Aalebeliye Akudda Eberewu
4 Mowindala, woona wihina nnojheha mpaganyo mmodhaya wovolowa mburo waye wowithuwa, nikale pasope wihina newene mmodha wa nyu ahooniwe ninga muthu oohufwanelela ovolowa. 2 Mwaha nihiyoya nihilaleyiwa muthenga wapama ninga aliwa; mbwenye madhu aliwa yawiwaliwa kayakavihere mwaha kayali mwimodhani ni nroromelo vamodha naale yavuruwanne. 3 Bumwahaya iyo ninna nroromelo nihivolowa mburo waye wowithuwa, yoyo oliye awogiliye egihina: “Mowindala miyo nutakaleliwa olibela gegihina: ‘Kamunaavolowe mburo waaga wowithuwa,’” naarive oliye agaamarihile mabasaye obajha vipaddusiwe elabo. 4 Mwaha epaddi dhaala ya yolebela oliye onowoga wodhela labo nanetanu nabiili egihina: “Vano labo nanetanu nabiili, Mulugu waavumela mabasa aapariye,” 5 ni oliye wenjhedhedhave egihina: “Kamunaavolowe mburo waaga wowithuwa.”
6 Mbwenye woona wi ehihala athu amodha wihina evolowe, teto ale yaalaleyiwe muthenga dhapama vobajhavene kiyandile ovolowa mwaha wohiwelela wewa, 7 bumwahaya nuuvira mudhidhi wowinjhiva Mulugu adhe awogege va salmu a Davidi, ninga karta nna niwogiliwa mundduli negihina: “Peeno” mwaavuruwana madhu aaga, munummihe murima dhenyu. Nimakalelo yaala, oliye othoma labo nimodha nnithaniwa “Peeno.” 8 Mwaha, ahere Jozuwe aathukulela mburo wowithuwa, Mulugu kaawogege wodhela labo nimodhana. 9 Mowindala, niihalawo labo nimodha nowithuwa na Sabadu wa nlogo na Mulugu. 10 Mwaha muthu avolowile mburo wowithuwa wa Mulugu, nuuliyeya uhavumela mabasaye, mowindala ninga Mulugu aavumeliye mabasaye.
11 Vano, nilibihedhe wihina nivolowe mburo oyo wowithuwa, mowindala ahikalewo muthu anaamorele murako mmodhave wohiwelela. 12 Mwaha madhu a Mulugu ehikanna egumi ni ehikanna kopolo, bowirwa okwaranya supadda nowirwa wula ni wula, enovolowa ofiyedha ogawa egumi* ni emuthu,* enogawa mune munagumana makuva ni muwari mwa makuva, enowoneyiha mubuwelo ni dhofuna dha murima. 13 Kawo yopaddusa Mulugu ahinandiye woona, mbwenye dhithu dhaatedhene dhinowooniwa nuule nnafunihu wakulela dhowera dhehu vamentoni vaye.
14 Woona wi nihikanna namakutha munlubale agwenle odhulu, Yesu Mwaana a Mulugu, kaniselele owoga vaanamwinjhi nroromelo neehu wodhela oliye. 15 Mwaha namakutha ninnihuna onowanda woonelamo dhoviriganiha dhehu, ohiya eyo, oliye ohehiwa mwamakalelo oohiyana-iyana ninga iyo, mbwenye newene katheegile. 16 Mowindala, naaddamele vampaddoni va Mulugu ananivaha opama wohinifwanelela ni nlobelege wa oliye nihovaga ethu wihina needdeliwe thagaraga ni naakele opama wohinifwanelela onaanikavihere mudhidhi wofwanelela.