Akudda Efeziyu
4 Mowindala, miyo gili mukambura mwaha wa Nabwiya, ginowulobani wihina mweeddege mwamakalelo apama eniwanana niile mwithaneliwinyu, 2 nuwiyeviha waatewene, nuupama, nujheha, nvilelanege mmodha ni mukwaye nuudhivela, 3 mwilibihedhaga ni murima waatene wihina mukanne muzimu mmodhave ni wiwanana winadhana murenddele. 4 Oliwo mwiili mmodha ni muzimu mmodha, teto eliwo ejhehedho modha baahi yeyo mwithaneliwinyu; 5 aliwo Nabwiya mmodha, nroromelo nimodha, obaddiziwa dila modha; 6 Mulugu mmodha ali Baabi aathu aatene, anna kopolo wakwaranya athu aatene, anaapara mabasa wodhela athu aatene ni mwa dhaatedhene.
7 Kadda muthu wa iyo, ohakela opama wohinifwanelela mowiwanana ni nvaho wamahala Kiristu anvahiliye. 8 Mwaha Dholebela dhinowoga dhegihina: “Oliye adhowaga odhulu, ohawobola adhaari ni waruma alobwana ayo wihina ekale nvaho.” 9 Kito, madhu owi “adhowaga odhulu” enatapulela ddi? Kinatapulela wi oliye ahirajhiha okitela veelaboni yavati. 10 Oyene akitile odhulu, duyene mmodhave ahogolowele odhulu wikwaranye odhulu waatewene wihina aakwanelihe dhithu dhaatedhene.
11 Oliye ohasakula athu oohiyana-iyana mmulogoni wihina amodha ekale arumiwi, anamalaleya, anamakukula teto amodhaya ekale anamahudhiha, 12 wihina yaxagihege oweela, wi yapare mabasa oolaleya ni elibihe mwiili wa Kiristu, 13 ofiyedha iyo aatene okanna nroromelo nimodhave ni okanna enonelo yowakwana ya Mwaana a Mulugu, wi nifwanye ekalelo yeepogo* nimakalelo yayo nikale owaakwanela ninga Kiristu. 14 Mowindo, kanikalege ninga ahima, mwaha athu yaale enahara dhohudhiha dhaathu enaaleketha akwiwa enaligana ni mwanddeya oli muniya onatukumeliwa wula ni wula nnipevo vamodha ni wumba wa niya. 15 Nnohowela owogaga ebaribari ni wooniha odhivela, mowindala nnere ofiyedha withwelavo epaddi yomuzimuni mwa dhaatedhene wihina neddege mowiwanana ni Kiristu ali musolo wa mwiili. 16 Wodhela oliye, yaano dhaatedhene dha mwiili dhinowunnuwa, teto mwaha kadda yaano wiwananaga pama ni dhimodha ni wodhela wahanyedha mabasa oohiyana-iyana athima kadda yaano ethomeliwiwa, mwiili onowunnuwa mwimodhani wihina wivenyihedhe yekiwa nuudhivela.
17 Mowindo, ginowuwaddelani ni ginowukongomedhani mwa Nabwiya wihina: kamweddege ninga amalabo enahara mubuwelo wewa ohunna mabasa. 18 Aliwa eneedda muyihini ni eli wolapela ni egumi enadha wa Mulugu mwaha kinafuna omunona Mulugu teto mwaha wowummiha murima dhewa. 19 Vano aliwa kinaariha malamulo oweddiha egumi, ehithukula mweeddelo wamanyazo,* wihina yeregena dhithu dhaatedhene dhonyakavala ninga munafuneliwa.
20 Mbwenye dhithu muhudherinyu* wodhela Kiristu kahiyo dhendho, 21 woona wi Yesu ohuhudhihani ebaribari teto akala nyu muhumwiwa ni muuhudhihiwa wodhela oliye, eyo enooniha wi nyu muhunona pamadhene dhithu ndho. 22 Nyu muuhudhihiwa wi muhiye emuthu yakale, eniwanana ni mweeddelo weenyu mwanninyuna kale, onanongiwa ni dhofuna dholeketha. 23 Musaddulegeve mubuwelo weenyu, 24 ni muware emuthu exa, epaddusiwe ni efunelo ya Mulugu, enna wogowa webaribari nuuroromeleya.
25 Mowindo, woona wi muhuselela woota, muwogege ebaribari mmodha ni mukwaye, mwaha nili yaano ya mwiili mmodhave. 26 Mutakaleliwege, mbwenye kamutheege; kamuhiye nduwa omothelamo mugaali oonyanyuweene; 27 kamunvahe mburo Ddiyabo. 28 Ole aniiya aselele, mbwenye aaparege mabasa nuuviheya ni mada aye, wihina akanne ethu yonvaha ole anahowela. 29 Muwano mweenyu kamukumege madhu oopiha mbani, mbwenye ekumegemo madhu oolibiha, enahoweleya mudhidhi yoole, wihina ale enaavuruwana elibiheye. 30 Teto, kamukuule muzimu wotxena wa Mulugu, oyene nvahiwinyuna yintelelo wihina moboliwe wodhela yowobola labo novulusiwa.
31 Muselele makalelo maatene ookoya ntxiga, oonyanyuwa, oowali, ooruwana, madhu enavereyiha murima ni obure waatene. 32 Mbwenye mutonyihedhanege opama mmodha ni mukwaye, opwaseya, mulevelelanege ni murima watene, ninga Mulugu uleveliyeni ni murima waatene wodhela Kiristu.