Aalebeliye Akudda Eberewu
9 Owoga wodhela nipangano nne noobajha, nahikanna malamulo wodhela waapara mabasa ootaleleya ni mburo wewa woweela veelaboni yavati. 2 Ddammwa oyo aamagiwe, muwarimwa mwahikala mburo minli, mburo vaapwehiwe panti,* meeza ni pawu dhapelekiwa mukutho, withaniwa Mburo Woweela. 3 Mbwenye okodde wakurtina nanabiili, wahikala mburo mmodhaya wathabwile okala Woweela. 4 Mburo ola ahikalavo altare a woru vapahiwesa insensu ni vahikala nikasa na nipangano naahuruweliwe ni woru, mwaheliwesa biya ya woru mwakala mana ni mukogodho wa Arawu waapwetile* makupu, vamodha ni mabwe yaalebiwevo malamulo a Mulugu; 5 teto vadhulu va nikasa vahikala akerubi oothithimiheya yakuneela tampa ya nikasana.* Mbwenye vano ola kahiyo mudhidhi woofwanelela owoga dhithu dhendha.
6 Dhithu ndha nuwegeredhiwa nimakalelo yaala, anamakutha yoovolowesa epaddi yoobajha ya ddammwa ele wihina yaapare mabasa ewa ootaleleya; 7 mbwenye epaddi yanabiili ya ddammwa avolowesawo di namakutha munlubale teto oliye eerana eyo dila modha vayakani, oliye kaavolowawo ahithukunle nikame wihina akuthe mukutho mwaha dhoothega dhaye ni dha nlogo yeeriiwana ehinonaga. 8 Mowindala, muzimu wotxena onowoniha wi dila yathukulela mburo woweela yaali ehinanoniwe mudhidhi yoole aaliwo ddammwa oobajha. 9 Ddammwa oyo nladdaniho na mudhidhi wa peeno. Mowiwanana ni masasanyedho ayo, athu enoopeleka nvaho vamodha ni mukutho. Mbwenye naarive dhigaali ndo, dhithu ndho kadhinanda otxeniha mubuwelo wa muthu yoole anaapara mabasa ootaleleya. 10 Nvaho ndha ni mukutho dhiniwanana baahi ni dhoojha, dhong’wa ni osuwa dhithu mwa makalelo ohiyana-iyana.* Dhithu ndha dhaali dhoofuneya mowiwanana ni malamulo a mwiili ofiyedha mudhidhi Mulugu anafuniye wegeredha dhithudha.
11 Mbwenye Kiristu nuudha ninga namakutha munlubale a dhithu dhapama dhipadduwile, oliye ohuvolowa muddammwani munlubale ni oologomana, ddammwa ahimagiwe naathu teto kahiyo eelabo yeela yavati. 12 Oliye ohuvolowa mburo woweela ohiya nnikame na mbuzi ni na mwana ng’ombe, mbwenye avolowile nnikame naye dila modha baahi wakwana teto ohunoobola ni mukalakala. 13 Mwaha akala nikame na mbuzi ni na ng’ombe vamodha ni nddoora na ng’ombe dhing’ono noowazeliwa athu yaviriganiha wihina etxenihiwena mwiili wewa, 14 ki owoga wodhela nikame na Kiristu, nipelekiwe wa Mulugu wodhela muzimu wamukalakala ni ohunna nihonya, mweebaribarene nikame nno nnere otxeniha mubuwelo wehu wodhela dhithu dhanthukulele okwa, mowindala nnerege omparela mabasa ootaleleya Mulugu ehu ookalawo!
15 Bumwahaya, oliye muliba wandaniha a nipangano nixa, wihina athu yithaniwe yawakele mareeliho a mukalakala woona wihina yoohooweleya muthu okwa wihina aliwa yoboliwe, wodhela waatapula dhoothega yeriliwana muwari mwa nipangano nne noobajha. 16 Mwaha akala muthu onowerana nipangano ni Mulugu oleya aneerana onofwanelela okwa 17 woona wi nipangano nnakanna mabasa muthu mmodha akwa teto kannakanna mabasa akala muthuya erilena ali amentweene. 18 Bumwahaya, nipangano nakale kanaambele olaba vahili nikame. 19 Mwaha Moyizeji nuumala wawaddela athu dhofuna dhaatedhene dha Malamulo, oliye othukula nikame na ng’ombe dhing’ono ni na mbuzi otaganyihedha ni manjhe, nuumala oliye waathukula mooya oofiila waamagelela ommirini wa izopu* wihina awunyele livuru vamodha naathuya, 20 ni owoga egihina: “Nna thi nikame na nipangano Mulugu uurumiliyeni wihina mukoye.” 21 Nuwindo oliye othukula nikame omuwunyela ddammwa aatene ni dhithu dhaatedhene dhapariwana mabasa ootaleleya. 22 Hee, mowiwanana ni Nlamulo dhithu dhowinjhiva dhinatxenihiwa nnikame, mbwenye vahikuthuliwa nikame newene kawili oleveleliwa.
23 Bumwahaya, yohoweleya murunti wa dhithu dhereya odhulu dhitxenihiwe nimakalelo yaala, mbwenye dhithu dhoodhulu dhinofwanelela mukutho dhapama. 24 Mwaha Kiristu kavolowile mburo woweela osasanyiwe ni mada aathu, oli murunti wa dhithu dheebaribari mbwenye dhinereya odhulu, vano oliye onofiya vamentoni va Mulugu mwaha weehu. 25 Yahoweleya kahiyo wipeleka dila dhowinjhivadhene, ninga namakutha munlubale avolowa mburo woweela kadda yaka nnikame naanenyama ohiya naye. 26 Yahakale yeyo, obajha vipaddusiwe elabo eere woona goyi dila dhowinjhivadhene. Mbwenye vano, omakuthulo wa dhithu dhaatedhene,* oliye wipeleka dila modha baahi wakwana wihina adduguddele dhoothega wodhela mukutho waye. 27 Ndala ninga muthu anakwiiye dila modha baahi amala anootorihiwa, 28 ni makalelo mamodhave Kiristu apelekiwe dila modha wihina athukule dhoothega dhaathu owinjhiva, teto ahogolowa dila yanabiili kanadhela ovenyihavo dhoothega mbwenye aneere wooniwa naathu yaale enamujheha ni murima waatene wihina evulusiwe.