Aalebeliye Akudda 1 Korintiyu
6 Akala vaari veenyu ohukalavo muthu anna muladdu ni mukwaye, munanda addi odhowa otorihiwa ni athu oohogowa, ohiya otorihiwa ni addibila oweela? 2 Nyu kamunonne wihina oweela enere otoriha elabo? Akala nyu munere otoriha elabo, nyu kamunanda otoriha muladdu dhing’ono? 3 Kamunonne wihina nnere watoriha angero? Ki vano, mwahaya bwaddi nihiwogaga muladdu dha egumi ela? 4 Nimakalelo yaala, akala nyu muhukanna muladdu dhenyu wihina mutorihiwe, mwahaya bwaddi mugasakula otorihiwa naathu ehinarumedhiwa mmulogoni? 5 Ginawogela ndo, wihina gutoteni manyazo. Nyu vikalelinyu, kaavo muthu athotho ananda owoga muladdu dha addibila? 6 Mbwenye enereya sowi: ddibila nddibila mukwaye enosumelana mmadani mwaathu yahinna nroromelo!
7 Owoga ebaribari, mwaathukulelanaga otiribunale oddibilave, munithukuliha manyazo mwaannya. Ddibilo uwerela ethu yabure kunanda ovilela? Mwahaya bwaddi kamunarumedha oyelela dhithu dhenyu? 8 Ohiya eyo, mweragana dhithu dhohogowa* munaatotela makathamiho addibilinyu!
9 Nyu kamunonne wi athu oohogowa kinaakele Omwene wa Mulugu? Kamulekethiwe,* ale enawerana mararuwo,* enebedha dhikwamuthu dhosema, ale enakuma mba, athu enivolosihedha* makalelo oogonihana alobwanave, enagonihana alobwanave obe ahiyanave 10 ambava, aliba nrima, anamang’wa, anamabedda, ni agongomwa, kinaakele Omwene wa Mulugu. 11 Mowindala, amodha wa nyu mwaali ndo. Mbwenye nyu muhusuwiwa; muhutxenihiwa; vano munooniwa ninga athu owogowa mwa ndina na Nabwiya Yesu Kiristu vamodha ni muzimu wotxena wa Mulugu ehu.
12 Wa miyo dhithu dhaatedhene dhinowenyiwa* mbwenye kahi wera dhaatedhene dhihikanna mpurelo. Wa miyo dhithu dhaatedhene dhinowenyiwa, mbwenye kaginenya okala mudhaari a dhithu ndho. 13 Yoojha epaddusiwe wihina eyege munipuni teto nipu nipaddusiwe wihina muyege yoojha; mbwenye Mulugu aneere ononga dhithu dhabilidhene. Mwiili kupadduseliwe mararuwo,* mbwenye opadduseliwe Nabwiya; bumwahaya mwiili bwa Nabwiya. 14 Woona wi Mulugu ohunvenyiha Nabwiya muukwani, nihiyoya aneere onivenyiha muukwani wodhela kopolo dhaye.
15 Nyu kamunonne wihina mwiili weenyu yaano dha Kiristu? Munubuwela wi miyo geere othukula yaano dha Kiristu gigumanihe nnamararuwa? Kagidha gerana ethu ninga yeyo! 16 Nyu kamunonne wihina ole anagona nnamararuwa anakala mwiili mmodha ni muthu yoyo? Mwaha “aabilene,” anawoga di Mulugu, “enakala mwiili mmodha.” 17 Mbwenye, akala muthu ali mwimodhani nNabwiya anna mubuwelo mmodhave nuliye. 18 Mwaathawe mararuwo!* Kawo yoothega enaligana ni yeela, mwaha ole anawerana mararuwo, ananonga mwiili waye. 19 Nyu kamunonne wihina mwiili weenyu tempulu ya muzimu wotxena eli ni nyu muvahiwinyu ni Mulugu? Ohiya eyo, mwiili oyo kahiyo weenyu, 20 mwaha muhuguliwa ni mutheengo munlubale. Bumwahaya mmuthithimihe Mulugu mmwiilini mweenyu.