Karta Naakudda Kolosense
4 Nyu anabwiya* munna adhaari, mwaweeddihege adhaari enyu mwamakalelo owoogowa ni apama, munonaga wihina ni nyunwa muhukanna Nabwiya ali odhulu.
2 Mudidele olobela, mukale mento ni mukale athu ootamalela. 3 Mudhidhi mmodhave, munilobelelege nihiyoya, wihina Mulugu anivahe ofuru wowalaleya Madhu a Mulugu ni yoviteya yotaleleya wodhela Kiristu, yeyo gimageliwimi ni makurenti, 4 hee, mugilobelelege wihina gande olaleya ninga enahoweleya.
5 Mudidele weedda ni thotho mwakala naathu ehili ammulogoni, mulabihedhaga mudhidhi weenyu mwamakalelo apama. 6 Madhu enyu edhivege ninga yekiwe mwinnyu, wi mwandege omwakula kadda muthu.
7 Tikiku ddibilaga oofuneya, ali murumiwi ororomeleya ni mudhaari mukwihu mwa Nabwiya, aneere wuwaddelani muselu dhaatedhene wodhela miyo. 8 Miyo ginna omuruma wa nyu wihina munone makalelo nilihu ni wihina adhe atodole murima dhenyu. 9 Oliye anadha wengo vamodha ni Onezimu ddibilaga oofuneya ni oororomeleya, ali mmodha wa nyu; aliwa eneere wuwaddelani dhaatedhene dhinapadduwa wuno.
10 Aristarku, munyakambura mukwaaga onowaruma malojhelo wa nyu, vamodha ni Marku, mmudhaye Barnabe (wodhela Marku nyu muhaakela dhoholela wihina mmwakele pama oliye adha wuwaredhelani), 11 vamodha ni Yesu anoniwe nindina na Justu. Ala maJudewu.* Aliwa bi akwaaga nnaaparihu mabasa vamodha, wihina nikavihere Omwene wa Mulugu, teto aliwa ehigilibiha vanlubale. 12 Epafara, mudhaari a Kiristu Yesu adhele owaninyu wengo onowaruma malojhelo wa nyu. Malabo aamatene, oliye onowuulobelelani nuuviheya wihina omakuthulowa mukale owaakwanela ni mukanne ebaribari wodhela efunelo yaatene ya Mulugu. 13 Miyo ginookalela onamoona wihina oliye onolaba ni kopolo dhaye dhaatedhene wihina ukavihereni nyu, aakavihere akudda Lawudiseya ni akudda Hiyerapoli.
14 Lukaji, mediku oofuneya onowaaruma malojhelo, teto Demaji nuuliyeya onowaaruma malojhelo. 15 Malojhelo aaga mwafiyihedhe addibila ooLawudiseya, murogola Ninfa vamodha ni mulogo onatugumana vaade vaye. 16 Teto karta nna namala wiileriwa vaari veenyu, mudhowena wihina niileriwe mulogo woLawudiseya mwamala mwaalobe karta gaalebelimi akudda Lawudiseya wihina ni nyunwa mwileri vaari veenyu. 17 Teto mmwaddele Arkipu wihina: “Aaparege pama mabasa awakeliye mwa Nabwiya, ofiyedha wawakwaneliha.”
18 Miyo Pawulo, malojhelo aagaya baala galebilimi ni madaaga. mudidele wawubuwela makurenti gimagiwimina mukambura muna. Opama wohinifwanelela okale ni nyu.