Aalebeliye Akudda Eberewu
3 Mowindo, addibila oweela mwithaneliwe odhowa odhulu, mubuwelege yotajhiha ya Yesu yoyo nimwakenlihu ninga murumiwi nnamakutha. 2 Oliye oomwiwelela Mulugu aamuthomile, ndala ninga Moyizeji aaliye owiwelela mudhidhi alabaga nyumba ya Mulugu. 3 Yesu difwanelele wakela nthithimiho ompitha Moyizeji, woona wi ole anamaga nyumba dinathabwa wakela nthithimiho okwaranya nyumbaya. 4 Ehinoneya wihina nyumba eli yaatene, enamagiwa ni muthu, mbwenye dhithu dhaatedhene apaddusile di Mulugu. 5 Moyizeji aali mudhaari oororomeleya wodhela nyumba yaatene ya Mulugu. Mabasa aapariye yovaha onamoona dhithu Mulugu afuniye werana osogolo, 6 mbwenye Kiristu ninga mwaana a muliba nyumbaya aali oororomeleya wodhela nyumba ya Mulugu. Nyumba eyo ya Mulugu di iyo, nadidelave owoga nihoovile ethu ni naparela pamadhene ejhehedhelo ninnihuna.
7 Mowindala ninga munawogela muzimu wotxena wegihina: “Peeno, mwavuruwana madhu a Mulugu, 8 munummihe murima dhenyu ninga mudhidhi mwatatamulinyu owali waaga wowopiha labo mwageehilinyu mwiddeddereni, 9 mwemune makolo eenyu yageehiliwa ni yahaagiiweleliwa, naarive egawoonile mabasa gaaparilimi muwari mwa yaka 40. 10 Bumwahaya miyo gidhe gitakaleliwege ni nlogo nna ni gidhe giwogege ni nlogo nna gegihina: ‘Mudhidhi waatene aliwa enookodda mmurimani mwewa dhithu ginawogimi teto aliwa kifiyedhile onona dila dhaaga.’ 11 Mowindala miyo nutakaleliwa olibela gegihina: ‘Kamunaavolowe mburo waaga wowithuwa.’”
12 Pole-pole addibila wihina vaari veenyu ahikalevo newene muthu mmodha anaakanne murima wabure ni wahinna nroromelo, mwaha omusukuma Mulugu ookalawo; 13 mbwenye kadda labo mudidele olibihana mmodha ni mukwaye wula nikalagawo mudhidhi oniithaniwa “Peeno,” wihina ahikalewo mmodha wa nyu anummihe murima mwaha ogonjhihiwa ni yoothega. 14 Mbwenye iyo mwebaribarene nnere wakela ethu emodhave Kiristu aakenliye naparela pamadhene nroromelo nannihuna omambelelowene. 15 Ndala ninga dholebela dhinawoga dhegihina: “Peeno mwaavuruwana madhu aaye, munummihe murima dhenyu ninga labo mwaatatamulinyu owali wowopiha.”
16 Ayo yiiwale naarive dhigali ndo etatamula owali wowopiha wa Mulugu baani? Kahiyo aatene yaale yaakumile elabo yoWijipitu eholeliwaga ni Moyizeji? 17 Mulugu aatakaleliwe nnaani muwari mwa yaka 40? Kahiyo ale yatheegile nuwindo epiwa mwiddeddereni? 18 Baani oliye aalibeleliye wihina kinaavolowe mburo waye wowithuwa? Kahiyo athu yaale yahafunne omwiwelela? 19 Nnowoona wihina aliwa kayavolowile mburo wowithuwa mwaha wohukanna nroromelo.