Dhilebiwe ni Matewuji
6 “Mweragana opama weenyu, pole-pole werana vathaddovene* wihina athu yuthetheeleni; mwerana ndo kamunawakele mareeliho a Baabinyu oodhulu. 2 Wanvaha muthu oohaawa* ethu-siithu, kuwobe palaza ninga enerana anamaleketha yakala musinagoga ni murampani wihina ethetheliwe naathu amodha. Ginowuwaddelani ebaribari: Aliwa ehimala wawakela mareeliho ewa. 3 Mbwenye, wanvaha muthu oohaawa ethu-siithu, kuhiye nlada na moono weemara onona ele moono woojha wenriwana, 4 werana ndo kavo anoone dhithu weriliwena. Vano Ababo enoona dhithu dhaatedhene enere wureeliha.
5 “Ohiya eyo, mwaalobelaga, kamwatajhihege anamaleketha, mwaha aliwa yakala musinagoga, ni murampani enadhiveliwa olobela owimelene wihina yooniwe naathu. Ginowuwaddelani ebaribari: Aliwa ehawakela mareeliho ewa. 6 Mbwenye wafunaga olobela, ovolowe mba mwawo ni ofuge musiwawo, windo olobele wa Ababo enoona dhithu dhaatedhene. Vano Ababo enoona dhithu dhaatedhene enere wureeliha. 7 Mwaalobelaga, kamwawogege madhu mamodhave ninga enerana athu amalogo, mwaha aliwa enubuwela wihina enere ovuruwaniwa yawoga madhu owinjhiva. 8 Kamwatajhihege aliwa mwaha Baabinyu oodhulu ohunona dhithu munahowelinyu naarive muhunathi omuloba.
9 “Mbwenye, mulobelege mwegihina:
“‘Baabihu muli odhulu, ndina nenyu ntxenihiwe.* 10 Omwene weenyu odhe. Efunelo yenyu yereye, elabo yavati, ninga odhulu. 11 Munivahe yoojha ya labo na peeno; 12 nleveleleni dhoothega dhehu, ninga iyo nnalevelelihu athu amodha enanithegela. 13 Kamunihiye omorela muwehiwani, mbwenye munobole mmadani mwa Mbure.’*
14 “Mwalevelelaga athu amodha dhoothega dhewa, Baabinyu ali odhulu aneere wulevelelani; 15 mbwenye mwahalevelelaga athu amodha dhoothega dhewa, Baabinyu kanuleveleleni dhoothega dhenyu.
16 “Mwathuga, kove yenyu kikalege yowukuwene ninga enerana anamaleketha, aliwa enosaddula kove yewa wihina athu yawone wi ehithuga. Ginowuwaddelani ebaribari: Aliwa ehimala wawakela mareeliho ewa. 17 Mbwenye nyu mwathuga, musuwe kove yenyu ni mwaadholihe makura mmuruni mweenyu, 18 wihina athu enaanone wi muhuthuga mbwenye Baabinyu baahi anoona dhithu dhaatedhene. Vano Baabinyu anoona dhithu dhaatedhene aneere wureelihani.
19 “Muhiye wugela dhoreela elabo yavati, vidhanle owese ni mukwita teto vili ambava enaveda wiiya. 20 Mbwenye, muugelege dhoreela dhenyu odhulu, wihili owese, wihili mukwita ni wihinafiya ambava. 21 Mwaha vinakala dhoreela dhawo, murimawo onakala venvo.
22 “Lampada na mwiili thi ninto. Bumwahaya, ninto nawo noonaga pama, mwiili wawo onowara. 23 Akala ninto nawo thabure, mwiili wawo watene onakala yiihive. Akala waara wawo yiihi, eyo enatapulela wi yiihi yawo ehithabwa wunnuwa!
24 “Kaavo mudhaari ananda walaba anabwiya abiili; mwaha wi anamudhivelege mmodha, mbwenye mmodha anerege omwiidda, obe anamwakwanihege mmodha, mbwenye mmodha kanamwakwanihege. Nyu kamukale adhaari a Mulugu teto mudhidhi mmodhave adhaari a Dhoreela.
25 “Mwaha wa yeyo ginowuwaddelani gegihina: Kamuthabwege othuwathuwela egumi yenyu mubuwelaga ethu munafuninyu ojha, munafuninyu ong’wa ni munafuninyu owara. Egumi kahi yathima okwaranya yoojha teto mwiili kunakwaranya yowara? 26 Kasugwani balame dhodhulu, kadhinaala, kadhinahadda newene kadhinalogolela yoojha vasasarani,* mbwenye Baabinyu oodhulu onoojhiha. Nyu ni balame anna thima baani, kahiyo nyu? 27 Baani wa nyu athabwa othuwathuwa ananda wenjhedhedha egumaye labo nimodha* nokalawo? 28 Wodhela dhowara, musimwelele ddi? Muhudhere* ni folori dha mukokolani, makalelo dhinunnuwiwa, kadhinalaba newene kadhinisonela dhowara; 29 mbwenye miyo ginowuwaddelani wihina Salomawu mumweneni mwaye kanawarege guwo dhowoma akwaranya folori. 30 Kito akala Mulugu anowanda owariha folori dha mukokolani dhinakalawo labo nimodha mangwaana opahiwa, kanuwariheni nyu athu oyeva nroromelo? 31 Mowindala kamuthuwathuwe mweraga: ‘Nnaajhe ddi?,’ ‘Nnang’we ddi?’ obe ‘Nnaaware ddi?’ 32 Mwaha enathuwathuwela dhithu dhaatedhene ndha baathu amwilaboni. Baabinyu oodhulu ohunona wi munohowela dhithu ndha.
33 Mudidele waaja Omwene ni wogowa wa Mulugu, vano dhithu dhaatedhene ndha munere wenjhedhedhiwa. 34 Mowindo, kamuthuwathuwelege labo na mangwaana, mwaha mangwaana dhinere okumelela dhothuwathuwiha dhimodha. Kadda labo nihikanna makathamiho ewa.*