Aalebeliye Akudda Eberewu
2 Bumwahaya, enohoweleya opwasedha ovuruwana pamadhene dhithu nniwihu, wihina nihipupuruwe. 2 Mwaha akala madhu ewogiwe wodhela angero beebaribari, teto anamathega aatene ni aliba ohiiwelela yosinyusiwa mowiwanana ni wogowa, 3 nnande addi ovuluwa nalamusa ovulusiwa wula winlubale? Mwaha Nabwiya ehu dambele ovuwiha ebaribari eyo, vano ale yiwale onaaddela iyo, 4 teto Mulugu ohitaganyihedha naaliwa mwaha ovaha onamoona wodhela dhintelelo, matikiniho, mabasa oohiyana-iyana akopolo ni aavahaga muzimu wotxena mowiwanana ni efunelo yaye.
5 Mwaha Mulugu kaarumile angero wihina ethonge elabo enadha osogolo, yeyo nnawogihu. 6 Mbwenye epaddi dhaala ya Dholebela, muthu mmodha akalenle onamoona ahiwoga egihina: “Muthu baani ofiyedha nyu omubuwelaga, obe mwaana muthu baani ofiyedha nyu omusamaalelaga? 7 Nyu muhumuyeviha vang’ono waakwaranya angero amodha; nyu muhunvuwiha ni muhunvaha nthithimiho ni muhunvahedhela dhithu dhaatedhene mpaddusilinyu wihina athongege. 8 Nyu muhupweha dhithu dhaatedhene vati va manyalo aye.” Mulugu apwehaga dhithu dhaatedhene vati va manyalo aye, kawo ethu ahimwihiyedhiliye. Mbwenye peeno iyo kannanda woona dhithu dhaatedhene amwihiyedhiliye. 9 Mbwenye nnamoona Yesu aayevihiwe vang’ono waakwaranya angero, vano agavuwihiwe ni agathithimihiwe mwaha goyi ooniliye ofiyedha okwa, wihina wodhela opama wohinifwanelela wa Mulugu aakwele athu aatene.
10 Dhithu dhaatedhene dhihikalawo wihina dhinvuwihe Mulugu teto dhihikalawo wodhela oliye. Wihina ethithimihiwe ahima owinjhiva sofuneya oliye omweriha Namasogolela Munlubale okala owaakwanela wodhela wavilelana makathamiho, Mulugu onowavulusa wodhela Namasogolela oyo Munlubale. 11 Mwaha Yesu vamodha naale Oliye anaatxenihiye baabiwaya mmodhave, bumwahaya kanakanna manyazo wawithana addibile, 12 egihina: “Ginere wawaddela addibilaga ndina nenyu; vaari va mulogo ginere wuthithimihani ni jhibo.” 13 Teto ohuwoga egihina: “Miyo ginaamuroromelege oliye.” Ni onowenjhedhedha egi: “Kasugwani! Miyo vamodha ni ahima Yehova* agivahiliye.”
14 Mowindala, woona wi “ahimaya” athu enna nikame ni mwiili, nuuliyeya ahikanna nikame ni mwiili, wihina mwaha wa okwa waye, amutolose ole anatota dhithu dhinatatamula okwa, ali Ddiyabo, 15 ni wihina aavuluse aatene yaale yaali adhaari egumiwa yaatene mwaha wowoova okwa. 16 Mwaha oliye kaadhele wakavihera angero, mbwenye adhele okavihera odhuulu* wa Abaraawu. 17 Bumwahaya ohowela wisaddula wihina aliganege ni “addibile” mwa dhaatedhene wihina akale namakutha athagaraga ni oororomeleya wodhela dhithu dha Mulugu, wihina yenyeye ovaha mukutho wofwanelela wodhela dhoothega dhaathu. 18 Woona wi oliyeene ohoona goyi eehiwaga, aneere owedha wakavihera ale enehiwa.