Dhowera Dhaarumiwi
12 Mudhidhi yoole, mwene Erodi wambela wawoniha goyi athu amodha ammulogoni. 2 Oliye oruma wihina Tiyago ddibile Juwawu, apiwe ni supadda. 3 Nuwoona wihina dhithu dheriliyena dhowahagalasa maJudewu, ommagiha Peduru. (Eyo yapadduwe mudhidhi wa mathanga a pawu dhohikanna emela.) 4 Oliye nummagiha onvokedha mukambura, vano ompeleka mmadani mwa makuru mannayi aanamasugwera yalaba mahiyu, kadda nikuru nakanna anamasugwera annayi, teto efunelo yaye yaali yompeleka* mmadani mwa nlogo, Paskwa amala ojhiwa. 5 Naarive Peduru agaali oofugeliwene mukambura, addibila ammulogoni yomulobelela mutana ni mahiyu.
6 Vano ofiya mudhidhi wihina Erodi ampeleke Peduru; emahiyu yeele oliye aagonne oomagiwene ni makurenti menli egamageleliwe ni anamasugwera abiili, teto vamusiwoniva yahikalavo anamasugwera yasugwera kamburaya. 7 Mbwenye morurumusa, mungero a Yehova* ofiya vano kambura yaatene waara. Oliye omudahinya Peduru ni onvenyiha egihina: “Kavenya mowaguva!” Makurenti aamagiwiyena moono, otapuwa. 8 Mungero ole omwaddela egihina: “Wiwegeredhe ni oware sandaliya dhawo” vano Peduru werana ndo. Nuumala, mungero ole omwaddela egi: “Waware malayaawo oode, ogiharege.” 9 Nuwindo, oliye omaruwa omuharaga, mbwenye koonelamo wihina ndhe dhamuruma mungero ole yaali ebaribari. Mwebaribarene oliye uubuwela wihina era oroha. 10 Aliwa okwaranya nikuru noobajha nanamasugwera, nikuru nanabiili, ofiya musiwo wamujhila wakavihera ovolowa musidadi. Musiwoya ofuguwa yekiwa. Vano aliwa nuukuma, ohara dila dhaala, vohilegela mungero ole omwihiya yeka. 11 Peduru nuwonelamo dhithu dhapadduwa, owoga egihina: “Vano, kaginanganyedha wihina Yehova* ohumuruma mungero aye wihina agoobole mmadani mwa Erodi ni dhaatedhene nlogo namaJudewu najhehedhiwa wihina dhigipadduwele.”
12 Nuumala wonelamo dhithu ndha, Peduru odhowa vaade va Mariya amaye Juwawu, aalemeliwe ni ndina na Marku, venvo athu owinjhiva yatugumaniwa elobelaga. 13 Nuugogodda musiwo, mudhaari amuhiyana ithaniwa Rodi odhowa wihina amoone baani agogodda. 14 Nuunona wihina di Peduru, oliye ohagalala vanlubale mbwenye kafugulewo, oliye othamagela mba ni wawaddela wihina Peduru ali vamulago. 15 Aliwa omwaddela yegihina: “Were osavuwa-to.” Mbwenye oliye odidelave owooga wihina ebaribari. Aliwa owoga yegi: “Oyo di mungero aye.” 16 Mbwenye, Peduru okalave vevale agogoddagave. Aliwa nufugula, omoona ni otikina vanlubale. 17 Nuwindo oliye owoga ni nlada wihina emaalewo, vano oliye wawaddela dhithu dhaatedhene Yehova* amwereliye ni makalelo andiliye omukumiha mukambura, egihina: “Mwamwaddele dhithu ndha Tiyago vamodha ni addibilaya.” Numala, oliye ovenyavo odhowa mburo mmodhaya.
18 Vati nuusa, anamasugwera wambela okangana vikaleliwa, ekohanaga ethu baani yampadduwele Peduru. 19 Erodi omusayela pamadhene, woona wi kaanfwanye, wakoha anamasugwera ni oruma wihina esinyusiwe; nuwindo Erodi okuma oJudeya odhowa oSezareya okala wengo mwana malabo vang’ono.
20 Oliye onyanyuwela nlogo noTiru ni noSidoni. Nlogo nna, opangana wihina yagumane nuliye, vano aliwa omuleketha Balastu musadoro a nyumba ya mwene,* omuloba wihina ekanne murenddele, mwaha dhoojha dhewa dhakuma elabo ya mwene Erodi. 21 Labo dhaala, Erodi owara guwodhaye dheemwene, okarati otiribunale vano wambela owoga mwahaye wavathaddo. 22 Vano, muthithi waathu watugumane vevale wambela okuwa yegihina: “Ndhu nna tha mulugu ohiya na muthu!” 23 Vohilegela, mungero a Yehova* onvokedha oredda,* mwaha kamuthithimihe Mulugu. Oliye okwa ni ojhiwa anamuungu.
24 Mbwenye, madhu a Yehova* odhowagave evuwihiwaga teto athu owinjhiva yowarumedha.
25 Vano Barnabe ni Sawulu, numala wapara mabasiwa owakavihera addibila oJeruzale, aliwa ohogolowa wihina emuthukule Juwawu aalemeliwe ni ndina na Marku.