Aamulebeliye Timotiyu
5 Kumusumulule nuuwali mulobwana ali mwanakalaba. Ohiya eyo, omulage nuupama ninga ababo; azombwe ninga addibilo; 2 ahiyana eli anakalaba waalagege ninga amawo; ahiyana eli anamwali ninga arogoliyo ni makalelo maatene oweela.
3 Waavahege thima* amaamukwele, mwebaribarene eli amaamukwele. 4 Mbwenye akala maamukweleya ohukanna ahima obe adhule, aliwene erajhihe ohudhera omulabela Mulugu ekabelelaga murala wewa, aliwa enere werana ndo yubuwelaga makalelo ababiwa ni avwiwa yaalenliwa ofiyedha wunnuwa, mwaha eyo enomuhagalasa Mulugu. 5 Maamukwele mwebaribarene ali maamukwele ni ahinna muthu oomukabelela, oliye anamuroromela Mulugu ni onodidela olobela nuubebedha mutana ni mahiyu. 6 Mbwenye ole anasogoliha dhofuna dha munigwa waye, oliye ohumala okwa naarive agaali mento. 7 Mowindo, odidele waavaha dhoolaga ndha* wihina aliwa ehikanne muladdu. 8 Mwebaribarene, akala muthu kanaasamalela ale anniyena mutholo wowasamalela, thabwa-thabwa athu a vamuralani vaye, onokoodda nroromelo teto oliye dithabwile wakwaranya ale ehinna nroromelo.
9 Maamukwele anafwanelela olebeliwa duule anna yaka 60 obe okwaranya teto aali oororomeleya ni mamune,* 10 ni anoniwe wihina onowapara mabasa apama, andile waalela pama anaaye, aanonile wawaakela aleddo, aasuwa manyalo aaddibila oweela, aanonile wakavihera athu yafwanyiwa makathamiho ni iipelekile wihina aapare mabasa apama.
11 Mbwenye kuwaalebele amaamukwele eli anamwalene, mwaha munigwa weewa wogonihana waanyahuwa enere oteliwa ni enere ohiya omulabela Kiristu. 12 Yera ndo aliwa enere witotela makathamiho mwaha kiyakwanelihe mpaganyo yeriliwana vobajhavene.* 13 Mudhidhi mmodhave, aliwa enakala amangonya, mabasiwaya weedda mmavaade mwaakwiwa; teto kinakala amangonyave baahi, mbwenye aliwa enowambela waaba evolowelaga muselu dhahinaapatha ni ewogaga dhithu dhohufwanelela.* 14 Mowindala, efunelo yaaga sowihina amaamukwele eli anamwali eteliwege ni yaabalege aniiwa teto esamalelege murala wewa wihina enaavahe amwiddani ehu ofuru woonaaba. 15 Mwebaribarene, amaamukwele amodha ehihiya ohara dila yapama vano omuharaga Saddana. 16 Akala muhiyana anna nroromelo ohukanna amudhaaye eli amaamukwele, aakaviherege wihina aliwa ehikale mutholo wa addibila ammulogoni. Vano addibila ammulogoni enerege wakavihera amaamukwele mwebaribarene eli amaamukwele.
17 Anamaholela eneeddiha pama mulogo, ethithimihiwege okunamo, thabwa-thabwa ale enalaba nuuviheya mwaha wowoga ni ohudhiha. 18 Woona wi Dholebela dhinawoga dhegihina: “Kumage mulomo wa ng’ombe wula ethikithaga bewu”, teto dhinowogave dhegihina: “Namalaba onofwanelela othambila.” 19 Wamwiwa muthu mmodha baahi amwinkedhaga namaholela mulogo, kumurumedhe mbwenye yakalawo anamoona abiili obe araru we podi orumedha. 20 Athu yaale enerana dhoothega, wasumululege vamentoni vaathu aatene wihina amodha yoovege. 21 Miyo ginowukongomedha vamentoni va Mulugu, va Kiristu Yesu ni angero oosakuliwa, wihina oharege dhoholela ndha ohumutaanyaga newene ohumusakulaga muthu.
22 Wafunaga omutapulela muthu nlada kukanne marulu, newene kuwawakele athu amodha dhoothega dhewa; okale oweela.
23 Mwaha wa oredda wa nipu naawo ni mwaha obulela malabo owinjhiva, kuwang’wege manjheve baahi, mbwenye omung’wege vinyu vang’ono.
24 Dhoothega dhaathu amodha dhihinoniwa naathu aatene teto dhinowathukulela otorihiwa; mbwenye dhoothega dhaathu amodha dhinononiwa wavira mudhidhi. 25 Nimakalelo mamodhave, mabasa apama enononiwa naathu aatene teto naarive ehinoniwe kidha ekala ndo ooviteyene.