Dhilebiwe ni Matewuji

22 Voharela Yesu wawaddela yoladdaniha emodha, egihina: 2 “Omwene wodhulu onaladdanihiwa ni mwene awegeredhe mathanga a matelo a mwanaye. 3 Oliye waruma adharaaye wihina yawithane athu aasonkeye wihina edhe vamathangani vamatelo, mbwenye aliwa okoodda oyawo. 4 Waruma adhaari amodha egihina: ‘Gihimala wawegeredha mathanga aamatene: “Ng’ombedhaaga; anenyama aaga ooruva ehimala opiwa, teto dhaatedhene dhimala wegeredhiwa. Mudhe mwaajhe mathanga a matelo.”’ 5 Mbwenye aliba osokiwa* ale kiyapwanthe ethu, aliwa odhowaga, mmodha odhowa omunddani waye, mmodhaya odhowa omalonddani waye; 6 teto amodhaya wahidda adhaari aye wawukutha ni waapa.

7 “Mwene ole otakaleliwa vanlubale, waruma anyakoddo aye waapa apanga ale ni opaha sidadiwaya. 8 Nuwindo owoga nadhaari aye egihina: ‘Gihimala wawegeredha mathanga aamatene, mbwenye athuya gasonkemi kiyaali oofwanelela. 9 Mowindala kadhowani murampani enadhela musidadi, mwawithane athu bure-bure munafwanyinyu wihina edhe yaajhe mathanga a matelo.’ 10 Nuwindo adhaari ale odhowa watugumanya athu aatene yafwannyiwa murampani, athu abure ni apamaya, vano mburo ole wegeredhiwe mathanga a matelo odhaalamo athu.*

11 “Mwene nuuvolowa wihina awoone athu yasokiwe, omoonamo mulobwana dhaala ahawanre guwo dha matelo. 12 Omukoha egihina: ‘We mulobwana wandile addi ovolowa muna ohiwanre guwo dha matelo?’ Oliye kuhukanna yowoga. 13 Vano mwene ole waruma adhaari aye egihina: ‘Mummage mada ni manyaloya mwindo munvokedhe ode oyiihini. Wengo funakale wunla ni watakuna meeno.’

14 “Mwaha enoosokiwa athu owinjhiva, mbwenye ang’onove binasakuliwa.”

15 Vano, Afarizewu ovenyavo odhowa ompanganela wihina emukone ni madhu aye. 16 Nuwindo waruma anamahara ewa vamodha nnikuru namukavihera Erodi, wihina yamukohe yegihina: “Namahudhiha, nihinona wi dhithu munawoginyu sebaribari, munahudhiha dila ya Mulugu ni ebaribari teto kamunasayela wahagalasa athu, newene kamunasugwa ekalelo yewa yoode. 17 Kanaaddelemoni, munoonamo aavi enowenyeya* omuliva Sezare musoko obe naari?” 18 Mbwenye Yesu nunona obure wewa, wawaddela egihina: “Anamaleketha nyu, munagehela ddi? 19 Kagoniheni korowaya enaliviwa musoko.” Aliwa odhana korowa modha ya denariyu.* 20 Oliye wakoha egihina: “Kove ela ni madhu ala elebiwe vala bawani?” 21 Aliwa omwakula yegihina: “Ya Sezare.” Vano oliye wawaddela egihina: “Mmulive Sezare ele eli ya Sezare, mbwenye mmulive Mulugu ele eli ya Mulugu.” 22 Nuwawiwa madhu yaala aliwa otikina vanlubale, omwihiya aliwa odhowaga.

23 Mudhidhi yoole asadusewu yawoga wihina kawili ovenyihiwa muukwani, omwaddamela Yesu ni omukoha yegihina: 24 “Namahudhiha, Moyizeji awonge egihina: ‘Muthu akwa ahimwihiyile mwaana ddibileya amutele mamukweleya wihina nihimo nne na ddibile nnakwele.’ 25 Epadduwe sowihina, yahikalawo alobwana 7 yaali oddibila. Oobajha otela, mbwenye okwa ahimwihiyile mwaana, woona wihina kamwihiyile mwaana ddibile omutela mwariyeya. 26 Opadduwa emodhave ni anabiili ni anatharu teto ni aatene yaale 7. 27 Vano omakuthulowa muhiyanaya okwa. 28 Mowindala, wafiya mudhidhi wovenyihiwa anookwa aatene yaala 7 mamuneya anakale aani? Mwaha aatene yahimutela.”

29 Yesu wawakula egihina: “Nyu munowileketha, mwaha kamunonne Dholebela, newene kamunonne kopolo dha Mulugu; 30 mwaha anookwa yavenyihiwa alobwana kinaatelege, newene ahiyana kinaateliwege, mbwenye enakalege ninga angero oodhulu. 31 Wodhela ovenyihiwa waanookwa, nyu kamunilerigi ele Mulugu awogiliye egihina: 32 ‘Miyo gili Mulugu Aabaraawu, Mulugu a Izaki ni Mulugu a Jako?’ Oliye kahiyo Mulugu aanookwa mbwenye aathu ookalawo.” 33 Muthithi ole waathu nuwawiwa madhu yayo otikina ni makalelo aye oohudhiha.

34 Vano afarizewu nuwiwa wihina Yesu ahaamaliha asadusewu, aliwa witaganyihedha okala nikuru nimodhave. 35 Mmodha wa aliwa aanonne pama Malamulo, omweha Yesu nnikoho nimodha egihina: 36 “Namahudhiha, muwari mwa Malamulo aamatene, ninlubalena thivi?” 37 Oliye omwakula egihina: “‘Omudhivelege Yehova* Mulugu awo ni murima wawo waatene, egumawo yaatene* ni mubuwelo wawo waatene.’ 38 Nna nlamulo noobajha ni ninlubalena. 39 Nanabili nnaligana nnenna thinna: ‘Omudhivelege mwanddamani awo ninga onidhiveliwe.’ 40 Malamulo aamatene yaala enakumela vevala.”

41 Vano afarizewu egatugumane Yesu wakoha egihina: 42 “Munubuwela wi Kiristu baani? Ni mwaana awani?” Aliwa omwakula yegihina: “Mwaana Davidi.” 43 Yesu wakoha egihina: “Akala dhili ndo mwahaya bwaddi Davidi wodhela oveetheliwa adhe amwithanege Nabwiya aaga, egihina: 44 ‘Yehova* ohuwoga nNabwiya aaga egihina: “Okarati moono waaga woojha ofiyedha miyo wapweha amwiddani awo vati va manyalo awo’”? 45 Kito akala Davidi anamwithana Nabwiya, dhinandeya addi oliye okala mwanaye?” 46 Kaavo newene mmodha andile omwakula, okuma labo nenne odhowa osogolo kaavo ahogolowele omukoha.