Aalebeliye Akudda Eberewu
7 Mudhidhi Abaraawu ahogolowaga okoddoni wadhowiliye waapa mamwene, Melekizedeki yoyo aali mwene ooSale ni namakutha a Mulugu munlubale, ahidhowa ogumana nuliye, vano oliye omureeliha, 2 nuwindo Abaraawu onvaha neekumi a dhithu dhaatedhene anniyena. Vobajhavene ndina naaye nnatapulela “mwene a woogowa”, ohiya eyo, oliye mwene ooSale, enatapulela “mwene a murenddele.” 3 Ababe ni amaye kinoniwe, teto newene mmudhaaye mmodha kanoniwe, vambele egumaye ni vigomeliwa kaawo muthu anonile, oliye analiganihiwa ni Mwaana a Mulugu, bumwahaya onamakutha waye bwamukalakala.
4 Mwebaribarene mulobwana ola aali munlubale, bumwahaya nikolo nehu Abaraawu adhe anvahege neekumi a dhithu dhathima aathukunliye okoddoni. 5 Ebaribari wihina mowiwanana ni Nlamulo ahima a Levi yaali anamakutha yohowela omukukusa neekumi a nlogo obe aaddibiliwa naarive nlogona nigaali odhuulu wa Abaraawu. 6 Naarive mulobwana ola ahili a nlogo na Levi, oliye ahimwakela neekumi a Abaraawu ni omureeliha ole aavahiwe mpaganyo. 7 Ebaribari wihina ole anareeliha dimunlubaleya ompitha ole anareelihiwa. 8 Alevita enna ofuru womwaakela neekumi, athu enakwa, mbwenye mulobwana mmodhaya aamwakenle neekumi, dholebela dhinonvaha onamoona wihina oliye ohukalawo. 9 Teto podi owogiwa wihina wodhela Abaraawu, Levi amwakelesa neekumi nuuliyeya oohowela omuliva neekumi aaye, 10 woona wihina mudhidhi Melekizedeki agumanaga ni Abaraawu, Levi aali ahinathi okala odhuulu waye.
11 Nlamulo na Moyizeji naavahiwe amwaana Ezarayeli thawoga wihina anamakutha edheelege nihimo naaLevita. Akala anamakutha a nihimo na Levi yomuthukulela muthu ologomana, iyo neerege omuhoowela namakutha mmodhaya ninga Melekizedeki? Kiyaakwana okanna namakutha mmodha baahi ninga Arawu? 12 Bumwahaya agwelavo namakutha muxa, enohoweleya osadduliwa ni Malamuloya. 13 Muthu anawogiwa vala adheele nihimo nimodhanene teto kaawo muthu a nihimo nenna anarajhihaga olaba waltareni. 14 Mwaha enowooneya wihina Nabwiya ehu aali a nihimo na maJudewu, mbwenye Moyizeji kaawogile wihina anamakutha yaadheelege nihimo nenna.
15 Teto peeno dhaatedhene ndo dhinowooneyelamo pamadhene nuukumelela namakutha mmodhaya ooligana ni Melekizedeki, 16 aali namakutha ohiya mwaha wa nihimo wadheeliye ninga Nlamulo nawogiwa, mbwenye mwaha wa kopolo dha egumi yahinanongeya. 17 Dholebela dhinovaha onamoona wihina: “We oli namakutha a mukalakala ninga mwakalele Melekizedeki.”
18 Mowindala, Mulugu ohaavenyihavo malamulo akale mwaha kinna kopolo ni kinanda onikavihera. 19 Mwaha Malamulo kiyandile ologomaniha ethu, mbwenye ejhehedhelo yapama Mulugu ananivahiye ehanda werana eyo, teto wodhela ejhehedhelo eyo nnowanda omwaddamela Mulugu. 20 Mwaha Mulugu amuthomaga Yesu ninga namakutha, ahilibela 21 (ebaribariya sowi ehikalawo athu yaathomiwe wihina ekale anamakutha ehirajhihile olibeleliwa, mbwenye ola anawogiwa nuuthomiwa ninga namakutha, ahilibeleliwa ni Ole aawogile egihina: “We oli namakutha amukalakala teto ‘Yehova* alibela kanahogolowela mundduli’”). 22 Mowindala, Yesu dinalibiha nipangano napama. 23 Ohiya eyo, yoohooweleya okalawo anamakutha owinjhiva wihina ehiyedhanege mmodha ni mukwaye mwaha okwa kuwaweenya aliwa okalagave anamakutha; 24 mbwenye woona wihina oliye onookalawo ni mukalakala, kaawo muthu anahaba* onamakutha waye. 25 Mowindala, oliye ohukanna kopolo dhowavulusa ale enamwaddamela Mulugu wodhela oliye mwaha anerege okalawove ni mukalakala wihina aakaviherege.
26 Mwaha sofuneya iyo okanna namakutha munlubale owi ndala: oororomeleya, ahinna muladdu, ahinaligana naathu oothega ni agwelihiwe odhulu okwaranya odhuluwa.* 27 Mohiyana ni anamakutha akale, oliye kanahoowela ovelela mukutho malabo aamatene wodhela dhoothega dhaye newene dha nlogo mwaha oliye ohuvelela dila modha baahi wihina okale mukutho wamukalakala mwaha opeleka egumi yaye. 28 Nlamulo nnaathoma athu enna yoothega wihina ekale anamakutha anlubale mbwenye olibela wa Mulugu eriliyena Nlamulo nuuvira, omuthoma Mwaana ali oologomana ni mukalakala.