Dhilebiwe ni Lukaji
16 Nuwindo Yesu wawaddela anamahara aye egihina: “Mulobwana dhaala ooreela ahikanna mudharaaye* inkedhiwe wihina kasamalela pama dhoreela dha Nabwiye. 2 Vano Nabwiye omwithana ni omukoha egihina: ‘Ndhadha giniwimi ddi wodhela we? Odhowe wamulebe relatoriyu a makalelo weddihiliwe dhoreela dhaaga mwaha we kunafwanelela okala mudharaaga.’ 3 Vano mudharaaye owoga egihina: ‘Ki vano geere ddi woona wihina Nabwiyaga aneere ogaaka mutholo wokabelela dhoreela dhaye? Teto kaginna kopolo dhoolimana ni ginokanna manyazo olobela dhoojha. 4 Eyaa! vano gihubuwela ethu ginafunimi wera, wihina gakiwa mutholo wokabelela dhoreela dha Nabwiyaaga athu egaakele mmavaade mwewa.’ 5 Vano, omwithana kadda muthu aanfiyari Nabwiye, oobajha omukoha egihina: ‘Mulobwana, onanfiyari aavi Nabwiyaaga?’ 6 Oliye omwakula egihina: ‘Mpimo 100* dha makura.’ Mudhaari ole omwaddela egihina: ‘Kathukula mowaguva papeli nawo nne, olebevo mpimo 50* dha makura.’ 7 Voharela omukoha mmodhaya egihina: ‘Ki we onanfiyari aavi?’ Oliye omwakula egihina: Mpimo 100* dhinlubale dha tirigu.’ Mudhaari ole owoga egihina: ‘Kathukula papeli nawo nne olebevo mpimo 80.’ 8 Nabwiye omuthethela mudhaari ole, naarive agaali muthu oohuroromeleya, mwaha ahooniha wihina aali muthu athotho.* Eneriha sowihina anamwani a omakuthulo wa dhithu* ehithabwa okanna thotho yeragana dhithu dhewa wapitha athu eli muwaarani.
9 “Ohiya eyo, ginowuwaddelani gegihina: Musayele wandana naathu wodhela dhoreela dhohuroromeleya wihina mwarabulela, aliwa* yuwakeleni vaade vewa* va mukalakala. 10 Muthu oororomeleya vang’ono dororomeleya mwa dhithu dhowinjhiva, muthu oohurolomeleya vang’ono dohurolomeleya mwa dhithu dhowinjhiva. 11 Mowindala, akala kamunaroromeleya mwalabihedhaga dhoreela dhohuroromeleya, anuvaheni dhoreela dheebaribari baani? 12 Akala nyu kamunaroromeleya mwalabihedhaga dhithu dhakwinyu, baani anuvaheni ethu eli yenyu? 13 Kaavo mudhaari ananda walaba anabwiya abiili; mwaha wi anamudhivelege mmodha, mbwenye mmodha anerege omwiidda, obe anamwakwanihege mmodha, mbwenye mmodha kanamwakwanihege. Nyu kamukale adhaari a Mulugu teto mudhidhi mmodhave adhaari a Dhoreela.”
14 Vano Afarizewu yadhiveliwa korowa yera ovuruwana dhaatedhene ni wambela omunyemula. 15 Yesu nuwawiwa wawaddela egihina: “Nyu muniwoona ninga athu apamaya vamentoni vaathu amodha, mbwenye Mulugu ohunona pamadhene murima dhenyu. Mwaha ele eli yathima vamento vaathu sonyakavala vamentoni va Mulugu.
16 “Malamulo ni anamavuhulela ehilaleyiwa ofiyedha mudhidhi wa Juwawu. Obajha mudhidhi yoyo Omwene wa Mulugu onna olaleyiwa ninga muthenga dhapama, teto athu amahimo aatene enna wilibihedha wihina evolowemo. 17 Mwebaribarene podi wandeya elabo yavati ni yodhulu ovira, mbwenye kinandeya ovira Nlamulo nimodha nihinathi wakwanela.
18 “Yoole anaamwalane ni mwariye anoodhowa omutela mmodha ohukuma mba, teto ole anaamutele mwihiyana amwalane ni mamune ohukuma mba.
19 “Ahikalawo mulobwana dhaala awaresa dhowara dha purpura ni dha linyu, ajhavo egumaye ni aathabwile oreela. 20 Mbwenye vamulago vaye yomudhesanavo mulobwana dhaala oohaawa ithaniwa Lazaro, teto mwiili waye waatene waali makwaddave; 21 ni ooganesa ninga ajhe dhoojha dhamora vameza vamulobwana ole ooreela. Teto anabwa yoodha walandaga makwaddaye. 22 Nuuvira mudhidhi, mulobwana ole oohaawa okwa, nuwindo angero omuthukulela vamentoni* va Abaraawu.
“Vano nimuliba ooreela yoole okwa ni ovitiwa* mmahame. 23 Agaali mmahame* mune osugwa odhulu, vano oonaga goyi omoona Abaraawu wolapelawene agaali vamodha* ni Lazaro. 24 Mwaha wa yeyo oliye omwithana egihina: ‘Babani Abaraawu, geddeleni thagaraga ni murumeni Lazaro wihina abwinihe embunwaye mmanjheni adhe aridhelihena nlumi naaga mwaha ginna opiseya othukuthani wuno wa mootho.’ 25 Mbwenye Abaraawu omwakula egihina: ‘Mwanaga, kuddiwale wihina wahikanna mpimo wawo wa dhithu dhapama egumawo yaatene, mbwenye Lazaro akenliye dhaali dhabureve. Vano onone wihina oliye anna otodoliwa wuno, mbwenye we onna woona goyi. 26 Ohiya eyo, iyo ni nyu vaari vehu nihikalavo nliddi ninlubale, teto kinenyeya iyo wuno olupela ngo newene nyu olupela wuno nilihuwo.’ 27 Mulobwana ole ooreela owoga egihina: ‘Akala siyeyo kamwerena ginowulobani babani, murumeni Lazaro vaade vaababa, 28 mwaha gihikanna addibilaga atanu, mmwihiye oliye adhowe awaddele wihina enaadhe mburo yola ginapiseyimiwo.’ 29 Mbwenye Abaraawu omwakula egihina: ‘Aliwa ehikanna Moyizeji ni anamavuhulela, yavuruwanege yayo.’ 30 Oliye omwakula egihina: Naari, babani Abaraawu! Mbwenye mwanookwa mmodha anoodhowa aafwanya aliwa enere othwaruwa.’ 31 Mbwenye Abaraawu omwaaddela egihina: Akala kinanvuruwana Moyizeji newene anamavuhulela, naarive muthu avenye muukwani adhowa awaaddela, kinamurumedha.’”