Aalebeliye Akudda Eberewu
8 Dhaatedhene ndha nnawogihu thomoya siila: Iyo nihikanna namakutha munlubale ninga yoola, teto oliye akiratile moono woojha wa Mulugu munlubale ali odhulu; 2 oliye mudhaari a mburo woweela ni a ddammwa eebaribari amagiwe ni Yehova* ohiya ni athu. 3 Mwaha namakutha munlubale aatene anathomiwa wihina apelekege nvaho ni akuthege mukutho, mowindo yohoweleya namakutha oyo munlubale nuuliyeya akanne ethu-siithu wihina apeleke. 4 Oliye ahakale elabo yeela yavati kaakale namakutha, woona wihina ehikalawo athu enapeleka nvaho mowiwanana ni Nlamulo. 5 Alobwana ayo enaapara mabasa ootaleleya ninga murunti wa dhithu dhinereya odhulu, mowiwanana ni nlamulo Mulugu anvahiliye Moyizeji wodhela makalelo oomaga ddammwa. Oliye owoga egihina: “Okale pasope wihina werena dhithu dhaatedhene mowiwanana ni dhoholela ovahiwiwe vamwangoni.” 6 Mowindala, vano Yesu ohuvahiwa mabasa athima mwaha oliye mwanamukathi* a nipangano napama ni atikiteriwe mowiwanana ni mpaganyo wa malamulo apama.
7 Nipangano nne noobajha nahere nahikanna nihonya, kanahowelege nipangano nanabiili. 8 Mwaha oliye onowoona wihina athu kilogomanile bumwahaya agawoga egihina: “‘Kasugwani! Enna waaddamela malabo,’ ‘ginafunimi werana nipangano nixa ni nyumba yaEzarayeli ni yaJuda, anawoga di Yehova.* 9 Kannaakale nipangano ninga gerilimina ni makolo eenyu labo gaapareelimi moono wihina gaathukulewo elabo yoWijipitu, mwaha aliwa kayadidele wiwelela nipangano naaga, bumwahaya gidhe gaasukumege,’ anawoga di Yehova.”*
10 “‘Nna thi nipangano ginafunimi werana naaliwa yavira malabo yayo,’ anawoga di Yehova.* ‘Ginere wapweha malamulo aaga mmubuweloni mwewa ni ginere waaleba mmurimani mwewa. Vano miyo ginaakale Mulugu ewa teto aliwa enaakale nlogo naaga.
11 “‘Kanaakalewo muthu anaamuhudhihege muwaniwa mukwaye obe ddibile, egihina: “Omunone Yehova!”* Mwaha athu aatene enere oginona, obajhana mwaana ofiyedha ni anlubaleya. 12 Gineere okalela thagaraga dhowera dhewa dhohogowa ni kagidha guubuwela dhoothega dhewa.’”
13 Awogaga wodhela “nipangano nixa,” oliye weeriha wihina nipangano nne nakale nihikanne mabasa. Nipangano nahikanna mabasa ni nadduwa nnahala vang’ono wihina ndduguddeleye.