Dhilebiwe ni Lukaji
18 Numala wawaddela yoladdaniha wodhela thima yoolobela malabo aamatene ni ohuselela, 2 egihina: “Sidadi dhaala ahikalawo namatoriha ahamoova Mulugu ni kaamuriha muthu. 3 Teto luwani emodhave ahikalawo maamukwele, oliye kaagoma odhowa owoga nnamatoriha ole egihina: ‘Kawogani pama muladdu dhaaga ginnimina ni mwiddani aaga.’ 4 Wahimala mudhidhi wowinjhivene ahimpwathaga, mbwenye oliye wubuwela egihina: ‘Miyo kaginamoova Mulugu newene kaginamuriiha muthu, 5 mbwenye, woona wi maamukwele ola anoothabwa oginyonya ndala, ginere owoga pamadhene muladdu dhaye wihina aselele oginyonya, gahera ndo onogigomiha.” 6 Vano Nabwiya owoga egihina: “Kanvuruwaneni namatoriha asorihiliye, naarive ahili muthu owogowa! 7 Ni makalelo yaala, Mulugu kanenye wihina athu aye aasakuliye enamuloba mutana ni mahiyu yeddihiwe nuupama, wula aweddihaga nuuvilela? 8 Ginowuwaddelani wihina: Oliye aneere weenya mohulegela wihina yeddihiwe mowogowa. Mowindala Mwaana Muthu afiya, nerege aneere ofwanya nroromelo ninga nenna elabo ela yavati?”
9 Nuwindo oliye wawaddela nladdaniho athu ale yathabwa ororomela wogowa wewa ni yahanna nriho naathu amodha: 10 “Alobwana abiili odhowa otempulu wihina yalobele, mmodha ali nfarizewu mmodha aali namakukusa musoko. 11 Vano nfarizewu ole wimela wambela olobela mmurimani mwaaye egihina: ‘Mulugwaga, ginowutamalelani mwaha kagili ninga athu amodha: ambava, oohuroromeleya, anamararuwa; newene ninga namakukusa musoko ola ali vala. 12 Miyo ginoothuga sumana dhaatedhene dila biili, ginompeleka neekumi mowiwanana ni yeele ginnimina.’ 13 Mbwenye namakukusa musoko ole, imenle mwana volapelavene, kaafuna newene wavenyihedha mento aye odhulu, mbwenye oovada vathimarimani vaye egihina: ‘Mulugwaga geddeleni thagaraga miyo muliba otheega.’ 14 Miyo ginowuwaddelani gegihina: Mulobwana ole adhowile vaade vaye agonihile ekalelo yaye yowogowa ompitha nfarizewu ole. Mwaha muthu yoole anithukulela aneere ototiwa manyazo mbwenye ole aniyevihe aneere wunnuwihiwa.”
15 Ohiya eyo, athu yowadhana aniwa oodduli wihina aatapulele nlada; mbwenye anamahara aye nuwawoona yeragana ndo wasumulula athu ale. 16 Nuwindo Yesu waruma wihina yadhena ahima ale oodduli egihina: “Kaahiyeni ahimaayo edhe wa miyo ni kamwaakoddihe, mwaha Omwene wa Mulugu bwaathu ninga yaala. 17 Ginowuwaddelani ebaribari: Ole ahinaakele Omwene wa Mulugu ninga mwaana, kanaavolowe mumweneni.”
18 Vano namaholela dhaala amaJudewu omukoha egihina: “Namahudhiha apama, geere ddi wihina gaakele egumi yohimala?” 19 Yesu omwakula egihina: “Mwahaya bwaddi ogagithana apama? Kaawo muthu apama ahili Mulugu baahi. 20 We uhanona pamadhene Malamulo enihina: ‘Kukume mba,* kumpe muthu, kuwiye, kuvahe onamoona wowoota, warihege ababo ni amawo.’” 21 Mulobwana ole owoga egihina: “Obajha ezombwaaga ginowavirihamo malamulo aamatene yaala.” 22 Nuwawiwa madhu yaala, Yesu omwaddela egihina: “Ehikala ethu emodha enuhalela onahoweliwe werana: Odhowe, wagulihe dhithu dhaatedhene onniwena korowadha wavahe athu oohawa, wamala onere okanna dhoreela odhulu; vano odhe okale namahara aaga.” 23 Muzombwe ole nuwawiwa madhu yayo, oliye wukuuwa vanlubale mwaha ahithabwa oreela.
24 Yesu omusugwa ni owoga egihina: “Enere orusa vanlubale athu enna korowa ovolowa Mumweneni mwa Mulugu! 25 Mwebaribarene, enere okweya kamelu ovolowa ponyongo ya singano ohiya muthu ooreela ovolowa Mumweneni mwa Mulugu. 26 Athu yawiwale madhu yaala owoga yegihina: “Ki anavuluwe baani?” 27 Oliye owoga egihina: “Dhithu dhihinenyeya waathu, wa Mulugu dhinowenyeya.” 28 Mbwenye Peduru omwakula egihina: “Kasugwani! Iyo nihimala ohiya dhithu dhaatedhene wuharagani.” 29 Oliye wawaddela egihina: “Kawo muthu anahiye nyumba yaye, mwariye, addibile, ababe obe anaaye mwaha wa Omwene wa Mulugu 30 ahakela okunamo mudhidhi yola, teto omakuthulo wa dhithu dhaatedhene,* egumi yohimala.”
31 Oliye wawithanela okwibi anamaharaye ni wawaddela egihina: “Nvuruwane, nnadhowa oJeruzale wengo dhinere wakwanela dhithu yalembe anamavuhulela wodhela Mwaana Muthu. 32 Motajhiha, oliye aneere opelekiwa mmadani mwaathu amalogo wihina emunyemule, emoonihe goyi ni emuturele maara. 33 Yamala omutxapula aneere opiwa, vano labo nanatharu avenyihiwe muukwani.” 34 Naarive dhigaali ndo aliwa kayawoonelemo madhu ale yatapuleliwa, mwaha yotapulela ya madhu ala yaali yoviteya, bumwahaya aliwa kayonelemo ethu.
35 Vano Yesu nuwaddamela oJeriko, onfwanya mulobwana dhaala oohoona agakaratile sere-sere ya dila, alobaga dhithu. 36 Nuwiwa muthithi waathu oviraga oliye okohedha wihina anone ethu baani yapadduwa. 37 Aliwa omwaddela yegihina: “Yesu Munazarenu, dinavira!” 38 Nuwindo oliye omwithana ni ndhu nootama egihina: “Yesu, Mwana Davidi, geddeleni thagaraga!” 39 Mbwenye athu yaali osogolo wa muthithi yoole waathu wambela omusumulula wihina amaalewo, mbwenye oliye othabwagave okuwa egihina: “Mwaana Davidi, geddeleni thagaraga!” 40 Yesu wimela ni oruma wihina adhiwena mulobwana ole oohoona. Vano numwaddamela, Yesu omukoha egihina: 41 “Onafuna guwerele ddi?” Oliye omwakula egihina: “Nabwiya, gikavihereni wihina goonege.” 42 Vano Yesu owoga nuliye egihina: “Kaafugule mento, nroromelo nawo nihuvulumusa.” 43 Mudhidhi yoole mento aye ofuguwa oliye wambela woona, vano oliye omuharaga Yesu amuthithimihaga Mulugu. Teto athu nuwoona ndhe dhereyile, aliwa omuthithimiha Mulugu.