Dhilebiwe ni Matewuji
4 Nuumala, Yesu othukuleliwa mwiddeddereni ni muzimu* wihina eehiwe ni Ddiyabo. 2 Nuumala malabo 40 mutana ni mahiyu ahijhile ethu,* oliye ovoliwa dala. 3 Vano Ddiyabo omususedha, owoga nuliye egihina: “Akala we oli mwaana a Mulugu, kaasaddule mabwe ala ekale pawu.” 4 Nuwindo Yesu omwaakula: “Dholebela dhinawoga dhegihina: ‘Muthu kanakalelawo ni yoojhave baahi, mbwenye anakalawo mwaha wa madhu enakuma muwano mwa Yehova.’”*
5 Nuwindo Ddiyabo omuthukulela sidadi yoweela,* omugweliha mburo wootama otempulu 6 owoga nuliye egihina: “Akala we oli mwaana a Mulugu kivokedhe vati, mwaha dholebela dhinawoga: ‘Mulugu aneere waruma angero aye, edhe yukapule,* wihina nnyalo nawo nihivade nibwe.’” 7 Yesu omwakula egihina: “Ni eyoya ehilebiwa: ‘Kumwehe Yehova,* Mulugu awo.’”
8 Vano Ddiyabo omuthukulela mwango wootama omooniha omwene waatene wa elabo yavati ni nthithimiho newa. 9 Nuwindo owoga egihina: “Ginere wuvaha dhaatedhene ndha wagikokorela ni wagebedha vang’ono.” 10 Yesu omwaakula: “Ogivenyelevo Saddana! Dhihilebiwa: ‘Omwebedhege Yehova* Mulugu awo ni omparele mabasa ootaleleya oliyeene baahi.’” 11 Vano Saddana omwihiya, angero odha wambela omukavihera.
12 Yesu nuwiwa wihina Juwawu ohufugeliwa mukambura, odhowa oGalileya. 13 Ohiya eyo, nukuma oNazare, odhowa okalaga oKafarnawu sere-sere ya niya, murudda wo Zebulawu ni woNafitali, 14 dhithu ndha dhipadduwile wihina yakwanele madhu a namavuhulela Izayiya enawoga yegihina: 15 “Nyu akudda Zebulawu ni akudda Nafitali, munakala dila enadhowa oniya, kobela emodha ya Jordawu, oGalileya winakala athu a malogo mamodha! 16 Athu enakala muyihini ehoona waara winlubale, teto athu enakala murudda wa yiihi yowoopiha* ehifwanyiwa waara.” 17 Obajha mudhidhi yoole odhowa osogolo Yesu wambela olaleya egihina: “Muthwaruwe, mwaha Omwene wodhulu ohaddamela.”
18 Yesu eeddaga sere-sere ya niya yoGalileya, wawoona alobwana abiili yaali oddibila: Simawu aalemeliwe ni ndina na Peduru ni ddibileya Andere, ereyaga nthavi newa muniya, mwaha yaali anamameza. 19 Oliye wawaddela egihina: “Mugiharege, mwaha ginafuna mukale anamameza aathu.” 20 Mohilegela, aliwa wahiya mathaviwa omuharaga. 21 Vasogolova oliye wawoona alobwana amodhaya abiili yaali oddibila: Tiyago mwaana Zebedewu ni ddibile Juwawu. Aliwa yaali mmwanddeyani ni baabiwa Zebedewu yasonaga mathaviwa, vano Yesu wawithana. 22 Mohilegela aliwa ohiya mwanddeyiwa ni omwihiya baabiwa, omuharaga.
23 Yesu ovira murudda dhaatene dhoGalileya, ahudhihaga musinagoga mwewa, alaleyaga muthenga dhapama Dhomwene, aavulumusaga athu yaali aredda ni yanna makathamiho* ohiyana-iyana. 24 Matikiniho aatene aweriyena ovuwa elabo yaatene yoSiriya, vano aliwa wathukula aatene yaale yaali aredda ni yavoreyiwa vanlubale, yanna ademoniyu, aliba ejhilejhile, aliba oragala waadhowana waali Yesu, oliye wavulumusa. 25 Mowindala, muthithi waathu wakuma oGalileya, oDekapoli,* oJeruzale, oJudeya ni kobela emodha yoJordawu, wambela omuhara.