Karta Noobajha Naakudda Tesalonisense

1 Miyo Pawulo, gili ni Silvanu* vamodha ni Timotiyu, karta nna ginalebela mulogo woTesalonika oli mwimodhani ni Mulugu Baabi ni Nabwiya Yesu Kiristu:

Opama wohinifwanelela ni murenddele, okale ni nyu.

2 Malabo aamatene nnowusorihani naamutamalelaga Mulugu ni naalobelaga, 3 teto vamentoni va Mulugu ehu ni Baabi, kannaaddiwala mabasa munaaparinyu nuuroromeleya, wilibihedha weenyu onadha mwaha odhivela ni ovilela onadha mwaha wa ejhehedhelo munninyuna ni Nabwiya ehu Yesu Kiristu. 4 Addibila oofuneya vamentoni va Mulugu, iyo nihinona wihina duliye usakunleni, 5 mwaha wi muthenga wapama nulaleyihuni kawufwannyeni ninga madhu baahi, mbwenye niherana ni kopolo dha muzimu wotxena vamodha nuhanganyedha; nyu muhunona makalelo needdihu vaari veenyu, wihina nukavihereni. 6 Vano nyu munna otajhiha mweeddelo wehu ni wa Nabwiya, ohiya eyo, muhurumedha muthenga ola nuuhagalala onadha mwaha wa muzimu wotxena naarive moonaga goyi enlubale, 7 ofiyedha okala yotajhiha yapama wa ale enna nroromelo enakala oMasedoniya ni wAkaya.

8 Ebaribariya sowihina, mwaha weenyu madhu a Yehova* kayiweye oMasedoniyave ni wAkaya baahi, mbwenye nroromelo munninyuna ni Mulugu nihivuwa mburo dhaatedhene, ofiyedha iyo ohukanna ethu yowoga. 9 Mwaha ofiyedha peeno, aliwa enna owogave makalelo nuulaleyihuni dila yoobajha ni makalelo mwandilinyu osaddula murima dhenyu mwambela omulabela Mulugu, musukumaga dhikwamuthu dhenyu wihina mukale adhaari a Mulugu ookalawo ni eebaribari, 10 wi mwande omujheha Mwanaye anadheele odhulu, yoyo anvenyihiliye muukwani obe neere Yesu, anafuna onoobola owali wa Mulugu wadha.