Alebeliye Akudda Romanu
4 Ki vano niwoge ddi wodhela nikolo nehu Abaraawu? 2 Motajhiha, wogowa wa Abaraawu wahadhele mwaha wa mabasa aapanriye, oliye erege withukula mbwenye kiithukulege vamentoni va Mulugu. 3 Yolebela enawoga ddi? “Vano Abaraawu omuroromela Yehova,* bumwahaya Mulugu adhe amoonege ninga muthu owogowa.” 4 Akala muthu anaapara mabasa onothambila, kahiyo wihina Patarawaye eere othabwa owoma murima, mbwenye oliye onofwanelela othambila. 5 Mbwenye akala muthu onomuroromela Mulugu ni kanaaroromela mabasa aye, Mulugu anamoona muthu yoyo ninga owogowa mwaha wa nroromelo naye. 6 Mwamakalelo mamodhave, ohagalala wa muthu Mulugu anamooniye ninga owogowa, kunadhela mwaha wa mabasa aapanriye, bumwahaya Davidi ohuwoga egihina: 7 “Oohagalala baathu yaale yenrena dhithu dhabure enoleveleliwa, teto dhoothega dhewa dhibibiddeliwe;* 8 oohagalala di muthu yoole Yehova* ahinubuweliye dhoothega dhaye.”
9 Nerege ohagalala wula, bwaathu owineliwa baahi obe ni oohineliwaya? Woona wi nnowoga negihina: “Mwaha wa nroromelo aanna Abaraawu, Mulugu ahifiyedha omoona ninga muthu owogowa.” 10 Waali mudhidhi baani oliye ooniwiye ninga muthu owogowa? Agamanle wineliwa obe ahinathi wineliwa? Aali ahinineliwe. 11 Oliye ahakela yintelelo, yatapulela wineliwa ninga makalelo oorumedhiwa wogowa waye mwaha wa nroromelo aanniyena ahinineliwe teto wihina akale baabi aathu aatene enna nrororomelo naarive yahineliwe wihina naaliwaya yoniwege ninga athu owogowa; 12 vano akale baabi anihimo naathu oohineliwa, ohiya aathuve eniineliwa, mbwenye naaleya enahara nroromelo nimodhave na babihu Abaraawu anniyena ahinineliwe.
13 Kanaali Nlamulo nanvahile Abaraawu vamodha ni odhuulu* waye mpaganyo wowakela elabo, mbwenye yahakela mpaganyo oyo mwaha wogowa winadhela mwaha nroromelo. 14 Akala enaakele mpaganyo baale enaroromela Nlamulo, nroromelona kaninna mabasa teto mpaganyoya kunaakwanele. 15 Ebaribariya sowi, Nlamulo* nnotatamula owali wa Mulugu mbwenye vahili nlamulo kavili yoothega.
16 Bumwahaya mpaganyo ola onere wakwanela mwaha wa nroromelo, mowiwanana ni opama wohinifwanelela, wihina nihimo* naatenene na Abaraawu naakele mpaganyo oyo, ohiya athuve eniwelela Nlamulo, mbwenye naaleya enna nroromelo nimodhave aanna Abaraawu ali baabi a iyo aatene. 17 (Ninga dholebela dhinawogiwa: “Miyo gihuweriha wihina okale baabi a malogo owinjhiva.”) Eyo ehereya vamentoni va Mulugu oliye amuroromeliye ole anaavaha egumi athu ookwa, ni anawoga dhithu dhihiliwo ninga dhihikalawo. 18 Oliye oojhehedha ni ahikanna nroromelo wihina eere okala baabi a malogo owinjhiva, naarive aanganyedhaga wihina eyo kayereye, oliye ahirumedha mwaha wa madhu aaddeliwiye: “Mowindala odhuulu* wawo onere winjhivana.” 19 Naarive ahiyelele nroromelo naye oliye owubuwela wihina kaakanne ahima (mwaha ahanle vang’ono wakwaniha yaka 100), teto woona wi ni mwariyeya Sara kaabala. 20 Mbwenye, mwaha wa mpaganyo wa Mulugu, oliye kahiyile wihina nroromelo naye niridhe, ohiya eyo, ahikanna kopolo mwaha wa nroromelo naye wula amuthithimihaga Mulugu, 21 aganna ebaribari wihina ele Mulugu ampaganyiliye eere wakwaneliha. 22 Mwaha wa yeyo “oliye ahoniwa ninga muthu owogowa.”
23 Mowindo, madhu ala owi “oliye ahoniwa ninga muthu owogowa” kilebeliwe oliyeneve baahi, 24 ni iyoya nnere withaniwa owogowa mwaha nnomuroromela Ole anvenyihile Yesu, Nabwiya ehu muukwani. 25 Oliye apelekiwe mwaha wa dhoothega dhehu, teto avenyihiwe muukwani wi nooniwe ninga athu owogowa.