Ovuhulela wa Juwawu
16 Nuwindo, miyo wiiwa ndhu nootama nakuma mburo wotaleleya wa mutempulu nawaddelaga angero 7 negihina: “Kadhowani mwakuthulele elabo yavati mapusulano 7 a owali wa Mulugu.”
2 Mungero oobajha, odhowa okuthulela pusulano naye elabo yavati. Athu yaale yanna yintelelo ya mwanenyama ole owoopiha ni yebedha ekwamuthu yaye yosema, ofwanyiwa makwadda oovereya ni owoopiha.
3 Mungero anabiili, odhowa okuthulela pusulano naye muniya. Vano niya yaatene osadduwa okalaga ninga nikame na muthu apiwe teto dhopaddusa dhaatedhene dha muniya okwa.
4 Mungero anatharu, odhowa okuthulela pusulano naye mwiiko ni mburo munakuma manjhe. Vano manjheya osadduwa okala nikame. 5 Nuwindo, miyo omwiwa mungero aalamulela manjhe egihina: “Mulugu, nyu muli ole ali ni aali, Oororomeleya ni owoogowa mwaha nyu muhulamula wihina dhithu ndha dhereye, 6 mwaha aliwa ehikuthula nikame naathu oweela ni nanamavuhulela, teto nyu muhavaha nikame wihina eng’we; woona wihina siyeyo aliwa enafwaneleliwa.” 7 Miyo omwiwa altare awogaga egihina: “Hee, Yehova* Mulugu Akopolo Dhaatedhene, otoriha weenyu fwebaribari ni wowogowa.”
8 Mungero anennayi, odhowa okuthulela pusulano naye vanduwani. Vano nduwa ovahiwa owedha wihina nambele wapaha athu ninga mootho. 9 Athu wambela opaheya vanlubale mwaha oviha, mbwenye aliwa oruwanaga ndina na Mulugu anna owedha wa mulili ndha teto kithwaruwile newene kimuthithimihile.
10 Mungero anetanu, odhowa okuthulela pusulano naye vampaddoni voomwene va mwanenyama ole owoopiha. Vano omwene waye okala yiihive, teto athu wambela waaluma malumi mwaha woovereya, 11 mbwenye aliwa omuruwana Mulugu oodhulu mwaha overeya yooniwa ni makwadda yanniwana, naarive dhigaali ndo kithwaruwile dhowera dhewa.
12 Mungero anetanu nammodha, odhowa okuthulela pusulano naye muhinjhe munlubale Ewufarati. Manjheya wummamo wihina awegeredhele dila mamwene oomadhelo nduwa.
13 Ni gahawoona madhu mararu oonyakavala,* yakala ninga anapulu, ekumaga muwano mwa nowa enlubale, muwano mwa mwanenyama ole owoopiha ni muwano mwa namavuhulela owoota. 14 Mwebaribarene, ala madhu enadhela wa ademoniyu ni enowerana dhithu dhotikiniha; enowatujela mamwene eelabo yavati, wi etugumanele owana koddo ya labo ninlubale na Mulugu, Akopolo Dhaatedhene.
15 “Ovuruwane: Ginadha ninga mbava. Oohagalala di muthu yoole anakala mento ni ahinaakuguule* dhowara dhaye, wihina anaadhe eedde madave ni wihina ahivahege manyazo athu yaamusugwaga.”
16 Ni ehitugumana mburo ni Ebarayiku onithaniwa Armajedo.*
17 Mungero anetanu nabiili, okuthulela pusulano naye odhulu. Nuwindo okuma ndhu nootama mburo wotaleleya, vampaddoni voomwene negihina: “Ehakwanela!” 18 Ni wahikala ojerima, madhu ni dari teto wahikala oddiginyeya weelabo winlubale, wohiyana ni oddiginyeya waatewene weelabo winereyaga obajha vipadduseliwe athu elabo yavati kawinereyege. 19 Luwani enlubale ogaweyamo dhipaddi tharu teto luwani dhaathu a malogo obwanyuwa. Vano Mulugu omubuwela Babiloniya Munddimuwa wihina anvahe kopo ya vinyu muli owali waye. 20 Ohiya eyo, dhiliga dhaatedhene othawa teto mwango orimeela. 21 Nuwindo mabwe manlubale a maralala omora odhulu yamorelaga athu, kadda nibwe nanyemela talentu modha,* mwaha wa yeyo athu wambela omuruwana Mulugu mwaha wa mulili wa maralala, woona wi muliliya wahithabwa wunnuwa.