Ovuhulela wa Juwawu
13 Oliye* wimela vamutxesani sere-sere ya niya.
Nuwindo, miyo omoona mwanenyama owoopiha akumaga muniya anna manyaga 10 ni musolo 7, vadhulu vamanyaga aye vahikala kara 10 dhomwene, mbwenye kadda musolo wahikanna mandina yamuruwana Mulugu. 2 Mwanenyama ole owoopiha gamonilimi akala ninga nyarugwe mbwenye manyalo aye yakala ninga nikurukumwa teto mulomo waye wakala ninga poddogoma. Vano Nowa onvaha kopolo mwanenyama ole owoopiha, mpaddo waye woomwene ni owedha winlubale.
3 Musolo waye mmodha goonilimi wakala ninga were oporosiwa vanlubale, mbwenye nikwadda nne ninlubale aafiyedhiyena okwana ovola, teto athu eelabo yaatene yomuhara mwanenyama ole owoopiha emutikinaga. 4 Yokokorela nowa ele mwaha yahinvaha owedha mwanenyama ole owoopiha, ni yomukokorela mwanenyama owoopiha ni madhu yawoga yegihina: “Baani analigana ni mwanenyama ola owoopiha, ki anna kopolo dhowana ni oliye baani?” 5 Mwanenyama ole owoopiha ovahiwa mulomo wihina aawogege madhu owiithukulana ni awogege dhithu dhinamutakalela Mulugu, teto ovahiwa owedha wihina eregena dhithu anafuniye muwari mwa mweeri 42. 6 Oliye ofugula mulomo waye wambela omuruwana Mulugu, oruwana ndina naye ni mburo onakaliye, naaleya enakala odhulu. 7 Oliye wenyiwa owana koddo ni oweela wihina agonjhihe, ni ovahiwa onamathonga wihiha aathongege mahimo maatene, athu aatene, dhiwogelo ni malogoya. 8 Athu aatene enakala veelaboni yavati enere omwebedha. Obajha vipadduseliwe elabo mandina ewa kinalebiwege mulivuruni neegumi na Mwana Nimbila napiwe.
9 Muthu yoole anna mabaru owiiwa, avuruwane. 10 Akala muthu anofwanelela othukuleliwa wuudhaarini aneere othukuleliwawo. Muthu yoole anaampe mukwaye ni supadda, aneere opiwa ni supadda. Wa ale eli oweela enohoweleya onona ovilela ni okanna nroromelo.
11 Nuwindo, miyo omoona mwanenyama mmodhaya owoopiha akumaga elabo yavati, aanna manyaga menli yakala ninga manyaga a Mwana Nimbila mbwenye wambela owoga ninga nowa enlubale. 12 Oliye onowoniha vamentoni vaye owedha wimodhave anna mwanenyama owoopiha oobajha. Oliye onoweriha elabo yavati ni athu aatene enakalavo omwebedha mwanenyama owoopiha yoole nikwadda naye namanle ovola. 13 Onowawerana matikiniho manlubale vamentoni vaathu aatene, ofiyedha okitihedha mootho velaboni yavati okumaga odhulu.
14 Mwanenyama ola owoopiha anowaleketha ale enakala elabo yavati, mwaha wa dhintelelo avahiwiye wihina eeregena vamentoni va mwanenyama owoopiha oobajha, wula awaaddelaga ale enakala elabo yavati wihina eseme ekwamuthu ya mwanenyama aakakathiwe ni supadda, naarive dhigaali ndo oliye kakwile. 15 Oliye wenyiwa wihina avahe egumi* ekwamuthu ya mwanenyama owoopiha wihina yandege owoga ni erihe wihina aatene yaale enaakoodde weebedha ekwamuthu ya mwanenyama owoopiha oobajha, epiwe.
16 Oliye onowawaddihedha athu aatene, ang’ono ni anlubale, ooreela ni oohaawa, ootapuwa ni adhaari, wihina yakele yintelelo nlada na moono woojha obe vakoveni, 17 wihina ahikalewo muthu anagulege newene anaagulihege ahili muthu yoole anna yintelelo obe ndina na mwanenyama ni nummero na ndina naye. 18 Eyo enohoweleya okanna thotho: ole anna enonelo eekele konta numero na mwanenyama owoopiha, mwaha nummero nna tha muthu. Nummerona thinna 666.