Dhowera Dhaarumiwi
15 Alobwana amodha odhowa oJudeya ni wambela ohudhiha yegihina: “Addibila mwahineliwa ninga nnawoga nlamulo na Moyizeji, kamunaavuluwe.” 2 Vano, Pawulo ni Barnabe nuumala ovanyihana ni okangana naliwa, orumiwa Pawulo, Barnabe ni amodhaya odhowa oJeruzale wi yatxokotxele muselu* ole ni arumiwi vamodha ni anamaholela.
3 Vano, mulogo nuwavelela, alobwana ala yahidhowa murudda woFinisiya ni woSamariya, teto aliwa yosoriha pamadhene othwaruwa wa malogo, eyo yowahagalasa addibila aatene. 4 Nuufiya oJeruzale, mulogo, arumiwi vamodha ni anamaholela wawakela pamadhene, ni wawaddela dhithu dhowinjhiva yeriliwana ekaviheriwaga ni Mulugu. 5 Mbwenye athu amodha anikuru naafarizewu, yanna nroromelo aliwa ovenya ni owoga yegihina: “Enohoweleya wawinela ni wawaddela wihina yiwelelege Nlamulo na Moyizeji.”
6 Nuwindo arumiwi vamodha ni anamaholela mulogo okarati wihina etxokotxele muselu ole. 7 Ogavinre mudhidhene etxokotxelaga ni ekanganelaga muselu yoole, Peduru ovenya ni owoga egihina: “Alobwana, addibilaga, nyu muhunona wihina okuma malabo oobajha, Mulugu ohugisakula vaari veenyu wihina athu amalogo yiiwe muthenga wapama ni yaaroromele madhu enakuma muwano mwaaga. 8 Teto Mulugu anapendda murima, woniha wihina owarumedha wodhela wavaha muzimu wotxena mwamakalelo mamodhave anivahiliye. 9 Oliye koninhe nsakulo ni iyo vamodha naaliwa, mbwenye wodhela nroromelo yanniwana oliye otxeniha murima dhewa. 10 Kivano, munamwehela ddi Mulugu, mwaapwathelihaga mutholo wonyemela anamahara ala, makolo ehu ehinathukulegiwa newene iyo nihandilihu othukula? 11 Ohiya eyo, nihikanna nroromelo wihina nnere ovuluwa wodhela opama wohinifwanelela wa Nabwiya Yesu, moligana naliwa.”
12 Mwaha wa yeyo nikuru naatene omaala, vano obajha onvuruwana Barnabe ni Pawulo, ewogaga wodhela yintelelo ni matikiniho yaweriliwana mmalogoni ekaviheriwaga ni Mulugu. 13 Vano numala owoga, Tiyago obajha owoga egihina: “Alobwana, addibila, mugivuruwane. 14 Simiyawu ohuwoga pamadhene wi dila yobajha, Mulugu wawubuwela athu amalogo, wihina asakule nlogo niithaniwege ni Ndina naye. 15 Madhu ala enowiwanana ni ndhe dhiwogiwe ni anamavuhulela, ninga dhinawoga dholebela dhegihina: 16 ‘Dhereya ndo, ginere ohogolowela ovenyihedha nyumba* ya Davidi yamothile, gamala ginere wavenyihedha maddebeya ni gawimese dila biili, 17 wihina athu aatene yande omusayela Yehova* ni murima wamutene vamodha ni athu amalogo aamatene, athu enithaniwa ni ndina naaga, anawoga di Yehova, ole anerana dhithu ndha, 18 enoniwe obajha kale.’ 19 Bumwahaya, efunelo* yaaga fuhatotela makathamiho athu ayo a malogo, enasaddula murima dhewa wihina emulabelege Mulugu, 20 mbwenye walebela wihina erabele dhithu ndha dhonyakavala, dhiniwanana ni dhikwamuthu, dha mararuwo,* dhithu dhosothokoliwa* ni dha nikame. 21 Teto obajha kale, akala athu enaalaleya madhu a Moyizeji sidadi ni sidadi mwaha wi enowileriwa ni ndhu nootama aSabadu aatene.”
22 Nuwindo, arumiwi ni anamaholela vamodha ni mulogo watene, othoma waaruma wAntiyokiya alobwana yaasakunliwa wihina edhowe ni Pawulo vamodha ni Barnabe; nuwindo omuruma Judasi ithaniwa Barsaba ni Silaji okala vamodha naaddibila yaholela mabasa vaari va addibila amodha. 23 Aliwa oleba karta nna wavahedhela wihina edhowena:
“Arumiwi, anamaholela vamodha ni addibila, enowavahedha malojhelo aaddibila aatene a malogo, enakala wAntiyokiya, oSiriya ni oSilisiya. 24 Nihiwa dhiwogiwaga wihina vaari veehu ehikumavo athu yutatamuleleni makathamiho mwaha wa dhithu ewogiliwa ni ehixixa ovunganyedha dhithu muhudherinyu, mbwenye iyo kanaavahile yoholela newene modha. 25 Bumwahaya iyo aatene ndhe nthomege wasakula alobwana wihina narume wa nyu vamodha ni addibila nnadhivelihu Barnabe ni Pawulo, 26 epelekile egumi* yewa mwa ndina na Nabwiya ehu Yesu Kiristu. 27 Mwaha wa yeyo, nihimuruma Judasi ni Silaji wihina edhe yuwaddeleni dhithu ndha kove ni kove. 28 Wodhela muzimu wotxena ni iyoya, nihoona wi kahiyo yapama wunyemelihani mutholo mmodha, okwaranya dhithu ndha dhofuneya: 29 mudidele otadha ojha dhego dhikuthiwena mukutho dhikwamuthu, kamujhe nikame, mwanenyama oosothokoliwa,* mwathawege mararuwo* “Mwiwelelaga dhaatedhene dhendha, munere okanna egumi yapama. Mwawakele malojhelo ehu!”
30 Vano nuumala opaganyiwa, alobwana ala odhowa wAntiyokiya, wengo aliwa watugumana athu aatene ni wavahedha karta nne. 31 Aliwa nuumala wileri karta nne, ohagalala vanlubale mwaha wa madhu oolibiha. 32 Woona wi Judasi ni Silaji yaali anamavuhulela, walibiha vanlubale addibila ale ni mwaha dhavathaddo dhowinjhiva, vano aliwa okanna kopolo. 33 Nuumala mwana malabo egaali wewule, addibila waruma ni murenddele wihina ehogolowele wa addibila yaarumile. 34* —— 35 Mbwenye Pawulo ni Barnabe ohala wAntiyokiya naaddibila amodha ehudhihaga ni elaleyaga muthenga wapama wa madhu a Yehova.*
36 Egavinre mwana malabo, Pawulo owoga ni Barnabe egihina: “Vano,* kabe nihogolowele kadda sidadi nilaleyihumo madhu a Yehova,* wihina naawone addibilaya makalelo eliwa.” 37 Barnabe othoma wihina amwihise Juwawu, ithaniwa Marku. 38 Mbwenye, Pawulo kaarumedha wihina emwihise, woona wihina oliye ahahiya egaali oPanfiliya teto oliye kahanre mmabasani yapariwa. 39 Mwaha wa yeyo, aliwa obajha okangana vanlubale, ofiyedha omwalana mmodha ni mukwaye. Nuwindo Barnabe omwihisa Marku wabuwela oXipere. 40 Pawulo omusakula Silaji aliwa omaruwa, addibila walobelela wihina Yehova* aavahe opama wohinifwanelela. 41 Aliwa ovira Sidadi yoSiriya ni yoSilisiya, yaalibihaga addibila ammulogoni.