kopolo dhaye ni nthithimiho naye, nnowoona naasugwaga dhopaddusa dhaye obajha omambelelo wa elabo, mwaha dhikalelo dhaye dhinowoneya mwa dhopaddusiwa dhaatedhene, bumwahaya, aliwa enakooddela ebewene wihina Mulugu ohukalawo. 21 Teto, naarive egamunonne Mulugu, kimuthithimihile ninga Mulugu, newene kimutamalele, mwaha mubuwelo wewa kunna mabasa ni kinoonelamo ethu. 22 Naarive ewogaga wihina athu athotho, aliwaya ataduwa, 23 mwaha ohiya omuthithimihaga Mulugu ahinakwa, enathithimiha dhikwamuthu dhoosema dhinaligana ni muthu anakwa, balame, anenyama a moddo minnayi ni owiburula.
24 Mowindo, Mulugu ohahiya werana dhithu dhonyakavala dhiniwanana ni efunelo yewa, wihina enyemule mwiili wokala wewa. 25 Aliwa ehisaddula ebaribari ya Mulugu wihina erumedhege dhowoota, ehikokorela ni ehebedha dhopaddusiwa ohiya omwebedhaga Mpaddusiya anathithimihiwa ni mukalakala. Amem! 26 Bumwahaya Mulugu adhe aahiyege weragana dhithu dhamanyazo, ahiyaniwaya egonihanaga ahiyanave ehiyaga ekalelo yemuthu, 27 teto nalobwaniwaya ehihiya ekalelo yemuthu, vano ohiya wagonihaga ahiyana, wakalelaga murogo alobwana akwiwa, yeragana dhithu dhamanyazo ni esinyusiwaga* mwaha wa obure wewa.
28 Woona wihina kifunne omunona Mulugu,* oliye wahiyedha mubuwelo wewa wonyakavala wihina yeregena dhithu dhahifwaneleliwa werana. 29 Mwaha aliwa eherana dhithu dhaatedhene dhohogowa, kinonne olevelela, athu anrima ni babure, teto ehithabwa nrima, anamapa, aliba okangana, anamaleketha, enowaganana akwiwa obure, ni enodhiveliwa onong’ona, 30 aliba waaba, yomukalela ntxiga Mulugu, yaali athu ohuleleya, owithukula, oothabwa wivaha thima, yasayelesa werana dhithu dhabure, ohawiwelela abaabiwa,* 31 ohukanna enonelo, ohupanganeyena, ohukanna emuthu yapama ni oohukanna thagaraga. 32 Naarive eganonne nlamulo nowogowa na Mulugu wihina athu yaale enerena dhithu dhendha enofwanelela opiwa, ohiya odidelave werana dhithu ndha, aliwa enowahanyedha ale enerana.