Ovuhulela wa Juwawu
22 Nuwindo, mungero ole ogooniha mwihinjhe wa manjhe eegumi, owi thwelee ninga kiristale, yakuma vampaddoni voomwene wa Mulugu ni va Mwana Nimbila 2 teto manjheya yoothamaga vaari va rampa munlubale. Dhipaddi dhaabilidhene dha mwihinjhe ole dhahikalamo mithanko dheegumi, dhavaha dhowiima dhahaddiwa dila 12 kadda mweeri. Mataakuru a muthanko ndhe yowavulumusa athu a malogo.
3 Kamunadha mukala wulumeliwa. Mbwenye mpaddo woomwene wa Mulugu ni wa Mwana Nimbila, onaakale muluwani teto adhaari aye enerege omparela mabasa ootaleleya; 4 aliwa eneere woona kove yaye teto ndina naye nnere olebiwa vakoveni vewa. 5 Ohiya eyo, vati kavinaaribege, aliwa kinaahowelege waara wa lampada newene waara wa nduwa, mwaha Yehova* Mulugu dinamoneyelege vano aliwa enerege othonga nimukalakala.
6 Oliye ogaaddela egihina: “Madhu ala boororomeleya ni beebaribari. Hee, Yehova* aavethele anamavuhulela ohumuruma mungero aye wihina aatonyihedhe adhaari aye dhithu dhinafuna wereya mohulegela. 7 Kavuruwana: Ginadha mowaguva. Oohagalala di muthu yoole anaavuruwana madhu a yovuhulela enafwanyeya muroluni muna.”
8 Miyo Juwawu, davuruwana ni doona dhithu ndha. Miyo nuumala wiiwa ni woona dhithu ndha, okokora vamentoni va mungero ole agoonihile dhithu ndha wihina gimwebedhe. 9 Mbwenye oliye ogaddela egihina: “Pole-pole! Kuwerena ndo! Miyo gili mudhaari mukwawo ni aaddibilo, aanamavuhulela ni aathu yaale enawiwelela madhu enafwanyeya muroluni muna. Omukokorele Mulugu.”
10 Teto oliye ogaddelave egihina: “Kuwakoye madhu enafwanyeya muroluni muna, mwaha mudhidhiya osakuliwe ohaddamela. 11 Muthu oohogowa adidele werana dhithu dhaye dhohogowa, muthu yoole anerena dhithu dhonyakavala adidele werana dhithu dhaye dhonyakavala; mbwenye muthu owoogowa adideleve okala owoogowa teto oweela adideleve okala oweela.
12 “‘Ovuruwane! Ginadha mowaguva, ethu ginafunimi wulivani eli ni miyo, mbwenye ginamulivege kadda muthu mowiwanana ni mabasa aye. 13 Miyo gili Alfa ni Oomega,* Oobajha ni Oogomihedha. 14 Oohagalala baathu yaale enaafula malayiwa, wihina ekanne ofuru wodhowa ojha dhowiima dha muthanko dheegumi ni wihina yenyiwe ovolowa muluwani eviraga vamulago. 15 Ode wili athu enakala ninga anabwa,* athu enerana dhithu dhamasenga, enawerana mararuwo,* anamapa, enebedha dhikwamuthu dhoosema ni aatene yaale enadhiveliwa woota.’
16 “‘Miyo Yesu, gihimuruma mungero aaga wihina uvaheni onamoona wa dhithu dhendha wi dhikavihere mulogo. Miyo gili musisi ni odhuulu wa Davidi, teto gili thendderi enaara ni mambesi.’”
17 Muzimu nnamwali anafuna oteliwa enawoga yegihina: “Odhe!” Teto ole aniwa awoge egihina: “Odhe!” Ole anna nthona adhe; ole anafuna adhe aang’we manjhe eegumi mwamahala.
18 “Ginowawaddela* athu aatene yaale enawiwa madhu enafwanyeya muroluni muna gegihina: muthu yoole anenjhedhedhe dhithu ndha, Mulugu aneere omwenjhedhedha mulili dhilebiwe muroluni muna; 19 teto muthu yoole anaavenyihemo madhu-bi-madhu enafwanyeya muroluni muna, Mulugu kanaamwenye wakela dhithu dhapama dhilebiwe muroluni muna. Eyo enatapulela wihina Mulugu kanaamwenye ojha dhowima dhamuthanko weegumi ni kanaamwihiye ovolowa luwani yoweela.
20 “Ole anavaha onamoona wa dhithu ndha anihina: ‘Hee, ginoodha mowaguva.’”
“Amem! Mudhe Nabwiya Yesu.”
21 Opama wohinifwanelela wa Nabwiya Yesu okale ni oweela.